Hringnun Hi

Hringnun hi kan ngaihtuah chiang ngai em? Enge a nih a, enge a tum? He khawvela kan lo pianchhuah hian enge kan beisei thin? He zawhna hi mi tamtakin lo zawt tawhin, mi tamtakin chhan tumin an ka an ang tawh thin. Mahse, hmeichhe hrin zingah hian chhanna famkim pe thei kan la awm lo a ni chek aniang chu tun thlenga zawhna langsar tak pakhat chu 'Nun hi enge ni a, hringnun hian enge a tum?' tih hi a la ni reng mai a ni.

He khawvela kan lo awm hian kan nun chu duh leh chak neiin a awm a. Nu pum chhung atanga kan chhuah phat atangin duh leh mamawh kan nei nghal a, kan duh leh mamawh chi hrang hrang te chu a phuhrukna zawngin damchhungin kan hmanhlel a, thlan khura zalh kan nih hma loh zawng chu kan zawng a nih hi! Chu hringnun - duh leh mamawh tinrenga khat chu thenkhat chuan zahawm leh hriatreng tlakin an hmang a, thenkhat erawh chuan khawi maw laia hauhuk leh kawlhawk thi ai pawha hriat hlawh lo nun naran an hmang liam ve mek thung a.

Engatinge thenkhatin hlim leh lawm taka hringnun an hman liam a; thenkhat erawh an lungngaih thin? Engatinge thenkhat an nuih a,; thenkhat an tah? Engatinge thenkhat an lungawi a; thenkhat an lunghnur? Hringnun chungchang thlirna chi hnih chauh I han en teh ang u.

EMFI Conference, Bhopal In Pic

Conference Banner

Kanpur ho, kan kal tur Rel Station lam panin Bus-ah


Train Station-ah

EMFI Conference Hmangin Bhopal-ah

Evangelical Medical Fellowship of India, (EMFI) North Regional Conference vawi 13 na chu nikum Udaipur Conference a kal ten an ruat lawk angin kumin November 16 - 18 khan Bhopal hmuna AICUF Ashram ah neih zawh a ni a. Keini Kanpur ho pawh mi 8 lai mai kalin hlim tak leh nuam ti takin kan zu hmang a ni. Hetiang Conference hi nikum atang khan ka tel ve tan a, nikum ah Udaipur, Rajasthan ah neih niin kumin ah erawh Bhopal, Madhya Pradesh ah neih a ni thung a. Nakum erawh chu a thlengtu ah kan tang ve dawn a, kan khua, Kanpur, Uttar Pradesh ah nghah a ni ve thung dawn a ni.

Enge EMFI chu?
EMFI hi India ram pum huapa Christian Medical student (a bikin MBBS leh Dental) inzawmkhawm pawl niin kum 1974 a din a ni a. IMA, EFI leh ICMDA hnuaia awmin an tum ber chu damdawi lam thiamna hi eizawnna satliah a ngai mai lo a Pathian kohna anga ngai a rintlak taka thawk tura inzirtir a ni.

Boston Kan Vanglai

Khua chu nidang ang lo takin a dur deuh khuih a, a vawt angreng hle bawk a. Ka room hnawk nuai chu tihfel pahin hla ka ngaithla a, lehkhabu leh eng ilo a awmna hmun tur lo a awm te ka rem hnu chuan ka thawmhnaw bal ka su leh a. Tlai lama kan inkhelh leh dawn tho avangin ka inbual duh ta lem lova. Khumah mu in ka lehkhabu chhiar tur neih ang zawng zawng ka chhiar zawh vek tawh avangin ka tihtur hre lo chuan nunhlui ka chhuikir neuh neuh a. Lehkha zir tur chu inchhawp tun mah se ka taihmakna in a tlin hlawl loh avangin ka room tukverh chu hawngin ralkhata rel tlan vut vut leh sava chiar nak nakte chu ka thlir vel ta mai mai a.

Thlifim vawt raih maiin min rawn chhem a, vai ram a ang lo riauin ka hre nghe nghe a. Chutih lai chuan thianpa RC-an min rawn phone a, kan sikul kal lai leh hostel awm laite sawiin thianpa Reuben-a induh zia te kan sawi kai a, lung a leng kher mai.

Nia, khawvelah thian tam tak nei mah ila thian thenkhatte hi chu thil kan tawn pui tam bik an awm a, heng ho te hi an hlu nge nge thin. RC-a leh Reuben-a te pawh hi thil tam tak kan tih ho leh tawn ho tawh avangin nunhlui sawi tur kan ngah a, kan inngai em em a ni. Chung kan nunhlui tam tak zinga sawi hmaih hauh loh tur chu 'Boston Kan Vanglai' kha a ni awm e.

Lenghermawii

Khi ah khi ah chhak kawlrawnah,
A leng ka D Lenghermawii.
Mawina Lalnu, thatna par vulna,
Hrilin sawi mah ila hril zo hian ka mawi lo.
A dum ber mai. Aw! A dum ber mai,
Kei Val lungmawla lairil hi.

Hetah hetah thlang kawrvaiah,
Ka leng keimah Vallunglenga.
Mawina hnungchhawn, thatna luahlum loh,
Hrilin ka sawi thiam lo khawilam malsawmna nge?
Ka phu mawlh lo. Aw! Ka phu mawlh lo,
Khuanu malsawm ka phu mawlh lo.

Hmanah hmanah lungmawl vangin,
Hnutiang ka chhawn Lenghermawii.
Chawilai nau ang luaithli lo nul e,
Hrilin ka sawi seng lo kei ka lunglai chhir zia.
A pawi ngei e. Aw! A pawi ngei e,
Suihlung ka chhir ngei e Val hi.

Tunah tunah kar lam hla in,
Leng mah i ka dawn lungrukah,
Mawina neitu ka tan a vul ta.
Hrilin ka sawi thiam lo hringmi hmangaihna hi,
A hlu chuang e. Aw! A hlu chuang e.
Lenghermawii a hlu chuang e.

Zinkawng Hahthlak

An inneih lawmpuitu thenrual leh lainate pawh an tin zo tawh a, an inneih ruai ropui tak thehtute thawm pawh hun chuan kir leh ngai tawh lo turin a liampui tawh. Tunah chuan a hmangaih ber a nupui bulah thu in a car leithar hmangin zinkawng thui tak an zawh mek a ni. Zan a ni a, khaw kar kawnga tlan an nih avangin a reh tlawk tlawk a, lirthei veivak a awm meuh loh avangin chak takin an tlan zel a. A nupui tui taka muhil chu enin a nui sak a, hnung lam enna darthlalang chu a bih a, an tlanpelh hnu khawlai eng chhitte chu chak takin an liam zung zung a, chutiang chiah chuan hringnun pawh hma lamah a tum ram panin a kal mek a ni tih erawh a ngaihtuah lem lo.

Thawklehkhatah chu darthlalangah chuan khaw pakhat a rawn lang hlawl a, chu khuaah chuan mipa naupang khawhar hmel tak a lo lang bawk a. A han enchiang a, chu khua chu tuna an pan mek, Kan Khua tia a lo chhal ve thin a ni tih leh chu mipa naupang chu amah ngei a ni tih a hria. Hmanah chu khuaah chuan a lo khawsa tawh thin a, a pian leh murna khua ni mah se a nu chenna khua a nih vang leh chhan dang pakhat vang mai lo chu atan pawimawhna a nei lem lo.

Tournament Ropui

Tlai khat chu zanriah kil laiin U Maman, "Naktuk Football tournament chu Tea nen khan kan team tan rawn khel ve ta che u?" a ti a. He tournament hi a hma atang daiha hre lawk tawh leh tel ve chak angreng ka ni naa; sawmtu ka neih loh avangin ka lo manghilh lek lek hman a. Min sawmtu awmchhun U Mama te team lah chu vawikhat khelha chak lo mai tur, englaimaha inkhel ngailo an ni a. An thian ho intiphur chawp tel tum ve si; player indaih si lo chuan min lo sawm ve a lo ni a. Phur lo deuh chuan ka han aw ve ta poh a.

He tournament hi chuti tehluaa ropui a ni lem lova, Congress thalaiin kan vengchhung mite tana One-Day Tournament an siam ve mai a ni a. Amaherawhchu, tournament hrang hrang ka khelh ve tawh china hlimawm ber a la nih miau avangin Tournament Ropui ka han ti ta mai a ni. Chhiartuten a ziaktu tarmit vuah chunga min mitthla pui ngei ka beisei.

Sertawk (Thingput Thu)

Tuk khat chu ka nu chaw ei siam riin ka mu tui lai min kaitho hlawl mai a. Sana ka han en a, dar 8:30 a lo ri tep tawh a. Ni pawh a tlangsang tawh angreng hle. Ka nu bulah chuan, "Aw ngatinge min kaihthawh loh a?" ka han ti ve tak na a, exam zo ka nih avangin exam laia ka hah zia hre rengin min kaitho duh lo tih ka hre reng a. Hmai ka phih a, chaw ei dawhkan ka kil ve nghal a.

Chaw ei kham chuan ka nu leh ka naute pahnih chu tuikhur lamah insu turin an liam nghal a. Chutih lai chuan Demand channel a hla ngaihthlak pahin thleng ka sil a. Thianpa Hriata a rawn lut a, a dan pangngai in remote control chuhin a rawn hmet kual nghal zut zut a. Thleng ka sil zawh chuan chumi nia kan thing putna tur chungchang te kan sawi luam a, Pu Vawma mualah sertawk a rah hnem thu a sawi chuan ka beng a verh hle mai. Rang takin ka insiam a, iptepui ak in chhuah pahin kawngka bula ka chempui thiah ka la a, kan kal dun ta hnak hnak a.

Kei Leh Ka Tarmit (Tarmit Thawnthu) - II

Ka tarmit chu kum 2 zet ka vuah ve ta a. A tirah chuan ning hle mah ila a tul miau avangin ka vuah lui zel a. Khawlum avanga tawlh tih mai mai te pawisa lovin inkhelhna ah pawh ka vuah ta zel a. Mak deuh mai chu ball in a per fuh viau a nih loh chuan a tla mai mai lo a ni. Thiante pawn mak an ti in ball ka head zawnga a tla miah lo te an sawi duh hle thin.

Pawl 9 ka zir tum hian hostel ah ka awm a. Dorm-a kan infiam laiin khum bula ka tar chu an nek tla palh a, chutah an la rap zui lehnghal a. A bung ta hmawk mai a. Ka chhungte ka hrilh ngam tawh si lo, vuah lovin ka awm thei tawh bawk si lova. Cello-tape in ka char khawng bur a, chu chu thiante fiamthu thawhna a chang zui a, min fiam laih laih thin.

Kei Leh Ka Tarmit (Tarmit Thawnthu) - I

"Lalawmpuia kha, aw, nangmah kha. Khatin i mit khap zuk zuk tawh suh. Aaa!!! A ti leh ta. Ti tawh suh."

Pawl 5 kan nih laia Miss Maengin nitin min hauh dan a ni. Ka mit that lohna hi a rei tawh angreng hle a, kum 1999 a pawl 4 ka zir lai pawh khan mitna leh a kaihhnawih luna leh thildang vangin sikul ka thulh zeuh zeuh tawh a. Classroom ah a hnung lam atanga blackboard ka hmuh chian theih loh avangin tlar hmaa thut tir reng ka ni thin bawk.

Ka mit that loh chhan hi sawi fak tur ka hre lem lo a. TV ka en tam lova, damdawi emaw, mit tichhe thei thil ka mita a luh ka hre bawk lova. Ka puh tak ber chu mu chunga lehkhabu chhiar ka hrat vang leh Computer games ka khelh hrat vang kha a ni ta a ni. Ni e, Age of Empires leh FIFA 98 te kha kan atchilh ve thei em bawk a ni.

Ka Pa Fam Chan Ni Kha (The Worst Day Of My Life)

Ka mutui lai chu ka nu in min rawn sawi nawk nawk avangin ka harh hlawl a. Hlauthawng aw tak maiin, ''I pa te an accident a nih chu, tho la, insiam vat rawh.'' a rawn ti a. Harh chiang manghlei lovin ka thu hlawl a, engmah tihna chang hre lovin ka melh ngai ka melh reng a. Ka nu insiam zo chuan ka la insiam lo tih a hmuh chuan ''Insiam vat vat rawh kal a hun a nia.'' a rawn ti leh a.

Ngawi rengin sitting room ah ka phei a, thutthleng ah ka thu ringawt a. Engmah tihna chang hre lovin ka rilru a buai vek ringawt mai a ni. Engemaw ti ti a kan innawr hnu chuan ka pi, ka pu, ka nau, ka nu leh thenawm nu Lali leh mi engemaw zat nen kan chhuak ta a.

Ka Nu

"Ka nausenin tu nge mi kawl?
Ka nu, ka nu duh tak chu!
Tawng thei lovin tu nge mi pawl?
Ka nu, ka nu duh tak chu!
Ka dam lo va, a tlaivar a,
Ka tap a, min lo chawi mu thin.
Hah takin, chak lo chung pawhin,
Ka nu, ka nu duh tak chu!..."

Primary Sikul kan kal laiin he hla hi kan zir thin a. Kan sawi rual thup thup thin. A hun lai khan ngaihtuah chiang mang hlei lo khan kan lo zir liam ve mawp mawp mai thin a. Tun hnua ngaihtuah let leh hian a phuahtu Pi Nuchhungi hi a fakawm ka tiin nu te dinhmun dik tak a puangchhuak chiang hle in ka hria.

Ni e, nu te hi chu an hlu a ni. Kei atan phei chuan ka nu hi a hlu lehzual a, ka Pathian hmuh theih a nih angin tuna ka dinhmun thleng thei tura min enkawlna hi engtikah mah ka rul leh thei tawh ngai lovang. Ka nu kha mihring mihrinna ah chuan mi naran ve mai a ni a, lehkha a zir sang lova, hna sang a thawk hek lo. Mahse, a theih ang tawk leh phak ang tawkah ka tan theihtawp a chhuah thin.

Thianpa, Mangtha Le...

Amah chu tlangval zuanzang tak a ni a. Fiamthu a duh in mi biangbiak a thiam a, vawikhat ka hmuhna mah ni se ka ngaina nghal hle. A Facebook profile a a thlalak te chu hmu fo mah ila, a takah han hmuh takah chuan tlemin a lo dang deuh bawk nen, kan han innuih ang the thaw a. Hlim takin kan inkawm a, zanah kham lo takin kan inthlah ta a ni. Chu chu a taka ka thianpa Pega Pachuau ka hmuh hmasakna ber a ni a, ka hmuh hnuhnun ber a ni bawk.

Facebook hi ka hmelhriatna a la rei lo hle a, kum 2010 kum tawp lam khan thianten an sawi nak nak hnu ah hawkdak vak hrim hrimin ka siam ve a. Ka han belhchian hnu chuan a lo hlimawmin zawngchhang a awl hle mai a. Group te an siam a, hnam bil group an siam phei chu a tha ka tiin in unauna tha tak niin ka hria a. Keipawh Pachuau ka nih angin ka hnampuite nen inhmelhriat lehzual chakna a lo awm a, amaherawhchu Pachuau group ka hmuh mai loh avangin siam mai tha in ka hre ta a.

What Happens When A Class Gets Too Boring...

Classroom lum zet maiah chuan thlan hluamin ka thu a. Sana ka en a, dar 12:25 p.m a ni a. Minute 25 chhung lecture ninawm zet ka ngaithla tawh a nih chu. Hemi tuma lecture hi Oral Hypoglycemics niin Pharmacology subject a mi a ni a. A tir minute 10 vel chhung chu ka phur ve viau a, lecture pawh tha takin ka note chhuak ve thlap a. Mahse, a thu lam hriat a har mai bakah a tawng zawi bawk si a, khua a lum bawk nen! Ka thluak a buai zo dawnin ka hre ta hial a.

Ka ziaklohbu ah chuan phek chanve dawn lai chu zirlai a inziak ve a, a bak zawng chu hmuh tlak a awm lo kher mai. Guitar lem ka ziak zo chiah a, pheikhawk maksak tak mai lem ka ziak zo tawh bawk a. Lehkhapuan sirah chuan ''Ka hrilh tam ta che, Biahthu D leh hla pawhin..." tih hla kha a intlar thla duat bawk a.

A Tlai Zo Ta - II

Rang takin ka insiam sawk sawk a, kan khaw lam panin ka inkhalh chhuak ta chuk chuk a. Kan khua ka thlen chuan khua a thim tawh a. Tawi khawmuang lovin Ramtei te in lam ka pan nghal a. Ka va thlen chuan mi an lo zi nuai nuai a, Ramtei ka hmuh mai loh avangin khualkhua atanga inneihna hmang tura lo zin an chhungte leh khawtual mi inneihna atana pawimawh ngaihtuaha che suau suau karah ka han saum dil din ve tawp mai a.

Nakinah chuan Ramtei chu room atangin a lo chhuak ta a. Hlim hmel takin amah betu apiang chu a chhawn zel a. Ngun takin ka en reng a, a hmeltha kher mai! Min rawn hmuh veleh min rawn pan ding nghal a, tlan ti tih; kal ti tihin min rawn pan a. Ka bul a lo thlen chuan a ding chawt a, min en a, a mitah mittui a hnam tiam tiam a, ka dara min chum taih pahin, "Engatinge kha leh chen kha i tawm bo? I thian ah min ngai tawh lo em ni?" a ti a. Sawi tur a vang kher mai.

A Tlai Zo Ta - I

Ka hnathawhna atanga ka haw chu ka chauh deuh avangin thutthlengah ka thu hnawk a. Tui vawt tak in pahin vawiin a lehkhathawn lo thleng ho ka en zung zung a. Lehkha tam tak zingah chuan pakhat ka mit la deuh tu a awm a, chu chu mawi tak mai a 'Inneih Sawmna' tih inziak chu a ni. Tu tak ni ang maw ti chungin ka hawng a, a chhungah chuan rin loh deuh maiin ka hming hriat than em em mai a chuang ta tlat mai!

Rang takin ka phone ka hmet a, kan khaw lama ka chhungte ka phone nghal a. An mi chhanna atang chuan rinhlelh rual lohvin ka lehkha dawn chu a dik zia nemngheh a ni ta. Ka tek sawkin ka hria a, phone a ka biak pawh chu ngaihsak lovin ka hmet hlum nghal a, ka thu hriat chuan min thawn em avangin ka ngaihtuahna zawng zawng lak bo in a awm a, melh ngai melh reng chungin ka thu ta reng a.

Chhan Loh Hmangaihna

Hmangaihna ka dìl a;
Chhànna ka dawng lo.
Khawngaihna ka dìl a;
Pek ka ni si lo.
Hnutiang hawi lovin a liam a,
Tuar dàn ka thiam si lo.
A sàng lua a ni kei ka tàwn an,
Ka dem lo, ka D ka dem mawlh lo.
Sakhmèlah Lianchi iang ve lo hian,
Mangtha tiin thlah mai nange.
A lungdumtu tàngah pawmin,
Hlimten nau ang nui se.
Khiangawi lung a dum phawt chuan,
Kei ariang hi lawm zel tange.

Will You Still Love Me Tomorrow?

Tonight you're mine
completely,
You give your love so sweetly,
Tonight the light of love is in your eyes,
But will you love me tomorrow?

Tumkhat chu kan thianzaho intihlim turin zanriakin kan khaw daifema dilah kan kal a. Zan chu a thiangin thlifim a thaw heuh heuh a, vana arsi pe tuar te chu thlirin ka bawihtei nen chuan insi rialin kan thu dun a. Thla mang lai a nih avangin arsi tam takte chuan kan thutna leh a chhehvelte chu a chhun eng pha lo. Kan piah lawkah chuan kan thiante chu hlim takin an zai ho a, a chang leh an nui khek leh duai duai thin a.

Chungte chuan kan pahnih thinlunga thu nung inthup chu a them pawhin a hawlh buai pha lova. Zawi tak; mahse ring tak siin kan phun melh melh a. Zaninah hian khawvela ka duh ber mai chu ka kiangah thu in tudang mah a thlahlel bik lo chu a ni si a. Hun reitak chhung ka duhthusam laimu ni thin a taka a lo thleng ta mai hi ka tan chuan awih pawh a har ngei mai.

Khawiah Tuan Zel Ang Maw?

Pathian zara Pawl 10 exam tha taka ka zo thei chu ka lawm kher mai. Nitin zing dar 5-a tho a, zan dar 12 vela mu leh thin kha duh duh chen ka mu thei tawh dawn a, hostel atanga chhuak ka nih avangin chhungte lah chuan ei leh in ah min duhsak dawn tih lah a chiang reng mai si. Phur takin haw a, thlamuang takin Pokemon te, Dragonball Z te, Captain Tsubasa te ka en ham ham a.

A tukah chuan ka thianpa, ka kawmngeih em em Vena a lokal a, sava veh puiah min rawn sawm a, chaw eikham ve leh kan chhuak dun hnak hnak a. Kei hi mi a zawnga themtlaw ber mai ka ni a, chumi ni pawh chuan engmah ka perh tla leh pek lova, Vena perh thlak tlem a zawng a kan insem a, aidu tlem kan khawrh bawk a, keini ang chhungkaw tlai khawp chu ka hawn ve mai bawk a.

Me @ Kanpur

Tun tum chu thlalak lam i han en ho teh ang u, hei, ho mai mai chu a ni tho a. hmanni chu ka tihtur hre lovin imgur.com a ka thlalak ka en kual mai mai a, Kanpur ka thlen hnua ka hmel inthlak dan ka en kual vel a. (Thenkhat chuan a inthlak lo in lo ti maithei tho na a, hehe) a nuihzatthlak ve reuh em avangin ka rawn hlui ve mai mai ang che u. (Ka va han ngilnei tak em :P)

1) Kanpur thlen tirh
 

 
Hei hi Kanpur ka thlentirh vela ka lak a nia , 2010 August vel a nih awm chu. Hetah hi chuan ka la naupan hmelin ka la thing em em a, naupang tereuhte ang ka la ni.

Arkaiden Zan

Zan a rei tawh avangin kan hostel chu a reh ruih tawh a, arkaiden zan ni mah se chhum a zin nasat em avangin a thim deuh ruih a. Sana ka en a, dar 2:19 a.m chiah chiah a ni a. Mut lah chu a chhuak lovin khumah ka let ka let a. Mut luih ka tum ngial na a; bui lung tawk ang hlauh, a sak talh mai. Phone ka hmet eng a, earphone ka vuah a, hla ka ngaithla ta zawk a.

Owl City hla Vanilla Twilight kha vawi 3 zet ka ngaihthlak zawh hnu chuan ka ril a tam riai riai a, maggie ei turin Rawatpur lam ka pan ta a. Kalkawngah chuan hla ngaithla chung zelin ka pen phei ve bauh bauh a. Thlasik lai a nih avangin tiauchhum a zing phui mup a, thli thaw in thinghnaha dai tling a chhem per sung sung chuan hmai a rawn theh leh thin avangin a vawt kher mai.

Tawih Ka Nei Ve A

Kum 10 dawn a lo liam ve ta reng mai! Nimahsela, nimin lawka thleng ang maiin ka la hre chiang a, lunglen changa nunhlui chhuikir paha han maimitchhin vang vangte hian mitthla ah chiang takin ka la hmu thei nia! Tunah chuan ka tan awmzia tehchiam nei lo mah se a hun lai kha chuan nunphung a ti khaihlak ve hial a. Nuam leh hrehawm tam tak ka tawrh ve phah hial a nih kha.

Kum 10 dawn lai kalta-ah khan Aizawl veng pakhatah sikul ka kal a. Chu kan sikul chu sikul naran mai mai a ni lo, SAP SIKUL ngat. Chu a chhapah kan ngaihsan em em High Sikul naupang ngat ka ni lehnghal! Chu kan sikulah chuan a ni he thawnthu a a changtunu hi ka tawn tak ni.

Happy Birthday To Me..!! :)

Hurrayyy!!! Happy Birthday To Me...!!!

Pathian kaihhruaina avang liau liau in kum 2012 a ka piancham pha awmchhun ka lo thleng ve leh ta der mai. Hriat loh kar hian hun hi a lo kal chak kher mai tih hi ka ngaihtuah a. He khawvela ka la cham rei loh zia leh thil ka tawn hnem si ziate ka ngaihtuah hian mak ka ti a, enge he khawvelah hian ka 'Mission' ni ang aw ti hian ka inngaihtuah fo thin.

Awle, vawiin hian thinlung takin ka lawm a, lawm avanga tah tur nge nuih tur tiin ka la inngaihtuah mek a ni. Naupang harh leh luhlul ve tak mai dinhmun atanga mite ngaiha tlangval dinhmun kan han kai chhoh ve tak hnu hian mihring hi mahni inngaih ang ngawt kan lo ni lo tih hi ka hrechiang thar em em mai a. Keimahni inthlir dan hi midangin min hmuh dan a ni kher lo a ni.

Lungpui Chungah Chuan

Nipui lai a ni a, khua a lumin tuipui kamah chuan nula leh tlangval, nu leh pa leh naupangte chenin an ri nuai nuai a. Chu khawlum lak ata chu inchiahdaih tumin mitin mai chu an hmanhlel a, eitur leh rimawi nen an ri chel chul mai a. A khat tawkin venghimtu lamin fimkhur a tul zia thu aurinna hmangin an puang dum dum mai bawk a.

Chu tuipui kam nuam taka lungkham nei lek lova mitin an hlim em em lai chuan mi pakhat erawh chu a vela thil thleng zawng zawngin a tihbuai theih loh khawpa thinlung kehchhiaa rumin lungpui chungah a thu a. A khat tawkin tuifawn in a bul vela lungpuite chu rawn su per leh chuai thin mah se hre lo ang maiin hma lam a thlir reng a, a mit atangin mittui a hnam tiam tiam a.

Kha Zan Kha - IV

"Kum 50 dawn lai a ni tawh ang. Khi room no. 78 khi mi pakhat, Mirzapur lam chhuak hian a luah thin a. Tlangval fel tak leh lehkhathiam thei tak a ni reuh a. A sang lem lova, in intiat vel maithei a ni. Vanduaina in a tlakbuak nasat avangin a lungngai thin hle a, thian pawh a kawm ngai meuh lo...'' a tih lai chuan ''Eng nge a vanduaina chu?'' ka lo ti thuai a.

"Aaaa, thil sawi nuam a ni lova, a nu leh pa hi tawhsual tawkin an boral tih hi ni mai teh se, a dang chu min zawt lo mai rawh.'' a tih lai chuan lu ka lo bu nghauh nghauh a. A tarmit chu a vuah a, a aw a thian kharh kharh a. A sawizawm leh ta a.

Kha Zan Kha - III

Ka thil tawn chu mak ka tih em avangin ka mu meng kur a. Ka thianpa lah chu a hnar ring nasa mai si. Sana ka en a, dar 3:27 a lo ni a. A tukah class kal te a ngaih avangin mutthilh ka tum a. A sawt lo kher mai! Ka mitthla ah a hmel tihbaiawm tak kha a cham reng a, ka tim uaih uaih thei nia!

Chutia ka mut men kur lai chuan phun ri mawlh mawlh hi ka hria a, ka thianpa tawngvai a nih ringin ka va en a, a lo la hnar burh burh mai si. Beng chhi karin ka ngaithla a, hla tak atanga zawitea rawn ri tanin a rawn hnai tial tial a, a ring tial tial a, ka bul vel a rawn thlen phei chuan ring tak a ni tawh!

Kha Zan Kha - II

Chutia thlamuang taka ka awm lai chuan thawklehkhatah huan laia thing ding thup karah chuan hauhuk rual riak hi thawn thut ang mai hian an hualreu ta chiam chiam mai a, ka phu chiang kher mai! Kawmthlanga chhimbuk tuibirhin alo chhawn vel rawl nen. Ka nui hmel chu hlauthawng hmelin a thlak nghal a, ka hawi kual hruk hruk a.

Thawklehkhatah khua chu vawh namen in a vawt ta lova. Vawt tia khur hlawk hlawk chungin room lam panin ka phei ta a. Tunah zet chuan thil awmdan chu a pangngai lo tih ka hre chiang ta takzet mai!

Kha Zan Kha - I

Zan khat chu ka tihtur hre lo, lehkha zir peih bawk si lo chu Senior-te room ah ka leng a. Kan senior pakhatin phone thar a lei a, va en ka duh reng reng bawk a. Ka va thlen chuan ka roommate leh junior te pawh an lo awm ve a, titi khawchangte sawiin kan hlim dar dar hle.

Hetia mahni in leh lo chhuahsana mi rama han awm takah chuan lunglen te a na duhin Mizo awmchhun chu kan lo inngai ve bawk nen; reilote kan awm emaw tih laiin hun erawh a kal chak duh phian mai. Mizo hlate kan ngaithla a, Lemchan hmuhnawm tak takte kan en hnu chuan sana pawhin zinglam dar 2 a lo kawk vu tawh a. Tin zai kan rel ta a.

Haihawtna (Absent-mindedness)

''Khawnge ka pheikhawk charna tur i rawn lei chu?''

''Aw! Ka theihnghilh daih! Kha, nangman han lei mai teh.''

''A va han hahthlak thin tak em!''

Hei hi tukkhat ka nu bazar haw nena kan inbiakna a ni. Ka nu hi mi haihawt tak mai a ni a, thil hi a theihnghilh zung zung thin a. Kei a fapa lah hian Upa in, ''Sial rangin sial rang a hring.'' an tih changchawiin ka chhun em em mai lehnghal a, Nufa haihawt nih chu buaithlak chang a tam thin teh e.

A ni lah tak a! Haihawtna hian mihring hi min chenchilh laklawh chuan buaithlak chang a tam thin khawp mai. Nunphung a ti khaihlak a, mi ngaihah fello nih kan hlawh thul. Haihawt avanga vawi khat kalna tura vawi hnih vawi thum lai mai kal a ngai thin phei hi chuan huatthla a la lek lek thin a nih hi.

The One That Got Away

Kum 5 kalta khan ka tawng,
Nitin sikul kan kal ho,
Thla hnih chhung vawikhatmah
ka be lo,
Vawikhat chu min nuih seih,
Mahse ka tana ruat a ni tih ka
ringhlel lo.
Ka hmangaih thu hrilh ka duh a,
Mahse, ka hrilh lo.

Thla hnih hnuah kan inbe ve
tawk,
A felin kan inkawm nel chho,
Kar tawp apiangin an in ah ka
leng,
Ani chuan thian tha tak,
Kan ni a ti.
Ka hmangaih thu hrilh ka duh a,
Mahse ka hrilh lo.

Sikul ka chhuah hnuin,
A thiam loh min zawtin a lo leng,
Zan lamah an inah ka zirtir ta
hial,
Hlim taka inkawmin kan nui dun,
Ka thiantha ber I ni min ti,
Ka hmangaih thu hrilh ka duh a,
Mahse ka hrilh lo.