Ka Pa Fam Chan Ni Kha (The Worst Day Of My Life)

Ka mutui lai chu ka nu in min rawn sawi nawk nawk avangin ka harh hlawl a. Hlauthawng aw tak maiin, ''I pa te an accident a nih chu, tho la, insiam vat rawh.'' a rawn ti a. Harh chiang manghlei lovin ka thu hlawl a, engmah tihna chang hre lovin ka melh ngai ka melh reng a. Ka nu insiam zo chuan ka la insiam lo tih a hmuh chuan ''Insiam vat vat rawh kal a hun a nia.'' a rawn ti leh a.

Ngawi rengin sitting room ah ka phei a, thutthleng ah ka thu ringawt a. Engmah tihna chang hre lovin ka rilru a buai vek ringawt mai a ni. Engemaw ti ti a kan innawr hnu chuan ka pi, ka pu, ka nau, ka nu leh thenawm nu Lali leh mi engemaw zat nen kan chhuak ta a.

Kalkawngah chuan engmah sawi lovin ka ngawi reng a. Ka pa te accident chu engtiang taka na nge ni ang tih ngaihtuah rauh rauh chungin ka thu ve kar mai a ni. Tichuan kan kal ta zel a, damdawiin lam pan tura inngai khan ka pu te in lam kan pan ta tlat mai! "Eee...!!! A na vak lo a nih dawn hi. Damdawiina dah pawh a ngai lo a nih dawn hi." ka ti rilru a. Ka lawm angreng hle a. Mahse, ral atanga ka pu te in hmuh theihna atanga kan thlen chuan tap thawm leh zai ri ka hre ta a nih chu! Ka bing mum mum a, ka kha a chih a, ka awmah hian hnawhtu awm ang maiin thawk a harsa talh mai a. Ka nu hnenah chuan thil awmzia ka zawt a, min chhang lo!

[Han in mualpho law law ila, ka pa hi zu leh khawvel thila a buanchak loh deuh avangin ka nu nen inthenna pawh awm chuang lovin ka pu (ka pa pa) hian a nun te a insiam that theih beiseiin an in lama a hruai phei lai a ni a. Keini erawh chu ka nu leh ka nau nen kan in luah ah kan khawsak lai mek a ni.] Tichuan, kan hnaih tial tial a, zai thawm a ring tial tial a...ka lungphu a rang tial tial bawk a. Kan thlen chuan ka pa, a hma tlai lawka dam tha taka ka hmuh kha khumah pawh zalh lovin kuang chhungah zalhin ka zuk hmu ta a nih chu! Ka awi thei lova, ka ring thei bawk hek lo! Mahse, ka mumang a ni si lo!

Ka ni te leh ka pi ten min lo kuah a. "Te-a, i pa hi mihring a tling zo tawh lo." an lo ti a. Sawi tur reng reng ka hre lo. Ka tawt up up a, engmah tihtheihna reng ka nei lo. Ka tawng thei lova, ka tap thei bawk hek lo. Ka pa ruang bulah chuan ka thu a, a kuang tlang bawhin a biang ka chul ka chul ringawt mai a ni. Khatih lai boruak kha engzat pawh hlawh turin tawng nawn leh dawn mah ila ka duh hauh lovang. Rilru leh ngaihtuahna ah ka nu leh pa te hian engtikah emaw chuan min la boral san dawn a ni tih hriain a dawnsawn dan tur lo ngaihtuah lawk mah ila, a taka han tawn meuh chuan thu a sawifiah thiam rual lohvin a na a ni. A na thlawt!!!

Boruak rit tak hnuaiah zan hun chu kan tlingtla hram a. Khua a lo var chuan ka pi te chuan thingpuite ina intiharh turin min ti a, mahse, ka pa ka kalsan duh loh avangin ka hnial a. Ni a lo tlangsang deuh a, ka patea chuan ka thiante hrilh awm ang ang hrilh turin min ti a, phone ka la neih loh avangin ama phone ah chuan ka thiante ka hriat theih ang ang ka phone kual a. Ka phone zawh hnu chuan chaw ei tura an chhuah zawh hlawm avangin ka bulah ka pu a lokal a, "Te-a, chaw te i ei duh lawm ni? I pa pawh kha a riltam tawh ang zu laksak tawh." a rawn ti a. Hreh tak chungin chaw ei turin ka kal ta a. Bar hnih khat lek ka bar a, ka ei theih ngang loh avangin ka pa bulah bawk ka chho leh ta a.

Ka pa bulah chuan nunhlui ka chhuikir a. Min duat zia leh zirna lama ka tihthat changa min chhuan thin zia te ka ngaihtuah chhuak a. "Vawiin hi inrinni a ni a, nimin khan inhmu turin min thlah a ni si a. Hei ka lokal asin. Min hmuah dan hi a va mak ve!" ka ti a. Ka lung chu a chhia, mahse ka tap thei lo. Ka pa tan hian ka mittui ka ui a ni lova, atana ka neih zawng zawng sen pawh ka huam laiin mittui farkhat pawh ka seng thei lo a nih chu! A mak khawp mai!

Hemi ni hian mihringten kan hma lam hun kan hriat loh zia ka hriatchian phah hle a ni. Ni e, nimin lawk Zirtawpni tlai khan ka sikul bangin uniform leh lehkhabu leina dilin an office ah ka tlawh kawi a. Ani chuan chhuang tak maiin a thawhpuite bulah, "Hei hi ka fapa St Paul's a kal mek a nih hi." a ti a. Ka thil dilte chu a daih tawk pawisa a ah loh avangin a tuk Inrinni a an ina lam mai turin min ti a, Tennis Court bul bus stand thleng min thlah a nih kha. Kha kha ka pa damlai hmel ka hmuh hnuhnun ber tur a ni tih reng reng ka hre lo. Mahse, a ni miau si!

Vuina hun hmang turin mi an lokal sap sap a. Ka thiante pawh an lokal ve a. An va fel tak em!Mami of Chaltlang te,Ruati of Ramhlun te, Kima of Dulte te, Mawi Mawii of Chaltlang te in lo chhiar ve a nih chuan khami nia ka ngaihsak that tawk loh che u khan ngaihdam ka dil duh che u a, ka chunga in thatna hi ka hre reng fo ang. Vuina tan hma in a khat tawkin ka pa chanchin leh amah fakna thu an chhak chhuak reng a. Ka pa in ka nu nen an inneihna a a thianpa, Middle sikula kan zirtirtu in middle sikul ka kal laia scholarship dilna form a 'kum khata Rs 100,000 aia tam lalut lo tan' tih a nih vanga a dil duh loh thu a sawite phei chu ka lo theihnghilh tawh thil a ni a, lung a chhe duh kher mai.

Mi tam takin ka pa zaidam zia leh biak nawm zia te, a hlim theih zia te an sawi a. A awm tak loh vanga fakna mai a ni tih hre mah ila ngaihthlak hrehawm a awm lo. Vuina hun kan hmang zo dawn tawh, amah thlah nan 'Isua hnenah ka him ang' tih hla kan sak laiin tlangval hovin a kuang an rawn chhin dawn meuh chuan kumkhua atan ka pa hi ka hmu leh ngai tawh dawn lo tih ka ngaihtuah a, a hmaa tap thei lo, mittui pawh far thei lo kha a dana dan sen rual lohvin ka biangah mittui a lo luang ta zung zung a nih chu! A na ka va ti tehreng em

Vuina hun kan hman zawh chuan thlanmual thleng ka zui ve a. A kuang an chhilh laite chuan mittui a dir zung zung a. Thiannu Ruatin min rawn kuah a, lungchhe takin kan let leh ta a. Hemi ni hi June 2, 2007 a ni a. Vawiin hi a champha chiah a ni. Kum 5 lai a liam tawh a nih chu! Ni e, kum 5! Hemi kum 5 chhung hian vawikhatmah ka theihnghilh ngai lova, hemi nia thilthleng zawng zawng hi nimin lawka thleng ang maiin a la chiang a. Zantin mut dawnin ka chhuikir ziah thin.

Ni e, he kum 5 chhung hian lunglen vangin ka kur nguai lova, zirna bahlah khawpin ka sun hek lo. Mahse, engtiklai mahin ka rilru atangin ka dah bo ngai lo. Ka pa kan vui liam atanga thla 2/3 vel kha chu chaw ka ei thei lova, ka mu thei hek lo. Ka chau ngawih ngawih a, chanchinthara an accident thu an rawn puan a a na tuar lai video ka en ngat phei kha chuan a hrehawm duh kher mai. Ni e, hringtu pa meuh chan chu a lo na nangiang mai!

An sawi thin, "A kiang thin khuareiah thlafam zun ngaih chu." tiin. Kum 5 a liam ta. A la kiang lo. Khuarei chu engtia rei nge ni a? Engtikah nge a lo thlen ang? Ka pa ka ngaihna a reh dawn ai chuan khuarei chu lo thleng mai se ka va ti em! Aizawl ka chhuahsan dawn apiangin a thlan tlawhin malsawmna ka dil thin a. Ka pa malsawmna nena ka chhuah chuan engmah ka hlau ngai lo. Engmah!

Ka pa thihna hian nu leh pa hlutna min hriat nawn tir awn awn a, ka pa kha vawikhatmah "Ka hmangaih che" ka la ti ngai lova, a thu ka awih loh leh fing nia ka inhriat avanga a thu ka hnial thin avangin ngaihdam ka la dil hek lo. Mahse, tunah chuan duh sateh mah ila ka thei tawh si lo. He ka inchhirna hian ka nun a khalh ngil a, thlafam changin raltiang kai tawh mah se minung ram hi rawn thlir rengin ka ring thin a. Chu chuan min thunun a ni. A chang phei chuan thli thaw te hi min rawn biak a tumna ah ka ngai hial thin nia!

Chuvangin he ka thuziak tlawmte hi i lo chhiar ve a nih chuan i nu leh pa leh i chhungte nen inrem la, i hmangaih thu hrilh rawh. An boral hunah meuh chuan i tlai tawh ang.

Ka pa, ka hmangaih che.