Kei Leh Ka Tarmit (Tarmit Thawnthu) - I

"Lalawmpuia kha, aw, nangmah kha. Khatin i mit khap zuk zuk tawh suh. Aaa!!! A ti leh ta. Ti tawh suh."

Pawl 5 kan nih laia Miss Maengin nitin min hauh dan a ni. Ka mit that lohna hi a rei tawh angreng hle a, kum 1999 a pawl 4 ka zir lai pawh khan mitna leh a kaihhnawih luna leh thildang vangin sikul ka thulh zeuh zeuh tawh a. Classroom ah a hnung lam atanga blackboard ka hmuh chian theih loh avangin tlar hmaa thut tir reng ka ni thin bawk.

Ka mit that loh chhan hi sawi fak tur ka hre lem lo a. TV ka en tam lova, damdawi emaw, mit tichhe thei thil ka mita a luh ka hre bawk lova. Ka puh tak ber chu mu chunga lehkhabu chhiar ka hrat vang leh Computer games ka khelh hrat vang kha a ni ta a ni. Ni e, Age of Empires leh FIFA 98 te kha kan atchilh ve thei em bawk a ni.

Pawl 5 ka zir tum hian ka mit hi a chhe zual a. Rang taka khap zuk zuk ka chin bakah ka hmui ka pet a, ka kiai sawk sawk thin a. Kha kha Miss Maengi khan ka chin dawklak ve hrim hrim ah ngaiin min hau nasa thei hle thin. Ka dem lem lo. A class a nih tawh chuan khap zuk zuk lo tur leh kiai sawk sawk lo turin ka insum nasa thei em em chung khan tihluih ni lo na na na chu hriat loh kar khan ka lo ti leh thin a. Hrem ka va tawk ngun tak e awww...!

Chutia kum chanve dawn kan inhauh hnu chuan mit lam tha lo a nih ringin ka nu leh pa hnenah inentir turin a rawn a, ama hmalakna vekin SCERT hnuaia Special Student tana a thlawna inentirna hmangin Pi Nupuii (Eye Specialist) clinic, Lower Zarkawtah kan inentir ta a. Kan va lut a min han en chiah chu(h!), "He naupang hi, tunge maw a chhun mi mawle? A kum ang rualah a mit a va chhe em em ve mawle?" a ti ta chul a. Tarmit min chawh a tum a, mahse, tarmit vuah ka hreh em avangin damdawi hmanga inenkawl ka dil a, ka dil ang chuan damdawi min chawh phawt a, regular taka ei turin min ti ta a.

Damdawi te chu ka han ei a, vanneihthlak takin ka ngeih zawng tak a ni hlauh mai a, ka mit khap zuk zuk leh hmui kiai suk suk te chu a reh ta hlauh mai a nih chu. Ka va han lawm tehreng em aw! Harsatna em em awm lovin pawl 5 leh pawl 6 chu ka zo fel a, ka mit lamah pawh insawiselna ka nei tawh lo. A tha hlen tawh dawn a niang chu tiin Mizo tam takin kan tih thin, thil pawi tak mai ka ti ta hlauh mai a. Chu chu ka damdawi ka thlah kha a ni. Ka mit a that tawh em avangin pawl 7 ka zir kum tir lamah ka damdawi chu ka thlah ta a, a tirah chuan harsatna a awm lo.

Mahse, kum chanve hnu lamah chuan lu na fek fek ka nei tan a, mit khap zuk zuk ka ching leh tan ta. Tlar hnung lam atang phei chuan blackboard pawh ka hmu fiah hleithei leh ta lova. SCERT hnuaiah tho Dr Engtei clinic, Mission Veng a mi kan pan leh ta a. Ani chuan tarmit bawk chu min lo chawh leh ta a. Vuah hreh viau mah ila hmuh fiah loh ai chuan tiin kan inchawhtir ta rawih a. A sawi danin ka mit chu la dam thei a ni a, tarmit pawh power hniam ber -0.25 chauh min chawh a. Pu Nghaka te dawr (Nghaka Optical, Zion Street) ah tarmit rectangle shape Rs 250 man kan lei haw a, ka vuah ve ta ran a. Chu chu kum 2002 fur lai kha a ni.

A tirah chuan ka zak em em mai a. Class ah leh lehkha zir lai lo chuan ka vuah ngai meuh lo. Thiante lah chuan 'Zawhte doctor' min ti chhen lehnghal a. Zawhte doctor a awm ka hre ngai lova, zawhte doctor in tarmit a vuah lah ka hre hek lo. Engtia zawhte doctor min ti ta mai nge an nih tih hi tun thlengin ka la ngaihtuah thin. :-) Chutia ka phelh deuh chhen avang chuan ka nu in min hau a. "I vuah that peih loh chuan i mit a chhe telh telh ang a, i mit a del mai ang." min ti a. Mitdel ka hlauh em avangin hreh chung chungin regular takin ka vuah ve ta a ni.

Chutia ka tarmit vuah regu tirh chuan ka buai thin asin aw! Ruah a sur leh a glass a huh a, mitmen a tinuam lova. Ni a sat leh thlan a lo tla a, a tawlh thla leh pur pur thin. Haihawtna in min chenchilh avangin a chang leh hmai phih turin phelh nachang ka hre lova, kan beng sawi leh ang bawi bawi a. A chang leh vuah reng chung siin ka zawng vak vak a, a chang leh ka dahna ka hre lo thul. Hun engemaw chen chhung kha chu ka tarmit avang khan buai namenin ka buai lo a ni!

Tumkhat phei chu kan sikulah pawl 5 zirlai naupang fing em em lo, pumrua lian thulh mai si hian ka inrin loh laiin ka hmaiah min beng pek a. Ka tarmit chu a laiah a bung hmawk a, ka hnarkawn a thi ser ser bawk a. Khami tuma haw ka hreh zia kha. Ka nu leh pate hi buaina ka tawh emaw, thiante nena insual emaw chang pawha mi tan ngai reng reng lo, "I thiam loh a niang chu." ti tlat chi an ni si a, chumi tum pawh chuan ka tarmit chu ka harh vanga ka tihchhiat ah an ngai a, min la hau hrep zui lehnghal. Ni e, keini ang chhungkaw tan chuan tarmit pakhat leina pawhin chhungkaw budget plan a tihbuai theih tlat avangin ka dem lem lo.

Tumkhat leh pawh kan thianho in buk kan sa a. Kan zinga mi Tluangtea chuan a pi te kawlthei lawh a rawt a. Dil lawk vek tawh anga a insawi avangin ngampa takin kan lawn a, a puam tha tha lo in kan keih nghal mial mial a. Chutah le, Tluangtea pu a lo chhuak ta! A lo dil awzawng lo chu niin. Sairawkherhin min rawn perh ta pawp pawp mai a, hlau baklengin kan tlanchhia a, kan tlanchhiatna lamah ka tarmit ka thlauh palh a, ka hlauh em avangin ka thlauhna lai tak ka hre tawh si lova. Hauh hlau takin in ah ka haw ta a. Mahse, hemi tum hi chuan min hau lo ve khiah.

Ni e, Tarmit hi a tirah vuah hreh viau mah ila tunah chuan ka thian rinawm ber niin mut lai leh inbual lai tih loh chuan ka phelh ta mang lo. Inkhelh lai leh tuichen lai thlengin ka vuah a, mi mak tih pawh ka hlawh viau thin. He tarmit hlu takin min tanpui dan zawng zawng hi sawi tur a tam a, chhuak leh tur kan lo chang leh a niang chu. :-) :-P