Pages

Sunday, December 18, 2011

Mizo Tlangval Kanpur-ah - II

Thuhma pawh nei lem lovin a hmaa mi kha chhunzawm thuai mai ang aw! :)

Rel Tlai Uchuak
1st year kumtawp exam kan zo chiah chu(h!), rilru hi a han thawveng mai mai khawp a. Kum khat taltawp mahni in pawh hmu lova Kanpur-a ka tal hnuin haw na hun alo thleng ta kha lawm lo thei ka ni lo.

Intithei tak maiin rel ticket ka han la a, in thlen vat vat ka chak tawh em avangin North East Express 'Super Fast Train' ngat kha ka han la a, ka va han intithei tak em aw! Khatih laia ka hlimzia kha thu maia sawifiah chi ziazang a ni lo.

Friday, December 2, 2011

Managing your time

How do we understand the issue of management of time?

We need to start where we looked at our life issues – our life is about being part of Gods Kingdom – our life is for a purpose – the KOG and being part of the same. We are called to Belong, called to become and called to build his Kingdom – Christ as the centre, character as the life style, contribution to Kingdom as the purpose…

But in this paradigm it is also important to understand that We are “Created Beings” and there is a creator…And the creator is the owner and sustainers of our life…. Nothing is mine…he IS the owner……

Thursday, December 1, 2011

Mizo Tlangval Kanpur-ah - I

Nikhat chu khua a lum em avangin inchhungah fan hnuaiah ka thu thlandai mai mai a. Hemi ni hi holiday a nih avangin thian thenkhatte chu an in lamah an haw hlawm a ni. Kan hostel pawh chu a reh ruih a, ka tihtur hre lo chuan thlalak hluite ka bih mai mai a. Lehkha zir tur chu dawhkanah a inchhawp hnur nachungin ka zir peih thlawt loh avangin melh pawh ka melh peih lo.

Chutia ka awm lai chuan tuna ka lehkha zirna khua Kanpur ka thlen hnua ka hun hman tawh dante ka ngaihtuah kir neuh neuhva. Ka la awm rei lo hle nachungin hun hlimawm tak tak ka tawng hnem ve ta hle mai. Chung ka thil tawn hlimawm tak takte chu thamral mai tura pamhmai ka tih em avangin ka Kawmpiutar ka tinung a, ka chhu ve ta kauh kauhva….

Monday, August 8, 2011

World Record Ka Siam Ve a!

Kan hre theuh awm e, Mizoramin Cheraw kan tam ber hmanga World Record a siam kha! Kha mi ṭum khan alawm, Aizawla High School pakhatah zirtirtu a ka tan lai a ni a. Mizo Hnam lam hrim hrim hi ka tuina zawng a nih avang leh kum 9 mi ka nih atanga Lammuala Chapchar Kut lawmna a lo lam tawh ka nih avangin ka zirlai naupangte chu Hnam lam zirtir ka chak ta hle mai a. Principal hnenah ka sawi a, ani pawhin tha a tih zawng tak a nih avangin naupang ho chu lam zirtir a, World Record siamtute zinga tel tir ve ngei chu kan tum ta a ni.

Chumi ni chuan Art & Culture pisa ah ka han leng a, World Record siamtute zinga tel ve kan chak thu te ka han sawi a. Anni chuan phur tak maiin min lo dawngsawng a, dawr an nuamin biak vel pawh an nuam khawp mai. Tichuan, thawmhnaw ngai turte min hrilh a, lam rem tur music track min pe bawk a, kan sikul hming chu kan han ziak lut ve ta a ni.

Tichuan le, lam zir chu kan han tan ta a, lam ngai miah lo an nih avangin a khirh talh talh hle. Mau pawh la hmang lovin lei ah chalk in line kan rin a, chumi line hmang chuan a lam dan chu kan inzirtir tan ta a ni. A tirah chuan an phur ve khawp a, ka han sawi phur pui ve luam bawk a. Amaherawhchu, kan zir rei tial tial a, an thiam har em em mai a. Anmahni pawh an beidawng lek lek tawh a, keipawh ka beidawng titih hman hial a.

Thursday, August 4, 2011

The Girl From Yesterday

Ka phone ri ral ral chuan min ti harh zawk a. Sana ka en vat a, dar 5:23 a.m a lo ni a. Tunge tun ang zing thang thanga mi rawn biak tum chu ni ang aw tiin peih leh peih lovin ka han ban a. Min rawn call tu chu number ka hriat ngai loh a nih avangin hawihhawm thei ang bera chhan tumin ka aw ka thian te te a, ''Hello'' ka'n ti puam vei talh a.

Min rawn betu aw chu ka hriat than a ni tlat mai le! Chu aw chuan ka mutchhuak a hnawt kiang nghal duak a, ka thu ngil nghal ngawt a. Reilote chhungin ka taksa pumpui hi a fanchhuak vek hman hialin ka hria. Ka kha a chih zova, ka kaihza te chu a sai hlawk hlawk a, ka awmdan chu ka hrethiam lova, tih danglamin ka awm zo a ni ber mai.

Thu tam a sawi lo, "Vawiin-ah hun I neih chuan inhmu ang hmiang?" tih mai te hi a ni. A sawi zawh chuan phone chu a dah nghal a, engmah sawina hun ka nei lo. Chutihlai chuan ka nupui zing tlan pawh a rawn thleng ve chiah a, thingpui sa vet vawt min rawn pek pahin an hnathawhna chanchin min hrilh malh malh a. A khat mawi tawka "E, a ni maw?" tia ka lo chhan ve bauh bauh lai chuan ka ngaihtuahna erawh hmundangah a awm daih thung a. Mahse, a hre lem lo niin a lang.

Friday, July 29, 2011

Zorama

Nipui lai a ni a. Khua a thiangin van boruak zau takah chuan chhum hmuh tur reng reng a awm lo. Khua chu a reh tlawk tlawk a, a khat tawka thlifim rawn thaw heuh heuh thin chuan khaw nawmna a belhchhahin lung a tileng kher mai.

Ral khatah ar a khuang thliai thliai a, hmeichhe naupang tuichawi tur ri le lu pawh an kal liam tawh avangin hriat tur a awm tawh lo. Vanlaizawlah muvanlai a dir cher cher a, thli thawt zawngin ral lehlamah pangpar mawi taka vul chuk rim a rawn nam chem chem bawk a. Hawi velna lam apiang chuan rilru a tih hlim sarh vek avangin he hun hi hun tha a ni a tih loh theih loh.

Chu Nipui nuam em em maiah chuan tlai khat chu ka vahvelna ah hmun pakhat ka thleng a. Chu hmuna Theihai kung hnuaiah chuan Zorama chu mu in ka hmu a. A hmai chu a lukhum pawr tawh taka a khuh avangin a hmuh theih lova. En mai chuan a muhil niin a lang.

Tuesday, July 26, 2011

Film Te Hi Awm Ta Lo Se...

Film kan tih mai Movies te hi awm ta lo se hengte hi kan hre lo mai awm mang e….


1) In hrànga awm reng rengin hmeichhiain thawm danglam deuh hlek apiang kawr taksa lang tam thei ang ber ha in a va finfiah kher tur a ni.


2) Police in emaw, misual in emaw an um reng reng che in eng lai pawha bikbo theihna tur St Patrick’s Day parade a awm thei zel.


3) Rizai tha mi, L-shape a siam, mipa kawng thleng leh hmeichhe zakhnuai thleng khuh thei a awm tih te hi.

Friday, July 22, 2011

Tawnmang Lasi

Mumang hi thenkhat tan chuan thil ho mai mai, chaw tak khuka khuk pui tlak loh a nih laiin thenkhat erawh chuan an ngai hlu angreng hle thung a. Kei ngei pawh hian mumang hi engvakah mah ka ngai ngai lem lova, sawichhuah pawh ka sawichhuak khat reng a ni. Mahse, mumang thenkhat rilrua cham veng veng thei khawp a awm tlat mai erawh hi chu mak ka ti hle thin.

Zankhat chu mumang mak deuh mai ka mang a. A tuk ah pawh chu mumang chuan ka rilru a luah ta tlat mai a. Mak ka tiin theihnghilh ka tum nasat poh hle a chiang tawlh tawlh mai si a. Chu ka mumang chu ka han hlui dawn che u a ni.

Hemi zan hian ka muhil thei mai lova, zing dar 3 a rik pawhin khumah ka la let ka la let a. Ka mangang chuan mut a tihchhuah beiseiin hla te ka ngaithla a; awmzia erawh a nei lem lo. Chutia mangang taka ka awm lai chuan khawvar lam hnaihah ka lo chhing sek a ni awm a, mumang mak tak mai ka mang ta a ni.

Tuesday, July 19, 2011

Tluangtea

Zan khat chu ka mut theih loh avangin khumah ka let ka let a, pawn lamah chuan ruah a sur seng seng a, boruak pawh a tinuam phian mai. Sana ka en a, dar 4:59 chiah chiah a ni a. Reilote-ah khua avar mai dawn avangin leh chhun lamah tihtur pawimawh ka neih avangin mutthilh hram ka han tum a, a sawt lo kher mai.

Ka beidawng chuan phone ka han ban a, earphone ka vuah a. A vawh deuh hlek avangin puankawp ka la chhuak a, tumthang hnah tla ang zana ka mut at hnu chuan ka phone-a hla chu ka play a, earphone chu ka bengah ka chuktuah a, ka ngaithla ta vang vang a.

A tir berah chuan The Band Perry - If I Die Young ka han play phawt a, a zaitunu aw tham chil chel chuan beng a fah kher mai. An zai zova, a dang ka play leh a, chu pawh chu a zo leh a, a dang ka ti leh zel a. Chutiang hlir chuan 'Elton John - Nikita' te, 'The Beatles - Something' te, 'John Lennon - Imagine' te, 'Merle Haggard - I'm A Lonesome Fugitive' te leh a dang ka duh deuh deuh hote chu ka ngaithla ta zel a.
Ka lung a lengin rilru in nunhlui a chhuikir a, hmana ka thianpa kha mitthla ah alo lang a. Lung hlui a leng kher mai.

Saturday, June 4, 2011

To My Daddy - A Chhiar Ngai Loh Tur Lehkhathawn Chu...

Ka Pa,

Tun huna hetiang thu ziah a ngai ta mai hi a mak ka tiin hriatthiam har ka ti. Ka theihnghilh thei lo, kha ni, June 2, 2007 kha. Khami ni khan nilengin ka lung a leng a, ka school banah pawh ka ngaih em che avangin in office ah ka rawn tlawh hial che a nih kha.

Nang chuan chhuang tak maiin i thawhpuite bulah, '' Hei ka fapa St Paul's-a kal a nih hi.'' i ti a. Min chhuang tiraw, pa? Keipawh ka inchhuang asin! Heng ka lehkha zirnaa ka hlawhtlinna zawng zawng te hi i mi fuihna rah a ni asin. Zanah ka lehkha zir chhung zawng min menpui a, chhuna hah taka hna i thawk chunga thingpui min lum sak tura i men tang tang thinte kha ka theihnghilh lo asin.

Sunday, April 17, 2011

A Thamral Lo - II

(Hei le, rei tak hnu ah ka chhunzawm ta hram. A tawp dan hian lung a ti awi chiah lo maithei a, mahse thlahrang lampang ka chhiar thinte hi a tawp dan inang put a nih thin avangin tlema dangdai deuh tih ka tum ta a nih hi. A awmang lo viau a nih leh a dang ziah hunah ending dang kan hmang leh turah ngai ang. Enge ni na vei, inzir mek kan nia lawm maw le!)

Tichuan, thukhawchang sawi chung zelin chak takin kan tlan zel a. Ruah lah chu a sur duhin khawpui ri dur dur reng chuan awm a ti nuam lo hle mai bawk a. Kawl a phe zuai zuai reng bawk a, ka huh zawr hneh em avangin khaw chhung thlena intihlum thuai thuai ka chak kher mai.

Khaw chhung luh nan mel chanve lo liam a awm tawh lovang tih ah chuan vanduaithlak takin kan chuanna motor ke chu a thep leh ta nghal a. Rang taka zuang chhuakin a chhiat dante chu kan enfel zung zung a. Driver chuan a ke spare a hnunga a dah avangin lungngai lo turin min ti a, a ke thep a herh thlawn lai chuan kei chu a ke spare la turin motor hnung lamah chuan ka phei nghal bawk a.

Tuesday, March 15, 2011

A Thamral Lo - I

Favang lai a ni a. Pathianni chawhnu dar 3 velah chuan mut pindan-ah lehkhabu chhiar pahin ka tluzal mai mai a. Khua chu a lum lutuk lo na a; mut ti chhuak tawk leka a uap churh avang chuan ka lo chhing sek nghe nghe a.

Choka lam atanga Ka nupui Emily-i au ri chuan min tiharh hlawl mai a. Ka va thlen nak chuan ka Emily chu chhuat daiah, thisen nena inchiahpiah nuaihin a lo let reng a. Rang takin ka tlan phei a, tap chungin ka au a, ka pawm bawk a. Chutia ka sawngbawl vel lai chuan harsa ti takin thawk a han tum a, a mitmengah chuan hlauhthawnna ka hmu a, ka khawngaih kher mai.!

Tawng chhuah tumin a han ang zuau a, mahse, ri chhuak tur 'aw' a awm tawh lo. A marphu a zawi tial tial a; a mit chu a chhing riai riai a. Chutih lai tak chuan ka tukkhum hi chhut chawrh ang mai hian a ri bur a, ka hit nghal chuai a. Engmah ka hre chhunzawm thei ta lo.

Ka han harh leh chuan in pakhatah hian ka lo mu reng a. Ka han hawi kual a, mak ka ti kher mai. Chu in chu in lian lem lo tak a ni a, choka, mut pindan vel pawh a awm hran lem lova. A bang leh chhuat velte chu thing a sak a niin a chung erawh rangva a ni thung a. Khum pakhat a awm a, World Map bangah a inbel bawk a. Dawhkan leh chair pakhat ve ve nen. Bual In ni awm tak a in ping dang ve bawk a. Chu bak chu engmah dang a awm lo.

Thawh ka han tum a, ka lu chu a na hle mai. Harsa ti tak chungin ka han tho lui a, pen hnih khat ka han pen a, ka lu a rawn hai a, khumah bawk ka tlu let leh ta a.

Chu ka awmna in neitu chu a rawn lan mai beiseiin ka lo nghak rilru deuh va, mahse hmuh tur reng reng a awm lo. Dawhkan-ah chuan diary pakhat hi a lo awm a. Ka han keu thuak thuak a,

..16th Aug, 1969,

Thing zingah hliam tuarin a lo awm a, ka hruai haw ta mai. A hmel chu a tha kher lehnghal a, ka Lucas nen an inang hle. A unaupa a nih ka ring....

tih hi alo inziak a.

Chulai hmunah chuan chawlhkar thum zet ka awm ta a. In neitu lah chu awm lo ang maiin a bo hmiah si a. Chulai hmun chu nuam ka ti tan tawh hle a, thenawm an awm lova, thing lian tak tak leh hnim bawn chhah tak takin a hual vel a.

In atanga hla vak lovah chuan kawng pakhat, vawk kawngtum niawm tak hi a awm phei ruah a. Mak tak maiin chu kawng ka hnaih apiang chuan hlauhnain ka thau vah min man a, ka khur chhe zo vek thin. Chu kawngah chuan chhum a zin phui luk avangin a hmuh hlat theih lova, chhum zingah chuan hmeichhe ruangam niawm tak hi chiang lo ruaiin ka hmu ziah lehnghal a.

Chu hmunah chuan ka awm rei ta hle mai a. Ka hliam te pawh a dam fel hnu chuan awm reng tha in ka hre lova. Khawnge ka awm tih leh khawnge ka mihringpuite an awm tih zawhna chhan nan chu hmun ata chu chhuah a, zawn chhuah ka tum ta a. Chubakah chawlhkar hnih vel liamta atang khan ka bul velah hian min lo thlir rengtu awm ang tlata hriatna ka nei thin a. Chu chuan min ti hlauvin chu hmun chhuahsan chu min tichak reng reng bawk a.

Chhuak tur chuan ka inpuahchah a. Engkim fel thawkhata ka hriat hnu chuan ka chhuak ta a. Amaherawh chu chu hmun ata chhuak tur chuan a hmaa ka sawi tak kawng te tak chauh kha a awm a. Chuta kal chu hreh sateh mah ila ramhnuaia kal chu ram chin hriat loh nen, tih mi ah ka ruat loh avangin hreh tak chungin ka zawh ta hnu hnu a.

A hma pawha hlauh tawh sa nak alaiin chu kawng ka zawh tan chiah chu, ka ngaihbel nge ni, vawt vur hian ka hria a. Chhum a zin phui mup avangin hma lam pawh hmuh thui a har hle mai. A khat tawkin sihal a u leh ruah ruah thin a. Hmeichhe tawng ri nawk nawk thawm hi ka hre reng mai bawk a. A chang leh beng bul lawkah te a rawn ri a, a hla tial tial a, a zawi tial tial a, a hnu lawkah a ngai ang chiahin a rawn ri leh thin a.

Ka intipachang lui a, hlau lo ang takin ka kal lui tang tang a. Ralkhat atanga min thlir rengtu awm ang tlata hriatna ka neih chuan ka awm a ti nuam lo kher mai. Chu kawng chu ka zawh zel a, a chang leh chho ulh tak tak kal a ngai a, a chang leh phaizawl, zau em em mai kaltlang a tul bawk a. Ka kal rei tial tial a, ka bo tial tial nimaiin ka inhria. Khua chu a tlai zel a, a thim ta hial a. Zan thim tih hrehawm belhchhah turin ruah lah chu tam namen lovin a sur lova. Kawl a phe zuai zuai a, khawpui a ri rum rum a. Ruah surin ka khawnvar a nan mih tawh avangin a chang changa kawlphein kawng a chhun en ring chungin ka arkhawdim dai ve mawp mawp a. Chutih lai chuan ka hnung lamah chuan min zuitu awm tlatin ka hria a, beng chhi ranin ka kal ta a. Chu ka hnunga mi (?) chu ka ke pen rual zela a pen ve avangin ka ngaih a tha lo hle mai a. Ka hawilet lahin a thim em avangin engmah ka hmu thei bawk si lo!

Chutia ngaih tha lo taka ka kal lai chuan tek tlak en lai leh ka lehhawi hun a inrual ta chiah mai le! Kawlphe engah chuan ka hnung hlam hnih vela hlaa ka nupui Emily, dang bui mai, lungngaih hmel taka min lo entu chu chiang takin ka va hmu ta! Ka mit sulh a, ka kha a chih a, ka khur chhe zo ta vek mai. ''Chhei le, ka boral dawn ta!'' tiin, ka tha neih zawng zawng sawm khawmin hma lam panin ka tlan ta dawr dawr a. Hmeichhe nui ri awr awr ri ka hre zui nghal a, ka beng ka hup a, ka tlan zel a.

Kawngpui (Highway) ka va pawh hlawl a, motor lo tlan hmasa ber chu lo phar dingin driver hnenah chuan ka thil tawn zawng zawng chu a bo a bang awm lovin ka hrilh fai ta kelh a. Min khawngaih hmel khawp mai a, hlauthawng lo tura min thlamuan pahin nu pakhat, misualin an thah leh a pasal chin hriat loha bo chungchang chanchinthara a hriat tawh thu leh kei chu ka nih leh nih loh thu min zawt a. Kei chuan ka nih ngei ka rin thuin ka chhang a. (to be contd..)

Saturday, February 26, 2011

How To Spot An Email Hoax!

Internet khawih thin chuan kan hre vek awm e. Email emaw, thil dang emaw hmanga thu dik lo theh darh a, midang ti chiai thei chi laka inven dan i han en teh ang. Pawimawh ka ti riau!

Without researching the
factual claims made in a
forwarded email there's no
100 percent sure way to
tell it if it's a hoax, but here
you'll find a list of
common signs to watch
for...


Here's How:

Tips:

1. Note whether the text you've received was
actually written by the person who sent it. Did
anyone sign their name to
it? If not, be skeptical.

2. Look for the telltale phrase, 'Forward this to
everyone you know!' The
more urgent the plea, the more suspect the message.

3. Look for statements like
'This is NOT a hoax' or 'This
is NOT an urban legend.' They typically mean the opposite of what they say.

4. Watch for overly emphatic
language, as well as frequent use of UPPERCASE LETTERS and
multiple exclamation
points!!!!!!!

5. If the text seems aimed
more at persuading than
informing the reader, be
suspicious. Like
propagandists, hoaxers are
more interested in pushing
people's emotional buttons than communicating
accurate information.

6. If the message purports to
impart extremely
important information that
you've never heard of before or read elsewhere in
legitimate venues, be very
suspicious.

7. Read carefully and think critically about what the
message says, looking for
logical inconsistencies,
violations of common
sense and blatantly false
claims.

8. Look for subtle or not-so-
subtle jokes — indications
that the author is pulling your leg.

9. Check for references to
outside sources of
information. Hoaxes don't
typically cite verifiable
evidence, nor link to Websites with
corroborating information.

10. . Check to see if the
message has been
debunked by Websites that
debunk urban legends and
Internet hoaxes

11. . Research any factual
claims in the text to see if
there is published evidence to support them. If you find none, odds are you've
been the recipient of an
email hoax.

PS:

1. Virtually any email chain
letter you receive (i.e., any
message forwarded
multiple times before it got
to you) is more likely to be
false than true. You should
automatically be skeptical
of chain letters.

2. Hoaxers usually try every
means available to make
their lies believable -- e.g.,
mimicking a journalistic
style, attributing the text to
a 'legitimate' source, or
implying that powerful
corporate or government
interests have tried to keep
the information from you.

3. Be especially wary of
health-related rumors.
Most importantly, never act
on 'medical information'
forwarded from unknown
sources without first
verifying its accuracy with a
doctor or other reliable
source.


[Source : About.com]

Wednesday, February 23, 2011

Ka Héllai D té kha!

Kum 2007 nipui lai a ni a. Kan sikul hall lianpui maiah chuan function a awm avangin kan lutkhawm a. Khua a lum avangin tukverh bul thutna chu ka chuh var a. Thlifim dawn paha pawn lam ka thlir dauh dauh lai chuan ka thianpa chuan min rawn nghawk zauh pahin stage lam a kawk zauh va. Ka han hawi nak chuan tleirawl tituai nalh leh hmeltha zet mai hi zai turin a intintuah mek chu niin! Ka tek sawkin ka hria a, chu chu ka vawikhat hmuhna a ni.

Kan sikul hi a len tham em avang leh naupang pawh sang chuang zet kan nih avangin a hma a ka lo hre ngai lo pawh kha thil mak a ni lem lo. Tin, hmeichhe ngaihsak hluai chi ka nih lem loh avangin a chang changa kan inhmu zeuh zeuh tih mai loh chu biak pawh ka be ngai chuang lova. Ani pawhin min hre awmin a lang lo. Mahse a ruk chuan ka ngaizawng bur thung!

Ni a liam a, thla a liam a, sports hun a rawn inherchhuak ta! He hun hi ka nghakhlelin intlansiak, high jump leh long jump ah te kan house aiawha tel ngei tumin ka inbuatsaih ve a. Mahse Selection kan neih ni chuan 100 m race, long jump leh high jump-ah chiah min thlang ta, ka lunghnur angreng hle a, 200 m leh 1500 m race chu ka tlan ve thei dawn ta lo a ni.

Sports ni chu a lo thleng ta a, Lammualah ngei mai khan a hmasa berah 100 m race kan han tlan ta a nih kha! Ka hma ah 2 chiahin min thlen khalh a, final round ka inhlangkai ta der mai. Chumi hnu chuan item dang ka telh lohna an tih dawn avang leh high jump tih hun a rawn thlen leh mai dawn avangin pavillion hnung lamah chuan warm up pah in ka tlan lauh lauh va, ka piah lawkah chuan ka ngaihvarung thawnite chuan high jump zirin an lo zuang ve lauh lauh chu niin! Intithei takin an hrui kham, an zuankhum theih loh chu ka va zuan khum vei zauh thin a.

Chutia vawi hnih vawi thum ka va tih hnu chuan kan hmelthai chuan min lo man chat pahin, ''Min lo zirtir ve teh, engtin nge i zuan bik?'' a ti zawm zat a. Phur takin ka zirtir ta hlawm a.

Ani pawh chu high jump bakah intlansiak lamte pawh alo ti ve dawn reng mai a. An intlansiak lai chuan ka lo tang ve khawp a. Rawl tawp tawpa ka lo auh lai chuan a tlanzawm thei tawh loh avangin a thu ta hnawk mai a, lung a rap a, a ke hnuai chu alo thi chu niin! A thiante nen pavillion lamah kan hruai phei a, damdawi ka lak lai chuan ani pui roh chuan a ke thi laiah tak mai khan moov spray alo kap hmanhmawh a, a na ti hmel chu nuihzatthlak tak a ni. A ke thi chu ka han sil sak a, damdawite hnawihin ka tuamsak ta a.

Chumi ni atang chuan sports zawh hnu thleng pawhin kan inkawm chho ta zel a. Kan inhrechiang tulh tulh a, a fel ka tiin ka duhna a pung tulh tulh bawk. Mahse, ngaihthat lohna riau ka nei. A mitmei emaw, a nungchang emaw atangin min han duh ve anga han ngaihbel tur reng reng ka hmu lo. Thian nihna bak lo chu!

Nitinin ka inngaihtuah a,ka duhzia chu hrilh ka duh. ''Vawiin chu ka hrilh tawh ang'' tiin vawi tam darthlalang hma ah tihdan tur ka zir thin a. Mahse a hmel ka han hmuh meuh chuan ka pamtul leh mai thin. Ka huaisenna hian a tlin ngang lo. Zan khat chu, khawnge, hrilh loh aiah SMS tal hian ka hrilh mai teh ang tiin ka duhthu chu thlum tak maiin, ka saptawng thiam zawng zawng phuahkhawmin ka ziak a, ka va thawn ve a nih kha.

Min chhanlet hun tur nghakin ka phone chu ka hum thlan hluam tawh a. Min chhan tih reng a nei silo. Ka lo thawn ta kher kher chu ka inchhir hnuhnawhin zahthlak ka ti kher mai! Chutia ka inngaihtuah lai chuan ka phone chu a rawn ri a, rang takin ka en vat a, ''1 new message received from *****'' tih hi alo lang kalh a. Phur tak si, huphurh bawk siin khur dar dar chungin ka han chhiar a. Ti hian alo inziak a,

''MU MAI MAI TEH!'' tiin.

Tuesday, February 22, 2011

God of the Mountain - Lynda Randle

God On The Mountain

Zan khat chu muhil thei lovin ka khumah ka let ka let a. Pawn lamah chuan ui bauh ri chuah chuah leh ralkhata rel kiu ruai ruai chu a hriat theih a. Thla chu a engin ka khum chu tukverh kaltlangin a rawn chhun eng ruih a, lung a leng duh kher mai.

Mut a chhuah loh em avangin ka dawhkana sana chu ka han ban a, dar 3 alo ri chiah chiah a. Ka phone chu ka han hmet eng a, facebook te ka han lut a; ka chhuak leh vel thul!

Picture leh Video ka han enkual vel chuan hmanni a ka download thar, 'God on the mountain', Lynda Randall sak chu ka han ngaithla vang vang a. He hla hi ka duhna a rei tawh bawk a, tihtur ka neih loh chang chuan ka ngaithla leh mai thin a. Hemi zan pawh hian min hneh leh kher mai.

''Life is easy when you're up on the mountain,
And you've got peace of mind like you've never known.
But then things change and you're down in the valley.
Don't lose faith for you're never alone.

For the God on the mountain is still God in the valley.
When things go wrong,
He'll make it right.
And the God of the good times, is still God in the bad times.
The God of the day is still God in the night.

You talk of faith when you're up on the mountain.
Oh but the talk comes easy when life's at its best.
But it's down in the valley of trials and temptation
That's when faith is really put to the test.''

A dik a ni ti raw u! Kan chan that lai, he khawvela malsawmna dawng a, hlimna leh lawmna kan tawn lai chuan nuam kan tiin kan hlim thin a ni. Midang rinna kawnga chak lo zawkte pawh kan fuih phur viau thin ang.

Mahse hlimna leh lawmna in min kiansan a, harsatna khura kan tluk luh meuh chuan hriatthiam har kan tiin Pathian dem hial pawh kan nap thin. He khawvel hi hlimna hlira khat a ni bik lova, hrehawm changte, harsat changte a awm thin. Chung hun chu a ni, kan rinna fiaha a awm hun chu!

Harsatna i tawk em? I lungngai em? Buaina i nei em? Pathian hnenah thlen rawh. Malsawmnaa min vur a, hlimna min thlentu Pathian tho kha a ni, mangan laia Pathian chu! A va tha tak em! Ka sawi chhuak thiam lo.

A ngaithla ve duh chuan (link dah dan hi ka thiam vak lova, a download na tur ka rawn dah mai) http://m.vuclip.com/w?cid=40412738&sn=1&sn=1 ah hian lo en ve teh u.

Monday, February 21, 2011

Nui ila!

Fiamthu, ka nuih tiza tu, hmun hrang hranga ka chhiar.

1) Second Term exam zawhna har:
A) Sawtah sawn ka kal dawn a. Engtia hla nge?
B) Zirtawpni lem ziak la,rawng senin chei rawh.
C) Nitin Hmar lam panin 5km/h mi pakhat hi a tlan ziah a. Chupa hming chu tuge?
D) Sava hming i hriat loh loh 5 ziak rawh.
E) Konga i kal laiin Savom i tawk thut mai a, a nu ge a pa?

2) Sardar's dad died and he was crying. After 2 minutes Sardar cried louder.

Friend: What happened now?

Sardar: My sister just called me. Her dad also died.

3) Zirtirtu : Davida thah tumtu kha tunge?
Naupang : Saula
Zirtirtu : Mark nga
Naupang : Paula an tih bawk kha
Zirtirtu : Mark bial

4) -Isua pian laia Jerusalem-a lal kha tunge?

-Lala

-'He' th poh a tel kha

-Lal He-a

-'Ro' th poh

-Lal Hero-a

-'Da' tih poh a tel leh kha

-DAVIDAAA

5) Isua hun laia zu ngawlvei pakhat piangthar ve pawh khan Isua kha a zui ve a, tlai lam dar 4 velah,
' Zirtirtu, timing leh tawh viau ni, tipun leh tawh mai chi' ti vei su su.

6) Our friendship means a lot 2 me, U cry,I cry,U laugh..I laugh,U jump out of the window..I look down and then..I laugh again.

7) Wen a man holds woman's hand
b4 marriage..
no doubt its ''lOve''

&

After marriage unfortunetly its.. ''self defence''

8) Tu pa emaw ni kha a
han zei lo mai mai khawp
a, Thlawhna atangin
Parachute-in a zuang thla
a, khawvel a tum thelh.

9) Serkhan naupang pakhat
cu an zirtirtu pa
in ,”Tumhara naam kya hai?''
tiin a zawt a, chu naupang
chu a rawn ding a, a lu hiah
nuah2 pahin ''tumhaaaraaa
naaammm…..'' a rawn ti.

10) Zurui pakhat hian taxi alo phar ding a....

- i hman em?

Driver : hman e.

Zurui: a nih chuan lo chhuak lawk la, lam ila.

Mizote hi!

''Mizote hi hnam naupang kan ni.'' tiin thusawitu tam tak in an sawi thin a, a dik na chen pawh a awm awm e. Zir mite chuan kan hmanlai chanchin pawh hi Hnam pui zawkte Modern history nena inrual thuakin an sawi thin. Kan hnam a naupang kan tih lai hian hnam thang chak tak erawh kan ni lawi a. Kan khawsak phung, incheina leh thiamna lamah pawh chak takin hma kan sawn chho zel a, hei hi thil lawmawm tak a nih rual hian ka Pachuau rilru kaptu erawh a kuh ve tul thung a. I han chai dawn teh ang.

Kan pi leh pute kha thangtharten kan hriat dan chuan Hnam huaisen leh rinawm, tlawmngaihna chaw a hrai len an ni a. An khawsak phung changkang teh lua lo mah se an intodelh a, khawtlang an inlungrualin an inhmangaih a. Dikna hian an nunah hmun a chang thuk em em thin. Khua leh khua inrun thinin, 'Mi lu la hnam' tia hriat hial ni mah se, an nun laimu erawh kha chu a duhawm thlawt a ni.

Hun alo kal zel a, an thlah kalzelte hian kan pi leh pute chu kan ang ta lo hle mai. Khawvel changkang chho zelin min rawn run a, khawvel hnam dangte hriat kan hlawh hnu phei hi chuan danglam tak kan ni ta! Kan nunphung a danglama, kan duhzawng a danglam a, chumi rual chiah chuan kan pi leh pute nuna hmun chang pha reng reng lo, a kila inthlahrung taka awm thin 'Hlemhletna' chuan min rawn bel chat a. Kan thinlung hmun lailum ber chuhin min chenchilh ta.

Kawngka thingfaka do mai thin khan tala lian ber ber kan hmang ta a, chuti chung chuan kan ngaih a ngam chuang lova. ''Sem sem dam dam; ei bil thi thi'' tih changthlan thintute thlahte chuan ''Sem sem tam tam; ei bil puar puar'' tiin kan theih ang angin kan inchhekarbawm tan ta bawk a. Kan hnam rohlu leh thuamte chu 'Thing' tia hnuchhawnin khawvel hnam dangte 'kalchar' chu kan 'kalchar' a chang zova, kan nun a lo chiri zo ta.

Thalaite nunah hnam hmangaihna rilru a awm tawh lova, min thlahtute hla ril leh tha tak takte chu hnualsuatin khawthlang leh khawchhak mite thu leh hlain kan lung a len zawk ta hial mai. Kan khawpui Aizawl kawtthlerte khi han fang ila, hmuntinah thawhchhuah nei lem lova inla changkang satliah, han en mai chuan Hollywood star emaw tih mai tur an ther fer fur ta mai! Korean mipa sam sei rualin kan mipate sam a sei a, Avril sam tial rualin kan nulate sam pawh a rang ruai nghal ta zel mai bawk. Nitinin kan hnam nun a dal tial tial a, hnamdang nun kan lalut tial tial thung.

Chimral kan hlau maw? Keimahni pawh hian kan ral tan der chu a nih hi! Mi hrang Vanapa te, Taitesena te, Khuangcherate leh midangten thih tha tak meuhva an lo humhalh rama chengte hian hnam dang chimral ngai miah lovin keimahni ngeiin kan hnam nun kan pawlh dal a, ral lam kan pan mek asin!

Kan khawpuiah hian Mizo hre ngai miah loin min hmu ta sela, a khawi laiah hian nge Mizo a hmuh tak ang le? Kan hmelah chauh hian em ni Mizo kan nih tak? Khawnge Mizo kan nihna lai, hnam dang laka kan hran bikna lai chu? Vai ramah chuan han kal ila, keini aia changkang, keini aia hausa, keini aia fing zawkte pawh hian an hnam incheia incheiin an zahpui hauh lo nia! Hawh u, keini pawhin kan hnam nun hi i chawisang leh teh ang u. Kan hnam puan mawi tak takte hi i chawisang thar leh ang u. Mahni tu leh fate hnenah theuh Mizo hnam hmangaihna rilru tuh thar leh ila, Zoram nuam i han siam leh teh ang u khai!

NB: He ka thil ziah avang hian Mizo hnam hi a chhe ta duai tihna a ni lova. Mi fel tak tak an la tam a ni tih hriat tur. Thahnem ngaih luatah infuih nan ka rawn au chhuah pui a ni e.
''Zoram hi nang leh keia ram a ni a. Nang leh Kei hi Mizo kan ni. I harh ang u!''

Tuesday, February 1, 2011

Kan sikul ve kha aw!

Khawnge, tùn tum chu ka nuna hmun pawimawh em em mai, engtik lai maha ka theihnghilh theih tawh loh tùr, ka nuna hun pawimawh lai tak, he khawvèl nundan ka zir chhohna hmun chungchang hi ka rawn puah pui ve phawng phawng mai teh ang. Tu pawi mah kan sawi ém lovang chu maw?

Kum 12 dawn a ni ta, kha hmun ka chhuahsan ni kha! Ka la hre reng thin. Zirtirtu, naupang leh nu leh pa kan inhmukhàwm a, Krismàs leh Kumthar vuakvet bàka sa ei ngai reng reng lo khan vawksa leh sawhchiar kan han hmawm mawm hmak hmak a nih kha! Intithei takin kan han vei kual a, kan naute rual ho hnenah engtik lai maha kan pek phal ngai loh marble kan han sem vel a. Khatia kan thilphal ta thut kha thil mak a ni lèm lo. Middle Sikul naupang kan ni tawh dawn miau a.

Kan sikul kha a hmunhma thu ah te, a building thu ah te chuan han chhuan vak nachhan tùr a awm lèm lo, Sawrkar sikul naran ve mai a ni. Mahse, kha sikul kha zirna ka dawn hmasak berna hmun a nih avàng leh tùna ka dinhmun thleng tura rahbi ka rah hmasak berna anih avàngin a hlu a ni. Sikul hi ka kal hma a, kum 4 ka tlin hma in ka lut a. Sikul ka han kal ve chu le, ka nu leh pate chauh an buai lo, kan zirtute pawh an buai a ni. Kan pàwlah ka tè fàl nalh a, ka tahbelh bawk nèn, nitin ka muhil puak ka ngai ziah bawk si. Kan zirtirtu te kha an buai ngawt hian ka ring thin.

Sikul ka han kal ve chu nuam hi ka ti khawp a, thawhtan alo ni a, dar alo ri chiah, ring mangkhengin ”Luhkhaawwm” kan han ti a, Pawl 2 room-ah kan lùt hum hum a. Kan zirtirtunu Madam Pi Chhuangin Bible thawnthu min hrilh thin a, ngaihnawm ti takin kan ngaithla thin. Khang a thu min hrilh thinte tùn thlenga ka nun kaihruaitu ala ni reng thin a. Tam tak chu ka la hria a ni. Entirnan, ”Goliatha chuan inchung chen hial mah se; Pathian a rin loh avàngin Davida lakah a tlàwm ta a ni” tih ang te.

Madam Pi Chhuangi hi kan ngaisàng thei em em a, miin, ” Tunge in zirtirtute zìngah fel ber?” an tih pawhin, ”E le, madam Pi Chhuangi le, Pathian a ring tlat a!” kan ti thin.

Thawhlehni alo thleng a, Fai enni a ni a, dar rik hma hi chuan kan ngaih a ngam viau thin. Mahse, Madam Pi Awmawiin uluk tak maia kan beng, kut tin, kawr leh kekawr a rawn endik meuh hi chuan kan thil tihsual kan hrechhuak ziah thin a. Mahse, a tlai tawh thin. Sikul naupang zawng zawng hmaa bualfai kan tawk leh nge nge thin!

Nilaini alo thlen hi chuan kan huphurh em em mai thin a, a chhan chu Head Teacher Pu Khuallùnan ‘Hmun’ min zawhni a nih vàng a ni! Ka thiam lo ziah bawk! Zirlai dang thiam zung zung in, ” Ti ti ik ik, ka baw-ar khuan màwi bera chuan…” ti zawt zawt thin mah ila, ‘Hmun’ kher hi chu zu han thiam thei tlat lova!

Zirtàwpni alo thlen chuan chawhnu-ah games kan nei ta thin a. Tin vaw ring thei ber nih hi ka tum tang tang thin. Sikul bàn mawlh mai kha! Kan va nghakhlel thei tak em! Bàn dàr a ri chiah hi kawr kan phelh sawk sawk a, iptepui ah kan hnawh lùt a, pheikhawk leh mawza kan hnawh leh chuan a puar tha tawh hle thin a.
Tichuan le, kawr pawh ha lovin, ke làwng ngat lehnghalin, iptepui kan han ak te taw a, scale, thinga suih kha kan han phawrh chhuak a, lu chunga vai pahin kan ”AKSHAAAAAY” haw liah liah mai thin a, a hunlai kha chuan nuam ve tak chu a ni.

Kan sikulah khàn in marble perh te, in rubber kahthlak te kha kan uar hle thin a, a thiam lo pawl ka ni ziah lehnghal!

Tumkhat chu, pawl li kan nih laiin DIET atangin zirtirtu training lai an lo kal a, nula pakhat lo kal ve chu, tùnlai tawng takin ka lo ‘star’ alawm maw le! A class làk laiin vawikhat chu dar vaw turin min tir a, dàr awmna kha a sàng si a, a thlang kha a awih deuh hlek a, kei ka lo tè bawk nèn. Vuak tuma dingdihlip meuha ka tan pawh khan ka vaw pha ta lova, a thlangah ka lum thla ta! Vanneihthlak takin ka hliam na lo hlauh.
( Pawl li ka nih lai hian ka height : 119 cm leh weight : 21 kg chauh ka ni. Kum 8 ka ni bawk.)

Tin, Middle sikul naupang, an zirtirtu ten an hrem lo han chhaih te kha kan ching a, a tukleha kan chan erawh kha chu chau ve tak a ni. Kan tap haw ngei ngei!

Ruahsùr chàngte mawlh kha a va nuam thei tak e aw! Kan sikul chhuat te kha cement chhuat ni ve hek lo, a chung alo tha vak bawk lo nen, a diak kawi pùr mai thin a. Chu chu mipaho lawmah a tla a, hmeichheho hmuha han tleng vel tum khàn kan hmanhlel ta thin a. Kawr vàra chirhdiak kai sùkfai kha hna hautak tak a ni si a, nute hauh kan tawk leh nge nge thin.!

Hetiang vel hi kan sikul kha ni mah se, kan zirtirtute inpékna kha tùn hnua ka ngaihtuah leh hian ka fak mawlh mawlh thin. Zirna ngawr ngawr bakah Madam Pi Chhuangi te, Madam Pi Rini tehoin awmdan màwi min hrilh thinte a lo hlut zia ka hre nawn awn awn thin. Kan zir thin heng, ”Hei hi Chawngzawng a ni, chaw a zawng thin a ni.” ”Kawlhawk thau a tha hle.” ”Bei la bei nawn rawh.” ” Dick-a leh a zawhte.” tih mai piah lamah khàn nungchang màwi te, mihring kan niha kan mawhphurhna te, aia upa zahte leh thildang tam tak min zirtir a. Heng hi damchhung pawhin ka rul let zo dawn lo.
An chungah làwmthu ka sawi mawlh mawlh e.

Hmannia ka han kal leh chuan building tha pui mai, RCC in an lo sa tawh a, zirtirtu te erawh a tam zawk chu a ngai an lo la ni a, Madam Pi Rini erawh a chatuan hmunah alo haw tawh a. Lung a lèng duh khawp mai.

He kan sikul, ka chhuan em em, Primary School Leaving Certificate Examinationa dinhmun sang taka min hlangkaitu hi Chaltlang Primary School III a ni e. A thawktu leh zirlaite ka duhsakna sang ber ka hlan e

Chenna ngai loh ram fan thu. Part 2

Darkar khat a ral chuan ka mi nghahte pawh an rawn thleng ta! Kan inchibai a, anni kal thang tih takah engkim tihfel ngai an rawn tifel zung zung a, kei chinchang engmah hre lo tan chuan thlamuan thlak tak a ni. Chutia buaipui tur ang ang kan buaipui zawh chuan pawn lamah kan chhuak ta a.

Pawn lamah chuan mihring hi an lo tam khawp a, an vei nuai nuai mai a, kan rama ka la hmuh ngai reng reng loh Choak alo thlawk kual sup sup a, kawngsir tawn tawnah chuan Ashoka thing alo ding tlar thut bawk a. Mahse chung zawng zawng chu mak ti hman emaw, mawi ti hman emaw ka ni lo. Kan chuanna taxi tur zawn a ngai!

Airport chhungah khan taxi ticket kan cut lawk a, taxi stand a a number mil va zawn a, chuan mai tur kha a ni a. Mahse an taxi number min pek chu kan hmu ta tlat lo. Taxi tam tak ding tlar thut zinga kan taxi number zawn ber kher chu awm lo zawn ang vela vang a ni. A tawp a tawpah chuan taxi number kan va thlak tir a, kan tum ram kan pan thei ta.

Kan tum ram ka ti tak na a, ‘An tum ram’ a ni ber ang chu. Ka tan chuan chu khua chu chawlhlawkna chauh a ni. A tukah zinkawng thui tak zawh tur ka la nei si a. Taxi a kan chuan lai chuan Pu Hmuihmula (Pu Muantea hi Pu Hmuihmula kan ti mai thin a, ani mi puitling tih takah a haw lem lo bawk a, ka hmang chhunzawm zel mai ang.) chuan ka zirna chungchangte, kan chhungkaw dinhmun te min zawt a. Thlaphang lo tur leh inthlahrung hauh lo turin min ti bawk a. A chungah pawh ka lawm hle a ni.

Tichuan Kolkata kawtthler tawt takah chuan Mercedez nilovin Ambassdor hlui ve tawh takah chuan kan sawt ve bauh bauh a, motor veivak reng reng chu an hmanhmawh em em vek ni mai hian ka hria a. Horn a ri ruai ruai reng a, kan driver pawh chuan tul hlei lovah a hmet pit ve reng bawk a. A hmel chu ka en chiang a, kan tet laia kan en thin ‘Mithun’ kha ang hle in ka hre rohva.

Tichuan tlai lam fe tawhah kan thlen tumna Salt Lake Mizoram House chu kan thleng ve ta hlawl a. Vai pakhat hian min lo lawm hlut a, Mizo Tawng lah chu a hnehsawh phian! Pu Hmuihmulate chuan engkim an tihfel hnu chuan kan room tur lam kan pan ta a. Dorm vela riah inring khan inchung lamah min chhohpui a, room nuam tak mai, thengthaw tha tak, air conditioned ngat lehnghalah min thlentir ta a nih chu! Khatih laia ka lawmzia kha leimi tawng hian a hrilhfiah seng lo. Ka lawm a ni. An thatna hi Lalpan a let tam taka la thungrulh ka duhsakin beisei pui hle mai.

Kan room chu ka han enkual a, engkim mai chu uluk taka enkawl tih hriat takin a fel thlap mai. Bathroom atang chuan hnaitea Salt Lake Stadium ropui lo ngir khup chu thlir pahin Mizoramin Stadium Puitling kan neih ve hun turte ka suangtuah neuh neuh va. Amri Hospital pawh hla lo teah alo ding ve bawk a. Heng hmun Mizoram ka awm laia a kal tawh ten an sawi thin a taka ka hmu ve ta mai chu vannei ka inti takzet a ni.
Tichuan kan indah fel a, kan han insil thlandaih hnu chuan Big Bazaar lam kan va hrut ve zuai a, kan fankual hrep hnu chuan lei tur ka hriat thlawt loh avangin Sahbawn paruk ka lei!

A tuk zingah chuan dar 9 a thlawhna nan hman ngei tumin House chu ka chhuahsan leh ta a. Pu Hmuihmula te pawh ka mangtha hnu chuan Kei valrianga hi kawrvai zingah ka maltlat leh ta.

Airportah chuan tihdan engkim Pu Hmuihmula ten min hrilh tawh avangin leh Lengpuia ka experience atang khan inla ‘confi’ takin ka che vel zat zat a. Min lo thlir rengtu awm se chuan James Bond lemchang emaw tih pawh a awl khawp ang! Mahse, chutia inring tawk taka ka chetvel lai chuan ka chebuai ta. Boarding card ka la zo chuan kal leh zelna tur ka hre ta lo! Ka u Mami, Mapuii Sam Siamnaa thawk kha ka va phone, ani chuan ”Zig-zag ah khan kal rawh” a rawn ti! Ka la buai cheu, zig-zag awm reng reng ka hmu lo! Rei fe ka zawn kual hnuah ka va hmu chu ka thaw huai mai!

Thlamuang taka thlawhna nghaka ka thut dar dar lai chuan ka piah lawkah chuan kan thiannu pakhat Patna lama MBBS zir ve tur tho hi a ni nen an lo thu ve reng mai a. Kan inhmu chu mak kan ti ve hle a. A ni (aunt) chu vai ram lokal fo tawh leh chinchang hre ve tawh tak mai a ni a. Kan thlawhna tur chenin a lo inang a. Mak ka tiin Pathianin min kaihruai tura a ruat a nih dawn hi ka ti rilru a.

Kan thlawhna tur chu darkar 1 zet an delay hnuah a inpeih ve ta. Aurinna hian “seat number chuti zat hmalam zawng chu a hmalam kawngkhara luh tur a ni a, a dang zawng chu a hnung lama luh tur a ni.” an rawn ti talh talh reng a. Heti chung hian vai thenkhat chuhhelh lutuk a hmalama luh lo va tum thawt thawt, a hnung lama an rawn thawnphei leh tak an awm nual tho nia!

Kan thlawhna chu Indigo thlawhna lianpui mai hi a ni a. Ka luh dawn chuan kawngkhar bul hnuai lam chu ka bih hram a, ‘Airbus 360′ tih a lo inziak a. Hetah zet chuan Air Hostess pawh kawr pawl nalh tak ha in, pian nalh tak tak, zei tak tak an lo ni ta! Mi pawh 180 lai kan leng a. Air India thlawhna nen chuan kar a hla kher mai. Ka bula vai pakhat chuan ”China atanga lokal em ni i nih?” a ti sek a. Vawi tam ka chhan hnu pawha min la zawh sek avangin ka ning lutuk chuan ka thlek vang vang a, alo dum kher em bawk a, “Cameroon atangin ami lokal?” ka ti let ve sak a. Kawng tluanin min be leh ta lo!

Tichuan Darkar 2 vel zen zawn kan thlawh hnu chuan Lucknow khawpuiah kan tum ve hlawl a. Patna a kan chawlh tih loh kha chu kawng lakah kan chawl lo. Airport atanga ka chhuak chiah chu tlangval pakhat ngo veng vawng hian min lo hmuak a, ka senior tur alo ni a. Ani nen chuan inlungrual takin Bus-in Kanpur lam panin kan insawh phei ta bauh bauh a.

Chenna ngai loh ram fan thu. Part 1

Tun tum chu chenna ngai loh ram Kanpur pana ka zinkawng chanchin ka han hlui teh ang che u.

Vanneihthlak takin kum 2010 Technical Entrance Exam kha ka inziak tling ve hlauh mai a, kan chhungkua pawh kan lawm ve dar dar hle. A bikin midang aiin kan lawm fal emaw tih mai pawh awl tak a ni. A chhan chu exam pawh tum lem lo, college kal chunga coaching pawh kar hnih emaw vel lek kal chunga ka tlin ve mial vang a ni.

Tin, eng eng emaw buaina avanga result vawi thum lai mai tar nawn hnuah leh hlauthawng thinphu dep depa awm hnua tling chho zinga ka tel vang a ni bawk. Tichuan le, councelling te kan han nei a, GSVM Medical College, Kanpur chu ka zirna tur atan intithei takin ka thlang ve ta luah mai a nih chu!

Rei tawk fang kan nghah hnuah Allotment letter a rawn thleng ta hlawl a, kal thei dinhmuna ding ka ni ta reng mai. Khatih laia rilru a nawm zìa kha aw! Thiante leh chhungte tlawh kual khan ka hmanhlel a. Inah pawh ka awm khat hle a ni. Tihfel ngai kan tihzawh thawkhat hnu tlai khat ka leng haw chu ka piin, ”Insiam rawh, naktukah i kal dawn.” a ti ta mai. Ka bangboin ka buai ta khawp mai a, zankhua pawh khan ka insiam zo thei dawn lo emaw tih hnuah ka zo ve ta hram a.

A tuk zingah chuan inthlahna te kan neih zawh chuan kan chhuak tan ta. Thil engkim mai chu rinloh leh beisei loh dan deuhvin a thleng ta zel mai. Kawngpui kan chhuak chho chu Santro car nalh deuh mai hian min lo nghak a, a hma pawha ka la hriat ngai reng reng loh ka cousin te kha a driver a lo nia. Ka la hriat ngai reng reng loh ka pi teho an lo thu fur mai a. Kan han inchibai leh hnuhnawh a, kan chhuak tan ta a.

Bus station lam min panpui ang chu tih nak alaiin Lengpui lamah kan liamthla ta vut vut mai a. Ka mangang hman dawn viau a, mahse ka hriat lohvin chhung leh khatten thlawhtheihnaa min chuan tir an lo tum chu niin! Ka thil tawn chu mak ka ti ta tulh tulh mai. ( Ka chhungte khan min surprise tum vang hrim hrimin ka hriat lohvin engkim an lo ruahman lawk vek a ni.)

Tluang takin Lengpui Airport kan thleng thla ta a, inla confi takin trolley-ah ka bungrua ka han dah a. Chenna ngai loh ram ka fang tan dawn ta! Airport Terminal ka han lut chu ka bo angreng hle a, mahse sign chhiar nachang ka hre hlauh va, ka mualpho lo hram hram a ni.
Engtin tin emaw ka invai kaw chhova, ka bungrua an check ta! Ka bag ah khan mamawh takin tiin chemte te, Lighter te ka lo pai si! Khang kha thlawhna ah an lo phal awzawng lo chu niin! A thawktu ten zaidam takin min hrilhfiah a, ka vawikhatna a nih vang leh chinchang ka hriat loh vang a nih thu ka hrilh ve luam a.

Darkar chanve vel kan thu ta tihin kan thlawhna tur Air India thlawhna chu alo tum ta ruau mai , ka helhhawlh tan ta! Khaw lum karah khan vawt tih vang ni miah lovin ka khur nia! Thlawhna chhung kan han lut chu ka rinai daihin alo te a, air hostess chhe lo leh zei tak takin min lo chhawn ang chu tih nak alaiin vai nu upat hmel deuh deuh, thau deuh deuh hlir an lo awm ta mai si. A nuihzatthlak duhin a hrilhhaithlak letling zawk hle a ni.

Tichuan le, seat belt hren dan etc chu ka bula mite tihdan ka entawn ve zel a, ka buai em em bik lo. A chuang tur ang ang kan chuan fel hnu chuan kan thlawk tan dawn ta a, chak tak maiin a tlan a, a thlawk tan chiah chu ka insep dawrh mai a, thinphu a rang a, ka au chhuak teuh kher mai. Mitkhapkar lovah chhum chungah kan awm ta. Lei lam ka zuk thlir a, Mizoram pelin vai ramah, hmelhriat pakhatmah awm loh na panin ka kal a ni tih ka inngaihtuah chhuak a. Ka lung a chhe kher mai.

Darkar 1 tling lo deuh kan thlawh hnu chuan Kolkata Airport kan thleng ta a. Engkim hi alo danglam khawp mai a, ka chuanpuite tihdan chu ka en ve zel a, ka bo em em bik lo. Lengpuiah khan Pu Lungmuana (MP hlui Pu Zawma nau) hi a fanu MBBS zir ve tur tho hi keini aia darkar khata tlaiah Kingfisher thlawhna in an rawn thlawk ve dawn a. Ka chhungte nen keimah min kaihruai turin a hma daihin an lo inbia a ni awm a. Airport-ah khan min hrilh chawp a, hmuh erawh kan inhmu hman ta lova. Ka bungruate ka lakfel zawh chuan anni chhungkua nghak chuan keimahin ka lo thu ta ngar ngar a.

Airport Terminal-ah chuan mihring hi an lo tam khawp mai a, an vei nuai nuai mai a, hmelhriat hmuh tumin ka mit ka len ruai a, mahse, an vang kher mai. Ka bulah hian Meitei nu ni awm tak hi a thu ve a, a phun leh niah niah thin a. Tawng lah chu kan inhre tawn der mai si lova. Kan innuih leh ringawt mai thin. Ka ning em em mai a, ka kalsawn ngam bawk si lo, thlawhna lo thleng an puan apiangin ka beng ka lo chhi tang hru zel a, chutia ka awm chu chatuan tluka rei ni hialin ka hria

I Tlai Ange!

A tirin

Thla ral lam lek lek tawh kawlkila inkhai nul nul chu ka thlir a, thli a thaw heuh heuh va. Kan awmna atang chuan Aizawl inpharh duai mai chu a lang chiangin electric eng ah chuan a lang mawi kher mai. “Ti rawh le, in ila” tih pahin ka thianpa chuan a zu thlit chhuah sa chu min rawn pe a. Chutia kan in lai chuan kawl a rawn phe zuai zuai a.

Thawk leh khatah van boruak zau taka arsi phe neuh neuhte chu chhum dum chhah takin a rawn hliah nghal tuam tuam a. Ruah mal a tla nghal phuar phuar a.

Ka no chu ka tlak pap a, ruah a sur tam hmaa in thlen hman ngei tumin ka bike chu ka tlawh rum vat vat a. Ramhuai speed diktakin kan leu phei ta ziai ziai mai le.


Beiseiloh chhiatna

Ruah mal tla phuar phuar karah chuan kan tlan zel a, ka thil in a rawn thawk tan ta bawk a, a hnunga chuang ka thianpa nen chuan ring mangkhengin bike khalh ka hnehsawh zia leh Mizoram kawngah na na na chuan Rossi pawh ka huphurh bik loh zia kan sawi phei lang lang a.

Tichuan le, Zemabawk kan pel phei dawn ta maw tihah khan kawng kawi kan pel dawn chiah tihin truck lian pui mai alo lang ta ruau mai le! Kan inhnaih tawh em avangin han kawi lehna hun pawh a awm lo. A ri bur a, a thim nghal mup a, engmah ka hre zui ta lo.


Ka Thi!!

Ka han harhchhuah leh chuan kawnglaiah ka lo mu a. Ka tho thuai a, ka in dap vel a, na sawi tur reng reng nei lo.

Ka piah lawkah chuan mi an bawr luih luih a, a thenin “An rui a nih hi.” an rawn ti lawng lawng a. Damdawiin te pawh an sawi ri nawk nawk a. Kei chuan, “Ka tha e, damdawiin kal ka ngai love.” tih pahin ka va fin ve nghal a. Mahse tumah ka tawng hre awm pawhin an awm lova, min ngaihsak awm reng reng tumah an awm lo.

Chutia min ngaihven loh em avang chuan ka lungni lo hle mai a. Enge an en chu hriat chian tumin ka mi kara luh chu ka han tum a. Mahse, mak tak maiin tumah tibuai lovin ka kal tlang ta purh mai! Hual chhungah chuan mi pakhat alo let reng a, a hmel chu hmuh tlak loh khawpin thisenin a bual a, tlangval pahnih hian thawk tir tumin a awmah te an nem a, an bei lauh lauh a.

Chupa chu ka han enchiang a, keimah ka ni tlat mai! A ni thei lo. Kei chu hetah ka ding reng alawm, engtin nge ka nih theih tehlul ang….Ka harhchhuak ta! Khu khu keimah a nih chuan kei…kei…kei chu THLARAU!! Ka han hawi vel a, tumah reng reng chu min hmu awm pawhin an awm lova, ka awm ve tih pawh an hre hel lo. Ka bula mi chu khawih ka han tum a, ka khawih thei ta reng reng lo mai! Tah zet chuan a chiang ta! Ka thi! Ka thi tawh!!


Thihhnu khawvel

Chutia ka thi tih ka inhriat chuan ka mangang ta em em mai a, ka damlaia ka thil tihsual tam tak te kha a rawn lang nghal uai uai a, hlauin ka khur chhe zo ta!

Ka dam ve lai kha chuan a tui tha tha eiin, thawmhnaw man to leh mawi ber ber inbelin, chapo takin ka leng vel thin kha a ni a. Kei aia rethei leh hnuaihnung zawkte ka hmusit thei em em a, ka thalai puite inkhawm tura an kal laiin kei ve kha chu khaw pawnah nulate nena lenho pahin inkhawm ho ka ngaihsan bik loh zia leh kawra hmang mai an nih ziate hahipin ka lo sawi thin a nih kha!

Zu leh ruihtheih thilah ka tlan nasain nula lamah phei kha chuan ka duailo hle thin! Sum leh pai ka tlakchham ngai loh avanga min ngaizawng der tute kha engzat fakau nge mipat hmeichhiatna ka lo hmanpui lah ka hre seng lo. Siamtu pawh zah zo lova nupa inkar chauhva hman tura duan kha kei chuan nawmchenna satliah mai maiah ka lo ngai thin te kha a ni si a aw!

Tunah inchhir mah ila simna hun ka nei tawh si lo, ka dam lai khan vawi khat tal pawh ka nundan enletin inchhira sim nachang lo hria ni ila, tunah a sawt tawh si lo, ka ti vawng vawng a.


Tlai luat hian pawina a nei

Chutih lai chuan Aw hian, “Inchhir a sawt tawh lo. I dam laiin kha leh chen hun i nei a, tunah chuan i tlai ta!” a ti a. Kei chuan ring takin, ”A la tlai lo! A la tlai lo!” tiin ka au vak vak a.

Chutih lai chuan ka chal a ri fawk a, ka nu hian, “Zanlaiah au vak vak zel suh, kha i puan sin pawh a tlak leh vek tawh kha.” a rawn ti a. Ka mumang a lo ni reng a.

Ka thalai puite u, in thatlaiin Siamtu hrereng ula, a tlai hma hian inngaihtuah chiang rawh le!