Kei Leh Ka Tarmit (Tarmit Thawnthu) - II

Ka tarmit chu kum 2 zet ka vuah ve ta a. A tirah chuan ning hle mah ila a tul miau avangin ka vuah lui zel a. Khawlum avanga tawlh tih mai mai te pawisa lovin inkhelhna ah pawh ka vuah ta zel a. Mak deuh mai chu ball in a per fuh viau a nih loh chuan a tla mai mai lo a ni. Thiante pawn mak an ti in ball ka head zawnga a tla miah lo te an sawi duh hle thin.

Pawl 9 ka zir tum hian hostel ah ka awm a. Dorm-a kan infiam laiin khum bula ka tar chu an nek tla palh a, chutah an la rap zui lehnghal a. A bung ta hmawk mai a. Ka chhungte ka hrilh ngam tawh si lo, vuah lovin ka awm thei tawh bawk si lova. Cello-tape in ka char khawng bur a, chu chu thiante fiamthu thawhna a chang zui a, min fiam laih laih thin.

Chumi hnu chuan tumkhat chu basketball kan khelh laiin ka thlauh leh pek a. Char theih lek lohvin hmun thum ah a bung ta mai a. Chumi tum pawh chuan ka chhungte ka hrilh ngam lehpek lova. Kan dorm a tarmit bial pup, tuma vuah duh loh let reng chu ka vuah ta ringawt a. A power lah chu a tamin ka mil lo nasa mai a. Mahse, duhthlan tur dang ka neih loh vang leh vuah loh aia ka hmuh fiah zawk miau avangin ka vuah ta reng a. A bial lian si a, Gandhi-a tarmit min tihsak a, hming thar ka nei leh ta. Thangthar Gandhi-a. [Thian ho zinga sawisak nasat leh chhaih hlawh pawl hi ka ni ve hrim hrim a. Ka haw ngai lem hlei lova. Engemaw hlek ah chhaih hi ka tawk ngun em em a ni. :)]

Gandhi-a tarmit chu rei fe ka vuah hnuin ka nu in a lo hria a. Warden dilin kan inentir a, a hmaa -0.75 vuah thin khan -1.75 ka vuah a ngai ta dawrh mai a nih chu! Chumi tuma a kaisang dawrh mai chu mak ka tiin Gandhi-a tarmit vangah ka puh a, hostel thlang huanah ka paih vang vang! Chumi kum chuan Dilmawi ah picnic kan nei a, tuichenna a ka tarmit vuah chu a lar leh hle bawk. [Mi hmufiah thei lo ve te.]

Hun a kal zel a, ka tarmit power pawh a tam chho tial tial a. Inkhelh ka hrat si a, tarmit tello chuan mi hmel ka hmuh chian theih loh avangin ka vuah zel a. Chuti lo chuan lehlam pawl te ka lo pass leh mai thin. Ka tarmit chu ka tan a hlu in ka thian tha ber ka ti lo thei lo. Mut lai leh chaw ei lai tih loh chuan ka hmaiah hian a awm chawt ringawt mai a ni.

Pawl 12 ka pass hlim hian ka inentir leh a, chumi tum chuan -3.75 ah a kaisang leh ta! Ka tarmit power a pung zel hi mak ka tiin heti khawpa ka bun regu chung pawha a pung zel mai hi hriatthiam a har ka ti ngawt mai. Hemi kum hian thianten Technical Entrance an exam sup sup laiin kei chu PUC ah B.Sc (Chemistry Hons.) ka zir daih a. Civil Service lam ka tum avangin ka exam buai peih lo a ni. Chutia B.Sc kum chanve dawn ka kal hnu chuan ka inentir leh a, hemi tuma Doctor khawsa zia leh min en dan chu ka duhkhawp lo em em mai a, ka thin a rim bawk a. [Sawi thui lo mai ila.]

Ka rilru in, "Eee, hei chu doctor awm dan tur a ni lo. Kei ngei hian ka zir ang a, doctor tha tak, mi rethei thleng phak doctor ka ni tur a ni." ka ti a. B.Sc pawh chu zir chhunzawm lovin Entrance Exam atan ka inbuatsaih ta ngut ngut a, a kum leh exam a lo hun chuan vanneihthlak tak maiin ka tling ve hlauh a nih chu! Tichuan, ka mit chhiat vangin, ka tarmit vangin tuna ka zirlai hi ka zir ti ila a dik na chen a awm awm e.

Ka tarmit hi ka tan chuan a hlu a. Engtik lai pawhin ka kiangah awmin, zahzela han khawih zauh tur in a awm reng a, mi harhvang ngang ka nih avanga ka tihchhiat chang pawhin tarmit dang a rawn thleng leh thuai a. Tarmit tellovin rei ka awm ngai lo. Tumkhat chu Udaipur kan zin dawnin Lucknow a kan thiante kan sawm kawi a. Ka thianpa RC-a room a ka inbual zo ka inhruk mawlh mawlh laiin khumah ka'n thu ngawt mai a leh.....!

A ri rup a, ka en nak chuan ka tarmit chu a lo bung rum. Nuih za bawk si; thinrim bawk si in keimah leh keimah chu ka inhau a. Ka thianpa hmela nuihza insum hmel kha ka theihnghilh thei lo. Ka tihngaihna hre lovin lei te ka chhuah khum thul! Siam ngaihna ngang a awm loh avangin thianpa Rinchhana nen tarmit dawrah kan va kal a, tuna ka vuah mek tarmit nalh tak mai hi Rs 200 in kan va lei a. Chu chu tarmit ka thlak hnuhnun ber a ni ta rih a ni.

Awle, ka tarmit hi ka tan a hlu em em a. He a puala thuziak pawh hi thenkhat tan ho viau mah se a puh ve nia ka hriat avangin ka han chhawpchhuak ve rawi a ni e. "Aw tarmit! Vanlaltarmit. Ka tan i va hlu em! I tana ka tih theih tawk i chanchin ka ziah lai pawhin nang chu ka benga uai tangin i awm ve reng a. I chungchang a ni tih lah i hre ve der si lo. Aw tarmit! Vanlaltarmit." tiin ka tarmit chu ka hrufai hliau hliau a.