A Tlai Zo Ta - II

Rang takin ka insiam sawk sawk a, kan khaw lam panin ka inkhalh chhuak ta chuk chuk a. Kan khua ka thlen chuan khua a thim tawh a. Tawi khawmuang lovin Ramtei te in lam ka pan nghal a. Ka va thlen chuan mi an lo zi nuai nuai a, Ramtei ka hmuh mai loh avangin khualkhua atanga inneihna hmang tura lo zin an chhungte leh khawtual mi inneihna atana pawimawh ngaihtuaha che suau suau karah ka han saum dil din ve tawp mai a.

Nakinah chuan Ramtei chu room atangin a lo chhuak ta a. Hlim hmel takin amah betu apiang chu a chhawn zel a. Ngun takin ka en reng a, a hmeltha kher mai! Min rawn hmuh veleh min rawn pan ding nghal a, tlan ti tih; kal ti tihin min rawn pan a. Ka bul a lo thlen chuan a ding chawt a, min en a, a mitah mittui a hnam tiam tiam a, ka dara min chum taih pahin, "Engatinge kha leh chen kha i tawm bo? I thian ah min ngai tawh lo em ni?" a ti a. Sawi tur a vang kher mai.

A hmaa ka rilru tawt up up kha a hmel ka hmuh takah chuan vawm bo ang duak hian a bo vek a. Hun fal a neih theih leh theih loh ka zawt a, reilote nghak lawk turin min ti a, tu tu emaw a va biak leh hnu chuan pawnah kan chhuak dun a, an kawmchhak tlanga thlifim thaw heuh heuh karah chuan kan kal dun hnak hnak a, tu mah mah tawng lova rei fe kan kal hnu chuan a rawn tawng chhuak ta a.

- "A mak tiraw? Hun kal chak dan hi."

- Ka chhang lo.

- "Engatinge min rawn biak ngai miah loh?"

- Ka chhang chuang lo.

- "Engatinge i tawng duh miah loh a?"

- Ka la chhang chuang lo.

- "I tawng duh si lova kan let leh mai dawn mi? Tihtur a la tam bawk sia."

Chu veleh ka ding a, a kut ka vuan a, a mitah tak en chungin thawk ka la halh a. Thei leh thei lovin, buh deuh nuaiin, "P..a..sal nn..e.i s..uh." ka ti thei hram a. Mak ti taka min rawn en chungin, "Engah maw? Min lawmpui ve lo em ni?" a ti a. Chhan ka tum zuau a, ka ngawi leh ta zawk a. Ramtei bawk chuan, "Min chhang rawh. Engatinge?" a ti leh a. "Ka hmangaih che." ka ti ta tawl a.

Mak a ti tih ka hria. A kut ka vawn chu a thingthla a, hnung lamah a tawlh kir a, a kuta a hmai hup chungin a tap ta a. Chutih chhung zawng chuan ka che eih lova, ka tawng hek lo. Hun hi a chawl ta emaw ka ti hial a. A bianga mittui luang pawh chu hru hul chuang lovin min rawn panhnai a, rin loh lutukin ka biangah a beng sawk a.

"Engatinge hmanah khan i sawi loh? Engatinge kum kha leh chen kha i zep? Engatinge vawikhat pawh i sawi chhuah loh? Vawikhat tal pawh lo sawi ni la tunah hetiang hian kan awm lo tur. Tunah chuan a tlai tawh. A tlai lutuk tawh." tih pahin ka kawr awmah a man a, min sawi nawk nawk a. Sawi tur ka hre lova, tihtur ka hre hek lo. Ka thinlung chhungril a rum a, ka mawl luat ka tuar mek a ni. Ka kawr a man chu a thlah a, a kuta a mittui hru chungin in lam pan chungin a tlan haw ta a.

Chuta chin chu an inneih ni thlengin kan inhmu lova, kan inbe bawk hek lo. Ka thian tha ber alo nih thin avangin a hun ropui ber chu tel pui ka duh avangin kan khuaah ka la awm a ni. An inneih ni a lo thlen chuan nalh takin ka inchei a, Biak In lam panin ka kal ve ta hnak hnak a.

Biak In ka luh hnu reilote ah chuan Ramtei chu mo thuam famkim nen a lo lut ta a. A nalh zia chu thu in ka sawifiah thiam lo. Ka zawn a lo thlen lai chuan hmana Ramtei kha ka mitthla ah a lo lang a, ka mitah mittui a hnam tiam tiam a. Puithiamin inneihna serh leh sang a buatsaih lai chuan harsa ti takin ka la thu a. Mahse, inneihta thutiam an chham lai chuan ka tlin ta ngang lova, ka chhuahsan ta ringawt a ni.

Pan lam tur hre lova ka din reng lai chuan ka rilru ah hmun pakhat a rawn lang a, kan khaw chung tlang lam panin ka kal ta a. Helai hi hmana Ramtei nen thei kan lawhna thin kha a ni a. Tin, he hmun hi, aw ni e, he hmun ngei hi Ramtein, "Kan la innei dawn nia." a tihna hmun kha a ni. Tlang chung ka thlen chuan ka thu hnawk a, kan khua chiang taka inkham ruah chu thlirin ngui nghiai in ka hmu a. Chutih lai chuan Biak In kawtah chuan inneihna hmangtute chuan thla an la vel mek a, rei tawk fang ka en hnu chuan ka tho a, inah hawngin ka insiam sawk sawk a, ka hnathawhna hmun pan turin Ramtei leh kan khua chu ka tlan liamsan leh ta a.

This isn't the way I plan,

This isn't the way I want,

But, it doesn't matter anymore she's gone,

This could've been a different story,

If I told her before.