A Tlai Zo Ta - I

Ka hnathawhna atanga ka haw chu ka chauh deuh avangin thutthlengah ka thu hnawk a. Tui vawt tak in pahin vawiin a lehkhathawn lo thleng ho ka en zung zung a. Lehkha tam tak zingah chuan pakhat ka mit la deuh tu a awm a, chu chu mawi tak mai a 'Inneih Sawmna' tih inziak chu a ni. Tu tak ni ang maw ti chungin ka hawng a, a chhungah chuan rin loh deuh maiin ka hming hriat than em em mai a chuang ta tlat mai!

Rang takin ka phone ka hmet a, kan khaw lama ka chhungte ka phone nghal a. An mi chhanna atang chuan rinhlelh rual lohvin ka lehkha dawn chu a dik zia nemngheh a ni ta. Ka tek sawkin ka hria a, phone a ka biak pawh chu ngaihsak lovin ka hmet hlum nghal a, ka thu hriat chuan min thawn em avangin ka ngaihtuahna zawng zawng lak bo in a awm a, melh ngai melh reng chungin ka thu ta reng a.

"A ni thei lo, thil theih a ni lo." tiin ka phun sep sep a, ka awih theih ngang loh avangin lehkha chu ka han ennawn leh thul. Chu lehkha a hming chuang chu ka thian kawmngeih em em mai Ramtei a ni. An inneih ni tur chu ka han en a, ni li chauh a lo awm tawh a. A pasal nei tur hi mak ka ti lo, mahse, ka hre har lutuk hi a ni mak ka tih chu.

Ramtei nen hian tette atanga inkawm kan ni a. Naupang harh leh hlim thei tak a ni thin a. Kan naupan laia kan retheih em avanga thian kawm tur mumal ka neih loh lai pawha ka kianga awm tlat thin a ni. An chhungkaw khawsak a san avang leh kan dinhmun a inthlauh em avangin ka inkiltawih thin a, mahse ani chuan kawm serh chu sawi loh, a rualpui hmeichhe dang aia ka bula awm a thlan tlat thin avangin ka ngaina a, ka thian neih chhun a nih avangin ka tan a hlu em em a ni.

Kan inkawmngeih em avangin thian dang pawh kan kawm ngai lova, kan pahnih chauh te in luiah te kan kal a, a chang leh tlangah kalin thei kan lo dun a, hmalam hunte sawiin duhthu kan sam vel thin kha a ni a. Amah Ramtei ngeiin, "I len hunah Officer i ni ang a, kan la innei dawn nia." a tihte khan zah vangin ka sen tun tun thin a nih kha. Lung delh loh thing delh loh na na na chu kan lo seilian a, nulat tlangval kan hre chho a, Ramtei - naupang duhawm ni thin kha Ramtei - nula hmeltha tak a ni tawh a. Tlangval hausa leh changkang tak takin an rim lai te pawhin, "Hmana kan inneih tur thu i sawi kha ka la hre reng asin." tiin ral atangin an in ka thlir reng thin.

Ni e, keini ang tan chuan phu loh thadangi a ni miau tawh a. Rim chak hle mah ila dinhmun inan lohna hian min dal leh thin. Chuti chung chuan a theih ang angin min hmuh hram hram a tum thin a. A rilru hahna leh lawmna a thlenna ka la ni reng a. A ngaihzawngte avanga a rilru a hah changa ka awma beia a tah te hian duat takin ka lo hnem thin a. "Ka kiangah chuan awm la hetin i awm lo tur." tih ka chak thin zia kha aw!

A hlim deuh changa a ngaihzawngte chanchin a sawi siam siam te hian lo hlim pui ve kha har ka ti thin. Engpawh sawiin tu chanchin pawh sawi se keimah a tehkhin fo a. "Nang ang thian ka nei che hi chu ka lawm asin." a tih laite khan lawm hle mah ila rilru chhungril ah lawm a kim thei lova. Kei chuan thian lo deuh atan ka duh che asin tih ka duh thin a. Mahse, ka huaisenna zawng zawng sawmkhawm pawhin ka ngam ngang lova, ka pamtul leh nge nge thin.

A chang chuan keimah leh keimah in dem chang ka nei a. Mipa nih tling lo hialah te ka inchhal vel thul. Mahse, dem theih ka niin ka hre lo. Ni e, ka thian chu a ni ngei alawm, ka thiantha tak a ni. Mahse, chumi vang ringawt chuan ngaihzawng atan min duh nachhan tur a awm lova, ka thinlunga ka vawn ka duhna thu te hi hrilh ta pawh ni ila eng he hu ah a ngai kher lovang. Keini ang mi chhe daikil kara mi chu tu tehlulin nge duh ang ni? Ani chuan thian atan a ni min duh; ngaihzawng atan ni lovin.

Tin, ngaihzawngte hi kan nupui pasal tur an ni kher lova. Tuna a ngaihzawng neihte pawh hi a pasal tur an ni kher chuang hleinem. Amah ngeiin kan la innei dawn nia a tih kha tiin ka inhnem chawp a. Ka zirlaiah theihtawp chhuahin ka bei ngat ngat mai a ni. Chutiang chuan kum a vei a, keipawh vanneihthlak takin ka zirna ah hlawhtlinna ka chang a, hna tha tak hmu in Officer hial ka lo ni ve ta reng mai a. Ka hna hmuhte chu Ramtei chuan min lawmpui em em a. Kei ai mahin a lawm zawk emaw tih turin min lawmpui thiam a ni.

Ka hna avang chuan khawpui ah ka awm a ngai a. Hreh tak chungin kan khua leh Ramtei chu ka kalsan ta a. Ka hna a ka rilru ka pek em avangin engtinnge kum 2 a vei ka hre lo. Kha kum 2 chhung khan kan khua vawikhat mah ka tlawh lova, Ramtei pawh ka hmu hek lo. Mahse, kan naupan laia a thusawi, "Kan la innei dawn nia." a tih kha ka hre reng a. Kha thu khan beiseina min pe a, phur takin hna ka thawh theih phah thin. A pasal neih thu ka la hriat loh avangin min lo nghak ni ngei turah ka ngai a. Ka hlim veng veng thin a nih kha.

Mahse, thil hi suangtuah leh duhthusam ang ngawt a lo ni lova. Zirna leh hna ringawta rilru ka pek avangin nulat tlangvalna hi engmah ka lo hre lo a lo ni. Ka rindan leh duhthusama khawvel ka lo her tir lai khan khawvelah hian midang an lo cheng ve a, hringnun kalsiam tura zawh ngai an lo zawh a lo ni tih ka hriat meuh chuan a tlai zo ta. Tunah chuan Officer ka ni ve tawh a, Ramtei pawh ka cho ve phak tawh e. Hlim takin ka haw ang a, min lo la nghak reng ang a, kan duhthusam ang ngeiin kan innei ang tia ka suangtuah lai mekin an inneih sawmna ka dawng ta si a nih hi!

Awmzel tur...