What Happens When A Class Gets Too Boring...

Classroom lum zet maiah chuan thlan hluamin ka thu a. Sana ka en a, dar 12:25 p.m a ni a. Minute 25 chhung lecture ninawm zet ka ngaithla tawh a nih chu. Hemi tuma lecture hi Oral Hypoglycemics niin Pharmacology subject a mi a ni a. A tir minute 10 vel chhung chu ka phur ve viau a, lecture pawh tha takin ka note chhuak ve thlap a. Mahse, a thu lam hriat a har mai bakah a tawng zawi bawk si a, khua a lum bawk nen! Ka thluak a buai zo dawnin ka hre ta hial a.

Ka ziaklohbu ah chuan phek chanve dawn lai chu zirlai a inziak ve a, a bak zawng chu hmuh tlak a awm lo kher mai. Guitar lem ka ziak zo chiah a, pheikhawk maksak tak mai lem ka ziak zo tawh bawk a. Lehkhapuan sirah chuan ''Ka hrilh tam ta che, Biahthu D leh hla pawhin..." tih hla kha a intlar thla duat bawk a.

Hmun hrang hrangah ka signature a awm thleh thluah a, hmun thenkhatah cursive mawi tawkin Stephen Auhmuna hming te a awm ang nawlh nawlh a. Manchester United hla chuam 'Glory Glory Man United' pawh ka ziak chhuak leh tawh bawk. Sana ka en leh a, dar 12:35 p.m chiah a lo la ni. Ka awi thei ngang lova, ka bula thu pa sana ka va en leh ngat a, a sana ah pawh 12:36 p.m a lo ni tho nia! Khatiang em em a minute 10 chhung a rei mai kha mak ka ti tawp thei lo.

A tawpah chuan tihdan thar tha deuh mai ka ngaihtuah chhak ta a. (Ka va han fing tak e aw! B-)) Ka bul vela thute pawh an ning ve tho tih ka hmu a, engtinnge an awm ka thlir (observe) dawn a ni. A va phurawm tak em! Khaw lum te pawh chu zia deuh huaiin ka hria a, tichuan ka lehkhabu chu ka keu a, ka thil hmuh chu ka ziakchhuak ta a.

A hmasa berin ka ding chiaha thu ka en a, nin hmel deuhin lecture a ngaithla a, a lehkhabu ah chuan engmah ziak lovin pen in a chhu keuh keuh ringawt. A piah leh chiaha thu pa ve thung chuan zirtirtu in a sawi apiang a lo ziak char char a, a changin a chawl deuh zauh zauh. A taima ka ti kher mai. Chumi piah leh chiaha mi ve thung chuan a ziaklohbu dawhkanah a phah duai a, a malchungah zirlaibu keuin a chhiar a, a muthlu zeuh zeuh bawk a.

Ka ding lampang chu ka duhtawk ta rih a. Ka thiltih chu rin aiin a nuam phian mai. Ka vei lam ka han hawi leh a, ka vei chiaha thu pa hi chu engtiklai pawhin a zir peih hmel em em reng a, thil reng reng hi a hre ber ang maia sawi zat zat chi kha a nia. Vawiin class ah pawh a tir atanga ala ziah char char avangin thil hmuhnawm hmuh ka inbeisei lova.

Mahse, a lehkhabu ka en nak chuan ka nuih a za kher mai! Lecture chu tha takin a note ngei a, mahse, a thuziah karah ECG a lo awm zeuh zeuh a, a lehkhabu sirah te chuan Superman leh Batman te an lo insual thul! "Khawi atangin nge ECG hi a lokal?" ka va tia, min rawn en a, kan nui khur char char a.

Nuih za a reh ta maw tih ah chuan ka vei chiaha thu pa piah chiaha mi chu ka va en leh a. Ani erawh chuan tha takin a ziak a, mahse, a phun char char thung. Zawi te te hian vai tawng bawlhhlawh tak takin a phun reng a, zirtirtu chu a hau mawlh mawlh ni berin ka hria. A ning ve ngang a niang e. Ani piahah pawh an la awm teuh na a, ka va en peih ta lova. A hnuhnung bera thu kan nih vangin kan tlar hi kan nawi ve hrim hrim a, chuvangin thil ropui hmuh ka inbeisei lova, ka hlimpui phian thung.

Kan hmaa mite enge an an tih hriat tumin ka bih leh dek dek a. Anni pawh eng an lo ni bik lo tih ka zu hmu leh a. Ka hma chiaha thu chu dawhkanah a bawk a, a lehkhabu ah chuan awmze nei lovin a thai vel mai mai a. A ding lam chiaha thu ka en leh a, ani thung chu inlarna a hmu ta nge maw ni dawn ni? A ziaklohbu chu a bih ngur ngur a, a mit a khap miah lova, a ziak bawk si lova, mak ka ti kher mai!

Chu pa ding lampanga thu chu ka zuk en leh a, (kan lecture theatre hi a hnunglam a sang chho zel a. Hei vang hian ka hmaa thu te pawh an thutna a hniam zawk avangin kan zu en thin a ni.) ani thung chuan ziaklohbu pawh a phawrh lo hrim hrim a, zirlaibu dawhkanah a pharh a, chumi chungah chuan a bawkkhup a, a muhil! (Hopeless tiah tiah) ka en lai tak chuan lecturer in a rawn hmu a, a la hau zui lehnghal!

Ding lam chu ka duhtawk leh a, ka hma chiaha mi vei lampang ka en ve leh thung a. A veilam chiaha thu pa ve thung chuan ziak ang deuhin a thai a, mahse, a pen khan a lehkhabu a thleng lo hrim hrim. Boruak a thai mai mai ringawt. Chumi vei lam leh chiah chu ka en leh a, ani pawh chu a bula mi tihdan chiahin zu ti ve a! An inthurual a ni hrim hrim ang!

Chutia ka bula mite enkuala hun hman chu hun khawhralna tha tak a lo ni reng mai a. Hriat loh karin hun a ral duak duak a, nichina mite kha ka en mek laiin lecturer in, "That's all for today." a tih ri chuan min tiharh zawk a, phur takin ka lehkhabu ka khup a, ka kawr hma ipte ah pen ka thun a, lehkhabu zakzeh chungin lecture theatre ata chu ka chhuak ta vah vah a.

Hemi ka nin deuh ni hi February 25, 2012 a ni a. Nidangah chuan ka ngaithla tha thei rap a nia. Class a awmtha duh lo deuh angah te min lo ngai ang e!:-P