Haihawtna (Absent-mindedness)

''Khawnge ka pheikhawk charna tur i rawn lei chu?''

''Aw! Ka theihnghilh daih! Kha, nangman han lei mai teh.''

''A va han hahthlak thin tak em!''

Hei hi tukkhat ka nu bazar haw nena kan inbiakna a ni. Ka nu hi mi haihawt tak mai a ni a, thil hi a theihnghilh zung zung thin a. Kei a fapa lah hian Upa in, ''Sial rangin sial rang a hring.'' an tih changchawiin ka chhun em em mai lehnghal a, Nufa haihawt nih chu buaithlak chang a tam thin teh e.

A ni lah tak a! Haihawtna hian mihring hi min chenchilh laklawh chuan buaithlak chang a tam thin khawp mai. Nunphung a ti khaihlak a, mi ngaihah fello nih kan hlawh thul. Haihawt avanga vawi khat kalna tura vawi hnih vawi thum lai mai kal a ngai thin phei hi chuan huatthla a la lek lek thin a nih hi.


Haihawtna (absent-mindedness) hi mi tamtak harsatna tawh thin a ni a. A chhan chiang faka sawi tur awm hrih lo mah se ni thei awma mi thiamten an ngaih hi chi thum a awm a. Chungte chu :-

1) Thil pakhata ngaihtuahna sawrbing lutuk avanga thil dang ngaihthah vang.

2) Beisei loh thil lo thleng thut avanga hamhaih vang.

3) Ngaihsam ve hrim hrim vanga thil hriat theih loh vang.

Heng a chunga kan sawi takte hi haihawt chhan ni thei awma ngaih an ni a. Dik pawh a dik hle awm e.

Mi an haihawt tak tak hi chuan tun lawka thil thleng pawh an ngaihtuahna atanga vawm bo hmak ang mai hian an theihnghilh thei thin.

Tum khat pawh Saron vengah ka leng a, ka haw leh lamah Bazarpui ka thlenin ka han indap vel a. Engtiklai pawha ka hum chawt thin ka phone chu ka lo keng reng reng lo mai a, peih lo deuhva ka kir leh a ngaih phah a ni. Ka lenna atanga ka chhuah atanga Bazarpui ka thlen dawn thleng khan ka phone ka keng lo tih kha ka hre reng reng lo a nih chu!

Tumkhat leh pawh ka inbual zo ka inhruk mawlh mawlh laiin khumah ka'n thu ngawt mai ah! A ri rawp a, ka han en nak chuan ka tarmit ka lo thut chhe der mai. Khumah khan tarmit ka dah tih reng ka lo hre tawh lo a nih chu!

A tlangpuiin damlohna emaw, lungngaih rukna riau emaw, thil vei ngut ngut emaw kan neih lai hian kan haihawt zualin ka hre thin. Kei pawh hi thil vei laklawh ka neih lai chuan engdang mah hi ka hre lo thin a. Chhungte hauh hi ka tawk leh nge nge thin.

Haihawtna hian hnam fing zawk kan tihte pawh a bawhbuai ve tho mai.

Philosopher ropui Thales-a pawh kha zanah van lam zira a kalkualna lamah lei lam a en loh avangin tuichhunchhuah ah a tla a ni an ti thin. Van lam ringawta a rilru a sawrbing avangin leiah tuichhunchhuah a awm tih a theihnghilh hmin der an tih chu!

Mi tin deuhthaw hian thil theihnghilh chang kan nei theuh a. Thenkhatin tawhsual an tawh phah a, thenkhatin an hna an chan phah bawk a. Thenkhat lahin exam an tihchhiat phah thul! Famkim lohna khawvela cheng kan nih miau avangin haihawtna te hi a bo dawn lova. Chuvangin, ''Bengtulul, I haihawt hi sim rawh.'' tia in auh hi a bang dawn lo a nih hi!