Sertawk (Thingput Thu)

Tuk khat chu ka nu chaw ei siam riin ka mu tui lai min kaitho hlawl mai a. Sana ka han en a, dar 8:30 a lo ri tep tawh a. Ni pawh a tlangsang tawh angreng hle. Ka nu bulah chuan, "Aw ngatinge min kaihthawh loh a?" ka han ti ve tak na a, exam zo ka nih avangin exam laia ka hah zia hre rengin min kaitho duh lo tih ka hre reng a. Hmai ka phih a, chaw ei dawhkan ka kil ve nghal a.

Chaw ei kham chuan ka nu leh ka naute pahnih chu tuikhur lamah insu turin an liam nghal a. Chutih lai chuan Demand channel a hla ngaihthlak pahin thleng ka sil a. Thianpa Hriata a rawn lut a, a dan pangngai in remote control chuhin a rawn hmet kual nghal zut zut a. Thleng ka sil zawh chuan chumi nia kan thing putna tur chungchang te kan sawi luam a, Pu Vawma mualah sertawk a rah hnem thu a sawi chuan ka beng a verh hle mai. Rang takin ka insiam a, iptepui ak in chhuah pahin kawngka bula ka chempui thiah ka la a, kan kal dun ta hnak hnak a.

Kan khua hi Aizawl hnaih viau e ti lo chuan a thingtlang angreng hle a. Kan in awmna velah phei chuan motor pawh a la luh loh avangin a reh thei hle a ni. Thian ka kawm tam loh avangin Hriata nen hian kan inkawp deuh chawt reng a, kei aia a upat deuh avangin kawng engkima min kaihruaitu a ni a. Ani nen hi chuan thian dang hi kan ngai lo a ni ber mai. Kal pah chuan naupang in marble thap kan tibuai phei zauh zauh a, kar lovah Zotui veng kan thleng phei a, tuikhur lamah chhukin thlanmual kawng kan pawh thla a, chuta tang chuan ram lamah kan liam thla ta a ni.

Thlasik a intan dawn tawh avangin khua chu a vawt deuh ruih a, dam deuh lai kal pelh phei chuan kan khur deuh hlawk hlawk thei hial mai. Thlifim a thawt heuh heuh avangin hah pawh hre mang lovin kan kal zel a, teak hmun kan kal pelh laite chuan khua chu hla takah a pe un a, a reh em avangin lung a leng kher mai! Thing lera sava hram noh noh leh kawrte kan kal pelh changa tui luang ri her herte chuang lunglen a chawk tho a, hmana thiante nena chakai khawrh paha tui kan chenna hmun te chuan mittui a ko chhuak lek lek hial a nih chu mawle!

Kar lovah Pu Vawma mual chu kan thleng thla a. Hriata sawi lawk ang ngei ngei chuan sertawk a lo rah tuar a. Engkhaw sawi set set lovin pum khat te te in kan lo a, chempuia velin kan chi pai nen kan ei ta mial mial a. Puar el euha kan ei hnu chuan iptepui khat leng lawng kan lo a, kan thing put tur kan sat nghal zung zung bawk a. Kan zawh fel chuan a la hma em avangin kan piah kawr te a pialtlep chungah thu in naupan zual lai chanchin te kan sawi a. Kan nui dun hawk hawk a.

Chutih lai chuan khuai rau thahnem zet mai hi kan chung zawnah a rawn thlawk ri hum hum a. Rang takin leiah kan bawk phek nghal thlawp a, tawng pawh kan tawng ngam lo. Rei fe hnu ah chuan an thlawk bo ve leh ta a, kan thaw huai nghe nghe a. A ralmuang ta maw tih ah chuan khuai rawn thlawh laia kan hmel leh awmdan inzirsakin kan insawisa zui a, nui bawk bawk chungin tumkhat kan tuicheng haw in kawng kan bo tuma kangthai hmuna kan kal thu te kan sawichhuak a. Keimahni leh keimahni kan insawisa a, lung a leng kher mai!

Chumi tum chuan kan thian ho 20 dawn lai mai chu chhungte phal lo chung chungin tui cheng turin chhuah lam luiah kan kal a. Sunhlu te lovin kan hlim hle mai a. Reife kan awm hnu chuan kal lama kan kawrte zawh thlak nia kan hriat chu zawh chho lehin kawng kan bo ta tlat mai a. Kan kual kan kual a, a tawpah khua kan hmu thei ta a, mahse, kan hma lamah chuan din pawh din theih lohin, bawkvaka kal ngai khawpin kan chung lamah kangthai a lo awm teuh mai a. Kawrtui ti chip chep ah kangthai kan hlauin kan bawkvak tehreng a nih kha. Khang kan thiante kha thenkhat chu nupui neiin khaw dangah te an awm a, a thenin khawvel an lo chhuahsan tawh thung a. Khang nunhlui engtikah mah kan tawn leh ngai tawh lo turte kha a lo va ngaihawm tehreng em!

Chutia nunhlui sawia kan thut lai chuan khua a lo tlai lam ta reng mai a, zawi muanga kal bek bekin kan haw chho ta a. Kan thing put chu rin aiin a lo rit a, sertawk kan ak rit bawk nen. Duh aiin kal chak a har phian mai. Kawrte remchanga chawl chho zelin teak hmun kan thlen chhoh meuh chuan khua a thim titih tawh a. Helai hmun hi kan khua chiang taka a lan theihna a nih avangin kan chawl leh a. Kan khua lo pe un mai chu hmuhnawm ti taka thlirin thlifim rawn thaw heuh heuh karah chuan ring takin kan zai luah luah a.

Rei tawk fang kan thut hnu chuan Vai bawngchaw phur engemaw zatin min rawn pelh tak avangin a tlai tawh tih kan hre nghal a, kal zai kan rel leh ta a. Kan haw kawngah chuan heng kan thil tawn hlimawm tak takte hi thangthar zawkte chuan a awmzia an man pha ve dawn si lova. Changkanna in min luhchilh tak tak hunah phei chuan thingput nawm zia te, thian hova chakai khawrh leh sangha man te, tuichen leh thei lawh te leh ramhnuaia kala thil chi hrang hrang tih nawmzia te hi an la man pha ve dawn si lova. Keizawng ka va nihlawh bik tak em ti chung zelin ka kal hnak hnak a. Khaw tawntirha naupang infiam haw an chhungten chaw ei tura an kohte nen kan intawk sap sap a. Kan sertawk hawnte chu kan pe then a, kal zelin in kan thlen chuan kawtah ka thing put ka nghat a, ka naute hlim taka "Enge min lo hawn?" lo ti sap sapte chu kuahin ka sertawk hawn chu ka pe hlawm a...