Tournament Ropui

Tlai khat chu zanriah kil laiin U Maman, "Naktuk Football tournament chu Tea nen khan kan team tan rawn khel ve ta che u?" a ti a. He tournament hi a hma atang daiha hre lawk tawh leh tel ve chak angreng ka ni naa; sawmtu ka neih loh avangin ka lo manghilh lek lek hman a. Min sawmtu awmchhun U Mama te team lah chu vawikhat khelha chak lo mai tur, englaimaha inkhel ngailo an ni a. An thian ho intiphur chawp tel tum ve si; player indaih si lo chuan min lo sawm ve a lo ni a. Phur lo deuh chuan ka han aw ve ta poh a.

He tournament hi chuti tehluaa ropui a ni lem lova, Congress thalaiin kan vengchhung mite tana One-Day Tournament an siam ve mai a ni a. Amaherawhchu, tournament hrang hrang ka khelh ve tawh china hlimawm ber a la nih miau avangin Tournament Ropui ka han ti ta mai a ni. Chhiartuten a ziaktu tarmit vuah chunga min mitthla pui ngei ka beisei.

Tichuan, tournament ni chuan Tetea nen field lam panin kan chhuak ta a. Intihre takin High Field lam kan pan a, kan han thlen chuan kan veng mi reng reng hmuh tur an lo awm hauh lo mai a. Hrilhhai takin kan hawi ang he haw a. Chutih lai chuan U Maman min rawn phone a, Armed Veng field ah zawk a lo nia, hmanhmawh takin kan chhuk leh ta hna hna a.

Kan zuk thlen chuan inkhel tur ho chu thusawi leh eng ilo ngaithla in an lo intlar put tawh a. U Mama te hmel hmuh tur a awm loh avangin field sirah kan han saum dil din ang ren rawn a. Inkhel tan dawn te ah kan team ho chu an lo thleng phak phak a, bei a dawng nghal! U Mama chu sawi loha lum a ni a, midang ho khan bei an ti dawng. Han en reng reng pawh khan awm aia dul hmachhuan, tlan hleithei lo tur chi hlir an nia, a zuanzang ber lah kha sikula ka thawh laia ka zirtir thin, chawrche em em mai James-a te kha an nia, inkhel thiam hmel pu pakhatmah an awm lo.

Kan han insiam a, kan team hming lah chu FB Pangpar Huan a ni mauh mai a. Mite chuan FC Barcelona te an tia, Real Madrid CF te pawh an tia, engti tiha FB ti nge an nih ka hrethiam lo. A awmzia ka han zawh chuan pawr tawkin Facebook tihna an ti!

Tichuan le, inkhel tur chuan kan han lut ta sang sang a, kan tumpui turte lah chu thianzaho a team din, jersey nalh tak nena inthuam an ni a, an za zek zek mai si. Chutah keini ve chu pawn lam atangin 'A thing rim nam team' te min rawn ti dah a. Mi reng reng chuan Si engzat tak phur ang maw? tih melhin min melh vekin ka hria. Kan inkhel ta a le, defence ah chuan a maka mak a tam kan inhnawh a, (tlanchhuak peih hlawm hek lo) an rawn pet chhuak pawp a, kei leh James-a chuan hma kan tawng a, lehlam defence paltlang a har ngei mai! Engtin tin emaw kan goal chu kan venghim leh hram thin a, U Mama lah chu diakah a tlu a tlu mai a, a thaw hlawi hlawi a. Nikum hmasa a Pu Chhungate lungphunnna a kan sial talh thi tur chalchang hmel kha ka tehkhin ber! Berh ber Award awm se chuan a la chiang ngawt ang.

Kan inkhel chho zel a, hun tawp nan minute 5 pawh a awm tling tawh lovang tih ah chuan chhak lam atangin James-a chuan diak karah engtin tin emaw a rawn pet thla a, chu chu vengtu nei lo kei chuan lehlam goal ah ka han hem pawp mai a leh! A goal chiang kher mai. Chuveleh chakna nei tawh lo emaw ka tih kan defender lian tha tha khan min rawn pawm, min vawr, min tlankual pui. Kan hlim a ni. Hun pawh chu a tawp zui a, rin loha ui buk sa lutukin kan chak ve mial a nih chu!

Kan team ho chu an han lawm laileng khawp a, a lawm dan tur an rel nghal a. An ka pawh zen ila min seh lovang. Kan inkhelh zawh hnu chuan midang inkhel ah linesman turin min ruat a, ka phar ve lauh lauh lai chuan ka lamah ball a rawn lir phei teng teng a, Tuman an umzui loh avang leh ka lo dan loh chuan a liam mai dawn avangin ka lo pet a. Engati tehreng nge mawni, ka pet ve leh chuan ka ka ke lehlam chu a inphet durh a, fiekd chhungah chuan ke pali vawr suauin ka han tlu tehreng a nih kha! Min nuih dur dur a, ka sen deuh tet tet.

He tournament ah hian team 13 lai an tel a, 1st round kan inkhelh kual zawh chuan 2nd round kan khel leh nghal a. Chutah pawh chuan mi rin loh lutuk maiin Pet chhuah pawp tactic hmangin sihnih faiin kan chak leh ta. Semi Final kan lut ta der mai! Mi mak tih kan hlawh, thenkhatin min nuih, thenkhatin vannei min ti. Keini lah chuan, "Vannei tur chuan thiam a ngai." kan tia, kan hawi lelh lelh tawh mai ani. Tunah zet chuan chak lo mah ila kan mulapho lutuk love ti rilru chungin kan inhnawh puar a, thenkhatin "Hetiang chen chen kan thleng dawn tih hria ila pawisa te pawh lo pai tam deuh tur a nia." an tih laiin thenkhat phur lutukin MLTP Act an lo va bawhchhe thul. Kan indaih tlang a ni ber e.

Chuti kan inhnawh puar hnu leh keini aia thiam zawk an haw nguah nguah lai chuan Semi Final chu kan khel tan leh ta a, a hmaa vawi 2 ngawt kan inkhelh tawh avangin  keini in fit lo na na na chu kan chau hlawm tawh hle a. Kan tumpuite lah chu an phur tawlh tawlh emaw tih mai turin an la rawn intlanthelh fua fua a. Theihtawp kan chhuah chungin sikhat faiin kan chak ta lo a ni. He tournament chhunga kan goal chhuah chhun kan tlakpui ta a ni. Final lut zo lo mah ila inkhelh hmaa min nuihsawh tute ka hup thei khawpa kan khelh avangin kan hlim tho tho.

He tournament hi ka la hlim ber tum a ni hial awm e. Thiante zinga a thiam lo ber leh chhehchhawl ni thin kha team innghahna ka tling pha ve a, engtiklai maha inpawm ngai reng reng lo tur tlangval leh tlangval kan inpawm ang lawp lawp a. Ka student hlui inkhelh thiam tak tak te engemaw zat team hrang hrang ah ka hmu bawk a, intihhlim nana tel tum kan nih ang ngeiin kan hlim hlein ka hria. Champion lo mah ila champion aia kan hlimna a nep zawk ka ring lo.

Chu kan hlimna avang chuan kan in ah Zo ui thau leh lian tak mai talhin kan Champion loh kan lawm zui leh ta nghal a, hei bak bak a tournament khelh hlawhtlin hi ka la nei ngai lo. Ka zir chhuah tak chu mi a len leh tet emaw, a zei leh zei loh emaw atangin a theihna teh suh. Tupawhin an vanneih ni a thlen chuan mi ropui nih theihna kan nei vek a. Keini inkhel ngai hlei lo pawhin nitina inkhel thin kan hneh theih chuan (Kan ropuiin kan hnehte an thiam lua tihna ni lovin.) mi tupawh hian hringnunah hian keini aia ropui zawkte tukdawl theihna kan nei vek ani tih hi a ni.