Zinkawng Hahthlak

An inneih lawmpuitu thenrual leh lainate pawh an tin zo tawh a, an inneih ruai ropui tak thehtute thawm pawh hun chuan kir leh ngai tawh lo turin a liampui tawh. Tunah chuan a hmangaih ber a nupui bulah thu in a car leithar hmangin zinkawng thui tak an zawh mek a ni. Zan a ni a, khaw kar kawnga tlan an nih avangin a reh tlawk tlawk a, lirthei veivak a awm meuh loh avangin chak takin an tlan zel a. A nupui tui taka muhil chu enin a nui sak a, hnung lam enna darthlalang chu a bih a, an tlanpelh hnu khawlai eng chhitte chu chak takin an liam zung zung a, chutiang chiah chuan hringnun pawh hma lamah a tum ram panin a kal mek a ni tih erawh a ngaihtuah lem lo.

Thawklehkhatah chu darthlalangah chuan khaw pakhat a rawn lang hlawl a, chu khuaah chuan mipa naupang khawhar hmel tak a lo lang bawk a. A han enchiang a, chu khua chu tuna an pan mek, Kan Khua tia a lo chhal ve thin a ni tih leh chu mipa naupang chu amah ngei a ni tih a hria. Hmanah chu khuaah chuan a lo khawsa tawh thin a, a pian leh murna khua ni mah se a nu chenna khua a nih vang leh chhan dang pakhat vang mai lo chu atan pawimawhna a nei lem lo.

Chu khua chu hriatreng aiin theihnghilh a duh a. Vawikhatmah kal tawh lo tura a intiam hnuah a nupui ngenna avanga a pan leh chu amah ngei pawhin mak a inti a,. Mahse, kum 15 chuang a hmuh tawh loh a nu hmuhna remchang a nih avangin a tawp nan tiin a pan leh ta a ni. Amah hi chhungkaw danglam tak atanga seilian a ni a, a nu leh pate hi a pian hma in he khuaah hian an lo pem a, a nu sawi danin a pa - zu ngawlvei a neih luih tlat avangin a chhungten an tuithlar a, chutah a pa nungchang avangin a pi leh pu (a pa nu leh pa) ten an hnawtchhuak ve leh a, he khuaah hian an lo pem ta a ni awm e.

Chu khuaah chuan kum hnih an awm hnuin ani hi a lo piang ta a. Naupang duhawm leh hmeltha tak a nia, nikhua a hriat tak tak hma chuan engmah lungkham lem lovin nuam ti takin a lo khawsa ve thin. A nu leh pa lam ve ve atanga a pi leh pute keh an chhungkhat tumahin an rawn tlawh ngai loh avangin tumah hriat a nei lova. Unau dang a neih loh avangin a nu leh pate chu a chhungte neih chhun an ni a. A ngaisangin an bula awm pawh nuam a ti a, khawlai len aiin inchhunga tal vel pawh nuam a tih phah hle thin.

Tlemin a lo leikang chhova, sikul te kalin lehkha thiamthei tak a ni a. Thian mumal nei lem lovin a tal talin a tal ve mawp mawp mai thin a ni. A chang chuan tu tu te emaw a lo kawm ve a, an infiam tui dawn viau te hian an nuten an rawn hruai hrang leh daih thin a, naupang mai a la nih avangin ngaihthat lohna pawh a nei chuang lova, mi nu leh paten ani chu kawm ve lo tura an fate an zilh chang pawhin rilru na emaw, hrehawm tihna emaw pawh a nei chuang lem lo.

Nikhua alo hriat tak tak hnu chuan thian mumal a neih theih tak reng reng loh avangin mak tihna te a lo nei tan a. Tap chungin a nu hnen a pan fo thin. Chutianga a awm chhan chu a rawn hrethiam chho ve zel a. Zu ngawlvei fapa a nih vang leh mi rethei chhungkua an nih vang tihte chu a rawn hrefiah thuai a, mi zingah a inkiltawih a, khawlai aiin inchhung nuam a ti zawk a, mahse inchhunga a pa zuruiin a nu kut a thlak a hmuh fo avangininchhung pawh chu nuam a ti tak tak thei chuang lo. Chutiang chhungkua atanga seilian chu ni mah se a pa hnung zui chu a tumin a tum lo bur a, a zirlai nasa taka zirin mi hlawhtling nih a, mi zahkai nih chu a tum tlat thung a ni.

Naupangte ni chungin rilru khawharna a nei chhova, a  pa zurui chatthla khawlaia mu a kuah haw changte a zak lutuk hi a mittui a tla zawih zawih hial thin. Chutiang khawpa nun hahthlak a nung chung pawhinmite chuan a la tuar tawk lo ti niawm ziazangin an chhaihin an diriam zui a, an auh nawmnahna tello pawha a tawrhna a nat tawh tehlul nen; chutiang  a han tuar leh zel chu naupang tawrh atan chuan rapthlak a tling hial thin.

Tleirawl a lo hre chhova, inchhung boruak leh thenawm khawvengte hmuhsitna avanga a rilru hah chang te chuan an khaw lal in hmun hlui a bung kungah lawnin nileng lengin hun a hmangral thin a. Mahse hetia a awm chang hian nakin zelah a la tangkai dawn tih hria in a zirlai chhiar nan a hmang hlauh thin. Mihring ve nafam chuan mamawh te  a lo nei ve a, thawmhnaw tha leh zirlaibu te a lo duh ve a, a sikul kal tirh atanga mi zirlaibu hman hnu hlir mai hmante chu a  lo ning ve a, a pa lahin a sum hmuh ang ang a in zawh zel avangin mombati zuar ten veng hla tak takah a vak kual a, a chang leh telephone hfui phumna tur laiten a inhlawh thul. A kum ang rual thawh chi chu thawh loh pawh anei lo ti ila kan sawi sual kher awm love.

 Chutia a inhlawh changte chuan an sikula a hmel duh ve deuhten an lo hmuh chang a awm a, nuih deuh tet paha an kalpelh changte chuan a sen ap ap thin a. Chutianga a inhlawhna a khawl sa te chu a dahthatna a pa in a lo hmuh fuh changa zu in nana a lo hman changte chuan a rilru na hi inawhhlum hial te a duh rum rum thin a, mahse a thil tum mi zahkai tura mi hlawhtling nih a tum ruh em avangin a puitlin la mai zawk a ni. Kum 16 a tlin kum chuan a nun pumpui sawi danglam vektu a tawng ta! A pa, amah hringtu, a hrehawmna thlentuni bawk chu a zu in luat tuar lovin a boral a, a nun ti hrehawm em em tu ni mah se a pa a nih tlat avangin a tuar em em a, a hlawhtlin ni hmu lova a liam ta chu a hrethiam thei lo. Chu a chhapah a nu lah chuan a pa thih atanga reilote ah pasal dang a nei zui leh ta mai bawk si a, a tan chuan damlai hremhmun a tawng a ni ber mai.

A rilru hah, zak bawk si chuan chu khua chu kalbosan mai thain a hre ta a, a pian leh murna hmun ni mah se atan chuan a mualphona hmun a ni a, a zahna titamtu mai a nih avangin chen zui zel a ngam tawh lo ani. Tichuan, zan khat chu a thawmhnaw neih ang ang ak chhuakin a nu lehkha tur a ziak a, a hmangaih leh hmangaihtu a neih chhun, a dinhmun engkim hre vek chunga hmangaihtu a ngaihzawng Zotei a hmu bawk a, kal lo tura a ngen lawm lawmna te chuan a mittui ko chhuak mah se a tan thulh leh chi rual a ni tawh lo. Zotein zui ve a tumna erawh a hrehawmna bak a thlensak dawn chuang lova a hriat avangin a remti ta lova, kumkhuaa inhmu tawh lo turin mittui nen a kalsan ta a ni.

Pan lam tur bik pawh hre lovin a chhuak mawl tawp a, a chhia leh tha hriatna in a hruaina lam apiangah kalin a tawpa tawpah khaw pakhat, an khua atanga hla tawk takah a inbengbel ve ta a. Chu khuaah chuan mi inah te awm chungin a zir ve zel a, a hnu ah phei chuan in te luahin sikul pawh a kal ve leh ta a, naupangte mah nise a hnathawh thiam em vang leh a zirlai a thiam theih em avangin amah duhsak em em tu an Headmaster chuan a nupui nena kum 20 chhung fa an neih theih loh aiawha Pathian pek nia ngaiin fa atan a la ta hmiah mai a. Chu chuan a tihlimin atan vanneihna a inher chhuak ve dawn ta ah ngaiin a hlim hle a ni.

Chhungkaw pangngai tak a neih hnu chuan nasa taka zir zelin Doctor a ni ta hial a. Mite fak leh thiam tih a hlawh a, a tum ang ngeiin mi zah a kai ve ta. Chuti chung chuan engtiklai mahin a hmangaih Zotei a theihnghilh ngai lova, amah avangin ngaihzawng emaw, nupui emaw pawh a ngaihtuah ngai lo. Nikhat chu an khuaah chuan mipui rawngbawltu pawl pakhat hian branch an rawn hawng thar a, social worker thahnem tak an rawn dah bawk a. An hmalakna chak zawk nan tiin an khaw damdawiin hotute nen thutkhawmna an nei a, chutah chuan social worker pakhat, sam buang leh mitmeng mawi tak mai lo tel ve reng a hmuh chuan a tek chuai a. A hmuh phat atangin Zotei a ni tih a hai lo. Ani pawhin a rawn hmu ve a, mak an ti dun em em a, kum 13 hnuah an intawng leh ta a nih chu.

Kum 13 lai liam tawh mah se an inhmangaihna erawh a la dai lova, chutia mak tak maia an intawng leh chu mak an ti dunin an hlim zia chu khawvel thumawi engmah hian a hril zo lovang. Chutia inhmangaih na na na chu kum 2 an inzui leh hnu chuan Khuanu samsuih an nih zia lantir nan pumkhatah an insiam ta nghe nghe a. Chung kum 2 chhung chuan Zotei chuan an khaw hlui tlawh turin a sawm fo thin a, vawi tam tak a hnial hnuin an inneih atanga thla 2 hnuah a lo hnuchhawn tawh khua chu panin a tlan leh mek a ni.

Motor horn ri ruai ruai chuan angaihtuahna khawvel ata a kai harh zawk a, an hmaa truck lokal chuan a rawn su thawi thuak a, hlauthawng hmel taka Zotei lo harh chu a samah chulin "Ka hmangaih che." a ti sap a, an hmaa zinkawng thui tak zawh tur an la neih chu chak takin an zawh zel a..... 

(Based on true story.)