Lungpui Chungah Chuan

Nipui lai a ni a, khua a lumin tuipui kamah chuan nula leh tlangval, nu leh pa leh naupangte chenin an ri nuai nuai a. Chu khawlum lak ata chu inchiahdaih tumin mitin mai chu an hmanhlel a, eitur leh rimawi nen an ri chel chul mai a. A khat tawkin venghimtu lamin fimkhur a tul zia thu aurinna hmangin an puang dum dum mai bawk a.

Chu tuipui kam nuam taka lungkham nei lek lova mitin an hlim em em lai chuan mi pakhat erawh chu a vela thil thleng zawng zawngin a tihbuai theih loh khawpa thinlung kehchhiaa rumin lungpui chungah a thu a. A khat tawkin tuifawn in a bul vela lungpuite chu rawn su per leh chuai thin mah se hre lo ang maiin hma lam a thlir reng a, a mit atangin mittui a hnam tiam tiam a.

A chhehvela hlimthawm nui ri te chuan a beng a thleng pha lova, a suangtuahna a tibuai pha hek lo. A rilru-ah mi pakhat chiah a awm a, chumi nena tlaitin an thutdunna lungpui chungah a thu a, a kianga thu ve tur a awm tak loh avangin hlimna an tih hian a tan awmzia a nei tawh lo.

A tan chuan khawvel hi tahna a ni a. Thilsiam tinrengte hi lunglenna thlentu mai a chang zo a. A hmangaih hnena a tawngkam hnuhnung ber avang khan inthiamlohna in a khat a; a sawt tawh si lo.

A hmangaih, a pasal hnena a tawngkam hnuhnung ber kha a rilru tak tak a ni hauh lo. Thleng tak tak atan pawh a suangtuah ngai lovang. Inchhirna in a khat a; inchhirin awmzia a nei tawh si lo. Ni e, khatia a pasalin sakawr chungchuan intihsiaknaa tel tura a inbuatsaih mawlh mawlh lai khan kal lo turin a duh a, a chelh zo ngang dawn lova a inhriat avangin a thinrim khan, "Lo haw tawh lo mah la pawi pawh ka ti hrep love" a ti kha a ni a, a tak chang tur atan chuan a duh hauh lovang le.

Mahse, tukin maiah khan a pasal thih thu a dawng ta kha a ni a. A chhuah dawna, "Ka lokir leh thuai ang" a tih kha a mitthla ah alo lang thar leh a, a mit atang chuan a dan a dan sen rual loh mittui alo luang zung zung a. A tellova a damchhung ni a chhiar tur chu amah leh amah a inkhawngaih a. A tello chuan pen khat pen pawh a zuam mawlh lo asin. Ani nen khan hmachhawp tam tak an nei a, fate neia rei tak dam dun turin an intiam kha a ni si a. Thamral mai tur atan chuan a phal mawlh lo a ni.

A ni tak a. Ni dang ang chu nise hlim takin chu lungpui chungah chuan an thu dun ang a, hmalam hunte sawiin an inchhaih ang a, hlim takin hun an hmangdun tur a ni a.

Mahse, tunah zawng, duhthusam mai lo chu engmah tihtheih a nei si lo. "He hringnun zinkawng hi keimaha zawh ka zuam lo asin." a ti sap a. Ni tla turin a hmaa tuipui a chhun en sar sar chu thlir chungin lungpui chungah chuan a thu reng a...