Khawiah Tuan Zel Ang Maw?

Pathian zara Pawl 10 exam tha taka ka zo thei chu ka lawm kher mai. Nitin zing dar 5-a tho a, zan dar 12 vela mu leh thin kha duh duh chen ka mu thei tawh dawn a, hostel atanga chhuak ka nih avangin chhungte lah chuan ei leh in ah min duhsak dawn tih lah a chiang reng mai si. Phur takin haw a, thlamuang takin Pokemon te, Dragonball Z te, Captain Tsubasa te ka en ham ham a.

A tukah chuan ka thianpa, ka kawmngeih em em Vena a lokal a, sava veh puiah min rawn sawm a, chaw eikham ve leh kan chhuak dun hnak hnak a. Kei hi mi a zawnga themtlaw ber mai ka ni a, chumi ni pawh chuan engmah ka perh tla leh pek lova, Vena perh thlak tlem a zawng a kan insem a, aidu tlem kan khawrh bawk a, keini ang chhungkaw tlai khawp chu ka hawn ve mai bawk a.

Hetih lai hian mobile phone nei an la tam lova, landline kan tih mai kha mitin hmanlar a la ni a. Zanriah kil lai velin kan thenawm ten min rawn au a, ka va phei chuan Sikul pakhat principal-in min be duh a lo ni a. (Hetih lai hian telephone kan neih loh avangin thenawmte ta kan hmang mai thin a ni.) Chu principal chuan an sikula middle section zirtirtu atan min duh a lo ni a, keini ang khawsak harsa ve angreng tak tan kha chuan a lawmawm khawp mai a, a tuk atangin ka zawm ta nghal a.

Zirtirtu ka han ni ve chu naupang ho hian min lawm khawp mai a. Ka te si, ka naupang bawk si, ka class a nih tawh chuan an han ngaithla uluk em em mai thin a. An rin ai khan ka zirtir thiam a niang, min fak ve luam thin a. Pawl 7 zirlai zingah chuan hmeichhe naupang pakhat min nel zual bik a awm a, a hming chu Sawmi (hming thlak) a ni. A naupan ai khan a rilru te kha a puitling zek a, an chhungkaw chungchang leh a harsatna te min hrilh keuh keuh thin a.

Chutia min nel em avang chuan keipawhin ka duhsak a, ka subject kha maths leh science a nih avangin chawh neuh neuh turte kha a tam a, break laite hian staff room-a lokalin min rawn zawt thin a. Chutiang taka a beih nasat avang chuan thiam turin ka duhsak em em a, ka theih ang tawkin ka lo pui ve thin a ni.

Hun a kal zel a, matric result te a lo chhuak a, kei pawh vanneihthlak takin ka pass ve hlauh mai a. Zir zawm zel ka la tum avangin zirtirtu hna chu ka chawlhsan a ngai ta a. Sikul atang chuan ka hna chu ka bansan a, Sawmi nen pawh chuan kan inhmu ta rih lo a ni.

Tluang takin sikul chu ka lal chho ve zel a, pawl 12 exam ka zawh hnu chuan a hmaa ka thawhna sikulah bawk khan zirtirtu-ah ka va tang leh a. Hemi tum erawh hi chuan High School section ka zirtir thung a. Naupang tam tak chu ka hriat ngai loh an ni hlawm a, a thente erawh chu middle section lama ka lo zirtir tawhte kha an la ni hlawm a. Nuam ti takin ka kal ve lauh lauh thin a.

Chutia class ka lak lai chuan tumkhat chu ka phone a rawn khur cher cher a, (hetih lai hian mobile phone ka nei ve tat tawh a.) silent mode-a ka dah avangin a bengchhen chuang loh avang leh class ka lak laklawh avangin ka chhang ta lova. Vawi hnih vawi thum vel a rawn rik leh hnu chuan a rawn ri zawm ta lova.

Class zawh chuan phone chu ka han en a, missed call mai bakah message pakhat a lo awm a. Ka chhang let a, kan inbiak dan chu hetiang deuh hi a ni awm e :-

- "Min hria em? I va ngaihawm ve a."

- "Hre nang. Tunge aw?"

- "Min hre lova? LALAWMPUI. Ka hre rei viau ang."

- "A va mak! Ka hre lo tak tak. Insawi la."

- "I lo van induh em em! Sawmi. Min hria em?"

- "Tu Sawmi nge? Ka van hre mai lo. Sawi chiang deuh teh. Hnartawiha nau kha maw?"

- "Awi awi awi...i va rapthlak tak. Min hre lo vel! I van induh tak!"

- "A va mak tak. Insawi mai mai rawh. Hmelhriat loh chu ka be peih lo a nia."

- "Hmmm...thiantha ka lo ti ve che a. Sawmi, Kanan Veng. Isaac-a u kha. Hre tawh em?"

- "Eeeee, a van mak! Ka hre leh lutuk che. I # ka nei lo lawm."...

Engtinnge ka number a neih ka hre lova. Ka zawt hran lem chuang lova. Min rawn be hlawl kha mak ka la ti reng thin. Pawl kua lai a lo zir ve tawh a, an ina len paha a zirlai min zawh a duh a lo ni a. Kei hi ka thiante reng reng hian min nel theih em avangin mamawh an neih pawha min pan lova ka pan zawk a ngaih tlat chang hi a tam ve angreng a. Hemi tum pawh hian i he lovin ka "AW" ve leh mai a.

An veng ka zuk thlen dawn chuan an in ka la hriat loh avangin ka phone a, Vaivakawna lo ding turin min ti a, min rawn lam dawn a ni. A lo thlen chuan lehkhabu khawr hi a rawn keng a, ani chuan min rawn hre nghal mai a, kei lah pek chuan a lo len tawh em avang leh a hmel a dan tawh em avangin ka lo hre mai lova. A thinrim chuan a lehkhabu ken chuan min vaw lawlh lawlh a.

Kan inhmuh lohna chin a rei tawh em avangin sawi tur a ngah em em mai a, a nu leh pa an inthen avanga a pi bula an awm tak dan te, a nau luhlul zia te, an sikul ninawm zia te, mipa * deuh a neih thu te leh thildang tam tak a sawi a, a chang in ka lo "Aw" a, a changin ka lo "E" a. A chezia chu ka lawm em avangin nui vur vur chungin ka lo thlir reng ringawt mai a ni. Nilengin kan inkawm a, kan titi atalangin dawhkanah chuan lehkhabu kan keu ve tak na a; engmah lah chu kan inzawt ta lem hlei lova.

Chuta tang chuan kan inbe ngun ta hle a. Veng kar a hlat tham ve em avangin inhmuhna hun erawh kan nei vak ngai lo thung. Zing ka thawh ve leh a message a lo awm a, zan mut dawnah pawh a message ka dawng lo ngai lo. Engkim min hrilh a, a chang leh a rawn tap a, a chang leh maths problem solve dan te kan inzawt ang nawk nawk a. Phone atanga maths inzirtir chu a buaithlak chang a tam thin teh e.

Chutiang reng reng chuan kum kan hmang chho a. Pawl kua tha taka pass in pawl sawm ah a inhlangkai ta a. Pawl sawm a zir kum chuan Electric Vengah a ni te in ah a rawn awm a, khatih lai vel kah kan inbiak tam loh lai a nih avangin a awmna a thlak tih pawh chu ka lo hre lova. Tlai khat chu Pawl Sawm ho extra class ka lakpui zo ka intihfai lai tak chuan ka hnung atangin tuemawni hian ka mit a rawn hup thut mai a, ka hawi let nak chuan Sawmi  a lo ni reng mai a. Amah mai bakah a thiante pathum hi an tel ve bawk a, an sikul bang an rawn kal tlang nghal hi a lo ni a.

Thingpuite kan in a, kan titi lai chuan a thiannu pakhat chuan a kheuh zeuh a, hrechhuak thut niawm takin, "Eee, hei kan thian ho hian tuition lak kan duh a, min pe teh a." a ti a. "Ka thiam ve ngawt ngawt lovang, midang zawng zawk teh u." tia ka chhan chiam pawhin nang lo chu kan duh lo an tih tlat avangin tlai tin inpe turin kan titlu ta nge nge a. Chuta tang chuan kan inzirtir chho leh ta a, pawl sarih an zirlaite ka ngaihtuah a, a puitlin ve tawh zia te ka ngaihtuah chhuak zel a, mi a tihlim thei teh e.

Tichuan le, zan khat chu hostelah a rawn kal hlawl mai a, ka room-a ka awm lai chu min rawn kova, ka va kal nak chuan, "Champhaiah ka pa bulah ka awm dawn a, naktuk hian ka kal tawh dawn a, ka rawn mangtha dawn che a." a rawn ti a. Mak ka ti em em mai a, kum a la laklawh bawk si, eng rilru pu in nge a pa chuan a hruai ni ang aw ka ti rilru neuh neuh a. Ka dawhkana ka Chichawm Bu - Article leh ka hla phuah fahrah ve te te ka ziahna chu a la a, "Hei hi ka nei dawn. Ka hriatreng nan che. Kha ka thlalak hi kawl ve rawh." tih paha thlalak dawhkana dah leh kal a rual nghal a. Han phal loh chi kha a ni si lova, ka thuziak thenkhat chu Blog lama sengluh theih lohvin a awm ta rih a ni.

A kal hnu chuan Phone in kan la inbe reng reng thin a, mahse ka vanduai a siamin ka phone ka tichhe ta hlauh mai a, ka phone number kawl zawng ka tibo ta vek mai a, a number pawh a bo tel ve a. A thiante ka dil lahin an lo nei bawk i lova, kan inbe ngai ta lo a ni. A pawi ta ber chu Champhaia an awmna lai vel zawhchianna chang ka lo hre miah lo kha a ni. Tichuan, kum 2 dawn a vei hnu ah ka album hlui ho ka lachhuak a, a kar atangin a thlalak ka kawl ve kha a lo tla nawlh a, ka ngaihtuahna in hman ka chhuilet a, he thu hi ka ziak chhuak ta a ni.