Will You Still Love Me Tomorrow?

Tonight you're mine
completely,
You give your love so sweetly,
Tonight the light of love is in your eyes,
But will you love me tomorrow?

Tumkhat chu kan thianzaho intihlim turin zanriakin kan khaw daifema dilah kan kal a. Zan chu a thiangin thlifim a thaw heuh heuh a, vana arsi pe tuar te chu thlirin ka bawihtei nen chuan insi rialin kan thu dun a. Thla mang lai a nih avangin arsi tam takte chuan kan thutna leh a chhehvelte chu a chhun eng pha lo. Kan piah lawkah chuan kan thiante chu hlim takin an zai ho a, a chang leh an nui khek leh duai duai thin a.

Chungte chuan kan pahnih thinlunga thu nung inthup chu a them pawhin a hawlh buai pha lova. Zawi tak; mahse ring tak siin kan phun melh melh a. Zaninah hian khawvela ka duh ber mai chu ka kiangah thu in tudang mah a thlahlel bik lo chu a ni si a. Hun reitak chhung ka duhthusam laimu ni thin a taka a lo thleng ta mai hi ka tan chuan awih pawh a har ngei mai.

Chutia kan thut lai chuan kan thiante meipui chheh eng chuan min rawn chhun a, an rawn au chiam chiam lehnghal a. Ban vai paha chhawn pahin ka bawihtei mitmeng mawi tak mai chu ka han en a. A mawi tih hian a sawifiah zo lo. A mitah chuan hmangaihna ka hmu a, kei lo chu thlakhlelh dang a nei bik lo tih pawh chiang takin ka hmu. Mahse, chu hmangaihna chuan eng chen nge a daih ang?

Is this a lasting treasure,
Or just a moment's pleasure,
Can I believe the magic in your sighs,
Will you still love me tomorrow?

Ni e, mihring kan nih chhung chuan rilru inthlak thei kan ni a. Kumhlun lo khawvelah hian hmangaihna meuh pawh a kumhlun loh chang a tam thin. Nulat tlangval inhmangaihna lek phei chu zankhat thilthua inthlak danglam hlawk thei a ni tih ka chiang em em a. Chu chuan min ti lungngai a ni.

Kan inkara hmangaihna pawh hi a puitling ngut angem? Kei aia tha leh fel val tam tak hian a lung lo len ta se engtinnge ka awm tak ang?

I'd like to know that your love,
Is love I can be sure of,
So tell me now and I won't ask
again,
Will you still love me tomorrow?

A kut vawt raih chu ka vuan a, a mita en pahin, "Zan hnih khat nawmchenna atan mai mai ka duh lo che a, kumkhuaa ka kianga awm tur che in ka duh che a ni." ka ti a. Min chhang lo. A kun ngal a, a biangah mittui a lo luang ngiai ngiai a. Min rawn en a, a mitmeng chuan, "Min ring lovem ni? Hmalam hun sawi theih a ni ngai lova, mahse, kei chuan kumkhuain ka hmangaih ang che. I kianga awm a, i tar ruala tar ve a, i fate chu ka fate tih ve ka duh asin." tih melhin min melh a.

Tawngkam khat pawhin ka chhang tawh lo. Sawi tur a awm tawh lo. Ka pawt hnai a, dim tein a hmui sen vam ham mai leh ka hmui ka chuktuah a, khawvel hrehawmna zawng zawng hnuchhawn pialral kan chen ta vawng vawng a.

Tonight with words unspoken,
You said that I'm the only one,
But will my heart be broken,
When the night Meets the morning sun.

He zan hi ka tan chuan a va hlu em! He zan na na na hi khawvel ropuina zawng zawng hian ka thinlungah hmun a chang pha lova. Keimah ka nihnaah ka lungawi tawk em em a ni. Mahse, sawi leh sawi hnu, zing a lo ni ang a, ni thar, tuma la hmuh loh ni thar a lo inher chhuak ang a. Zanin ang hi ka la ni reng angem? Zanina ka ta hi naktukah ka ta a la ni reng angem le? Thu in sawi loh mah se chetzia leh mitmeng atangin a thinlungah tumah dang an awm lo tih a lantir tawh a. Mahse, he mihring thinlung hmasial tak mai hian a hlauthawng cheu a nih chu maw le!

Mahse, tunge min dem thei chuang ang? Hmeltha hmingthang, indona lar tak chhuah chhan Helen of Troy pawh kha Menelaus-a nupui angin zingah tho mah se, Troy lal fapa Paris a umin a tlan a ni lawm ni? Marrie Correlli lehkhabu Vendetta ah pawh khan Fabio a thi emaw an tih zawk hlan khan a nupui Nina leh a thian tha ber Guido te kha an lo inngaihzawn hman kha. Thawnthu mai mah nise a tak thleng thei lo a awm dawn em ni?

Chuvangin naktukah emaw, engtikah ni ah emaw min hawisan ni lo thleng ta se engtin nge ka tawrh zawh ang tiin ka inzawt mawlh mawlh a. Zan chu a rei tawh hle a, ralkhatah zanlai ar a khuang thliai thliai a, kan thiante pawh an mu deuh vek tawh a, an meipui chheh pawh a rem zo duak tawh nghe nghe a. Keini pawh chu a tukah tihtur thahnem tak kan la neih avangin mu turin kan phei ve ta a.

Will you still love me Tomorrow?