Tawih Ka Nei Ve A

Kum 10 dawn a lo liam ve ta reng mai! Nimahsela, nimin lawka thleng ang maiin ka la hre chiang a, lunglen changa nunhlui chhuikir paha han maimitchhin vang vangte hian mitthla ah chiang takin ka la hmu thei nia! Tunah chuan ka tan awmzia tehchiam nei lo mah se a hun lai kha chuan nunphung a ti khaihlak ve hial a. Nuam leh hrehawm tam tak ka tawrh ve phah hial a nih kha.

Kum 10 dawn lai kalta-ah khan Aizawl veng pakhatah sikul ka kal a. Chu kan sikul chu sikul naran mai mai a ni lo, SAP SIKUL ngat. Chu a chhapah kan ngaihsan em em High Sikul naupang ngat ka ni lehnghal! Chu kan sikulah chuan a ni he thawnthu a a changtunu hi ka tawn tak ni.

Ani chu kei aiin pawl hnihin a sang zawk a. Kum ah pawh kan u rual fe a ni. Kum chanve chhung chu midang aia a danglam bikna ka hre lova, ngaihzawng emaw, star emaw lampang hrim hrim kha a mik a mak ka hriat loh avangin ka lo phek en vel mai mai thin.

Kum chanve dawn lai hnu ah chuan a hmaa engahmaha ka lo ngaih loh kha ka hmu ngam lo tan a. A hma zawng pawha a bula awm a, titi vawrh ho thin kha a bula awm ka zak ta tlat a. Min biak pawhin zah avangin ka chhang ngam ta lova, a bula awm phei chu a tum pawh ka tum chhin ngam ta lo.

Hetia ka awm chhan hi ka thiam loh pawh a ni lo. Mawhpuh tur ka nei ve tlat. Ka thianpa vang vek a ni. Khatih lai khan in lama lehkha zir theih loh chhuanlamin Principal hnenah hostela zana zir kan dil a, min phalsak hlauh mai a. Mahse hostelah pawh chuan lehkha zir a hnekin thiante nen kan titi liam vel mai mai thin a. Chuta kan titi na ah chuan kan sikul hmeichhe zinga an hmeltha tih ho an sawi thin a.

Chutih lai chuan kei kha tlemin an finna ah ka fing ve har deuhva, ka la naupang deuh bawk nen, an sawi dan takin tawih kha ka nei ve ta lova. Min zawnpui ta a, ani hi min pem buh bel ta chawt mai a. Duh loh a sawi theih si lova, ka tawih chu a ni ve ta a.

Chutia tawih han neih ve takah chuan titi na velah han sawi ve kha a ngai a, a thatna te, a khawilainge ka duh chhan tih te kha sawi a ngai ta a, chutia zantin maia han sawi sawi takah chuan rilru a lo luah nge nge a, ka lo vei lutuk a niang, mak tak maiin a bulah ka zak ta tlat mai thin a nih kha.

Thiante zinga te fal nalh, harh em em, sam pawh bari thena khuih pial than thin, thiante pawhin 'kohhran upa' tia an koh fiam thin kha tawih neih hnu chuan mizia a lo dang ta a. A hma awmdan ang khan a awm theih tawh lova, engpawh ti ila, min hmu em? Min thlir em? Nalh a ti angem? Zawhna hlir kan inzawt a, vai ho tihdan takah impress tum ringawt khan ka hmanhlel ta mai a, tun hnua ka ngaihtuah leh hian a nuih a za ngawtin ka ring thin.

Tichuan le, zankhat chu ka thianpa chuan ka thil tih hreh ber mai ti turin min tur ta tlat mai. Ka bulah a rawn kal a, "I tawih a nih tak tak dawn chuan lehkha i thawn tur a ni. Lehkha i thawn loh chuan i tawih a ni thei lovang." a rawn ti ta a. Ka ngaihtuah thin a, lehkhathawn chu ka ziak thei mai ang a, mahse, engtinnge ka pek ang? Pe ta ila engtinnge a tih ang? Ka rilru a buai em em a, ka thianpa thu chu ka hnial ngam bawk si lo.

Chubakah lehkha ka thawn loh chuan midang tawih kha a ni tawh dawn a, ka phal bawk si lo. Tichuan, ka thiam ang tawka thlumin lehkha chu ka ziak a, ka thianpa chu ka va hmuh a, ani chuan uluk takin a chhiarchhuak a, nui vur vur chungin, "Tha lutuk. Ka lo pe ang." a tia, a ak tha ta daih a.

Chumi zan chuan rilru nuam lo deuhin ka awm tluan zak a, break-ah dam loh chhuanlamin ka haw ta nge nge a. A tukah chuan hreh zetin sikul ka kal a, rin aiin ka lehkha kha a lo darhzau viau nitur a ni, hmeichhia ka hmuh apiang mai khan min nuih tet tet vek hian ka hria a, ka tawih ber lah chuan nidang aiin min be tha a, ka sam phir sangte chu khawihin, "I inhmeh lutuk." min tihsak vel thul. Khami ni kha chu nuam lo ka ti tluanchhuakin ka hria.

Chuta tang chuan sikul naupang dangte chuan min chhaih tan ta a, nuam ti si, nuam ti anga lang duh si lovin ka nui ru ver ver thin. Zana lehkha zir tura ka phei changte hian 'Chalte-Chalte' leh 'Sweety Supari' te ka han pai a, a ruk khan ka han pe ngei thin kha a nia. Zankhat chu lehkha zir laklawh laiin zung turin zunin lam ka pan a, ka kal lai chuan ka tawih khan tui a lo khai a, min hmuh ve leh, "Op, ehem." a rawn ti kher a, ka van lai tak e awww...!

Chutiang reng reng chuan hun kan hmang chho a, kumtawp exam zawhah pawh ka lehkha chhanna ka la hmu lova, hmuh pawh ka inbeisei lo reng reng a. A pual khan hlate kha ka phuah hnem ve hle a, khawnge ka dah ka hre ta lo. Exam zawh ni, an haw ni a lo thlen chuan ngawi rengin sikul bang nghengin ka ding a, ka tawih haw turin motor-a bungrua vel a hlang lai chu ka en reng a.

A hlan zawh chuan min rawn pan a, "Chibai." a rawn ti a. Sehchilh nawk nawk chunga,"In ngaihawm dawn hle mai." tih pahin sikul dawhkan hnuaia sana bun chi, a hrui hmawr lam bung tawh ka chhar chu a kuta hmehbel pahin ka chibai a. (Ka ngaihtuah leh hian ka zak thin. :).) Chuveleh man hman loh khawpa rangin ka tlan haw nghal a, ka tlan liam dawn chuan ka en leh hram a, sana chhia ka pek chu a en vung vung a, a kawrhma ipte-ah a ak ta daih a.

(Thubelh : Ka ngaihtuah let hian thiante tihluih ni mah se, ka * ve a niang a ka ti thin. Khatia tha taka min lo en liam mai mai thin kha a fakawm ngawt mai. Tunah chuan mi puitling tak niin lehkha pawh sang tak a zir tawh a, fb lamah pawh kan inbe ve zeuh zeuh thin. A nunhlui a chhuikir changin khawimaw laiah chuan ka lan ve ngei ka ring tlat a ni. :) Lung zawng a leng thin teh e.)