Arkaiden Zan

Zan a rei tawh avangin kan hostel chu a reh ruih tawh a, arkaiden zan ni mah se chhum a zin nasat em avangin a thim deuh ruih a. Sana ka en a, dar 2:19 a.m chiah chiah a ni a. Mut lah chu a chhuak lovin khumah ka let ka let a. Mut luih ka tum ngial na a; bui lung tawk ang hlauh, a sak talh mai. Phone ka hmet eng a, earphone ka vuah a, hla ka ngaithla ta zawk a.

Owl City hla Vanilla Twilight kha vawi 3 zet ka ngaihthlak zawh hnu chuan ka ril a tam riai riai a, maggie ei turin Rawatpur lam ka pan ta a. Kalkawngah chuan hla ngaithla chung zelin ka pen phei ve bauh bauh a. Thlasik lai a nih avangin tiauchhum a zing phui mup a, thli thaw in thinghnaha dai tling a chhem per sung sung chuan hmai a rawn theh leh thin avangin a vawt kher mai.

Chutia ka kal lai chuan ka rilru a vak kual nasa hle mai a. Ka thinlung lalnu nena arkaiden zan kan hman dun thinte ka ngaihtuah chhuak zel a, ka hla ngaihthlakin a zir bawk nen, lunglenna in min rawn zem riai riai a. Ka han hawi kual a, zan reh ruihah chuan ka awmna chu khawram angah ka chan a, kei chu chu hmuna mihring awmchhunah ka inchan bawk a, rilruin ar bo a zawng a, ka buai zo ta.

Ni e, hetiang ang zanah hi chuan mi tamtak chu an duhberte nen hlim takin an inkawm ang a, an induhnate chu mi hriat an hlauh ve vang ni miah lovin zawi te tein an inhrilh sep sep ang a. A ngaithlatu tan erawh a ring hle dawn si. An inhmangaihna tizual turin an inkuah ang a, lungchim takin lo infawp vawng vawng pawh nise hmeichhe hrin zingah tunge dem thei awm chuang ang le?

Siamtu-in mipa leh hmeichhia-a min duan avangin kan inkara inhiptawnna awm hi kan mausam thei dawn em ni? Hnai love, kan chawinung zawk tur a ni. He inhiptawnna hi hmangaihna-a a chan theih nan mi tamtakin he arkaiden zan ang hi an lo hmang tangkai tawh thin a. Hla ril tha pui pui phuah chhuakin inawmtlei nan an lo hmang thin.

Ka kal zel a, ka lung a leng tulh tulh a. Mitthla-in a nui hmel ka hmu a, tunah hian ka kiangah awm nise thlahlel taka pawmin duhthawh takin ka fawp tur a nia. Mahse, mel za tam tak kar dana awm kan nih avangin tihtheih ka nei si lo. Ka phone kha ka hmet zauh a, wallpaper-a ka hman a thlalak ngei mai kha en zauh pahin ka rilru-in, "Hmangaihna an tih hi a lo va mak em! Chin hriat ngai loh leh seilenna pawh inang hauh si lo kha 'Duhlai' kan inti mai si a." ka ti a.

Ni e, he hmangaihna hi chu a mak a ni, a mak thlawt. A duhawm a; a nunrawng bawk si. Hlimna min thlen a; tahna min thlen bawk si. He hmangaihna avang hian sipai huaisen Napoleon te meuh pawh an tuiral zo tawh a. Edward VIII in British lalthutthleng ropui aia nuthlawi Wallis Simpson a thlan zawk chhante kha hmangaihna vang asin! Hla phuahthiam hmingthang Lalzova pawh kha hmangaihna avangin fam a chang an ti a ni lawm ni?

Ka inngaihtuah chho zel a, hetia lunglenga ka awm pawh hi ka indem lem lo. A ni, arkaiden zan a ni miau a. Hetiang zanah hian mi tam tak chu inngai leh inthlahlel em em in tlaikhua an var dawn tih ka hria a ni. An induhna te tihpuna awmin kumkhuaa thenlohna thu an thlung hial maithei asin!

Ka ding chawt a, boruak hip luh vang vang pahin ka hawikual vel a, thing hnahte chu ka ngaihtuahna hria ni awm takin thli thawt zawng chuan an bu suau suau a. Mit hian tui a lo nei takzet a ni tih lantir nan ni awm fahranin ka biangah chuan mittui a lo luang ngiai ngiai a, rang takin ka hru vat a.

Ka inngaihtuah lungpuam khawlo zo dawnin ka hria a, earphone ka thlawn a, hmanhmawh takin ka kal ta sawk sawk a. Rawatpur ka thlen chuan maggie plate khat ka lam a, ka ei zawh hnua thingpui ka in zawh leh hnu chuan ka haw phei ta a. Khuma ka lawn dawn chuan sana ka en leh hram a, dar 4:23 a.m a lo ni duai tawh a.

Lunglenna in min zem leh hma ngeia muthilh ngei tumin rizai hnuaiah ka inthawlh vat a. Ka chhin diar diar lai chuan ka phone message tone a rawn ri tet tet a, peih leh peih lovin ka ban tawk tawk a, ka han en nak chuan, '1 message received from *****' a lo inti kalh a. Amah vanga lunglenga ka uaina hria ni awm takin ka bawihtei chuan,
"Thla eng bawk sia, ka lungleng lutuk ka mu thei lo reng reng. Miss you. ;-)" a rawn ti a.

"And she's waiting,
I know she waits for me,
Under the Lover's Moon."