Happy Birthday To Me..!! :)

Hurrayyy!!! Happy Birthday To Me...!!!

Pathian kaihhruaina avang liau liau in kum 2012 a ka piancham pha awmchhun ka lo thleng ve leh ta der mai. Hriat loh kar hian hun hi a lo kal chak kher mai tih hi ka ngaihtuah a. He khawvela ka la cham rei loh zia leh thil ka tawn hnem si ziate ka ngaihtuah hian mak ka ti a, enge he khawvelah hian ka 'Mission' ni ang aw ti hian ka inngaihtuah fo thin.

Awle, vawiin hian thinlung takin ka lawm a, lawm avanga tah tur nge nuih tur tiin ka la inngaihtuah mek a ni. Naupang harh leh luhlul ve tak mai dinhmun atanga mite ngaiha tlangval dinhmun kan han kai chhoh ve tak hnu hian mihring hi mahni inngaih ang ngawt kan lo ni lo tih hi ka hrechiang thar em em mai a. Keimahni inthlir dan hi midangin min hmuh dan a ni kher lo a ni.

Ni e, mahni ngaiha naupang chhia mai kan la nih lai hian khawlai kal chang a 'Mama' tih ni lova 'Thianpa' tia koh kan nih hnem tak zawk mauh mai hi chuan naupangchhia taka awm a remlohna chen a awm a, duh emaw, duh lo emaw, tlangval awma han awm ren rawn te a han ngai a. Hmanni lawka High Field-a kan inkhelh pawhin sikul naupang pakhatin 'Ka pu' min ti. Tlangval hma hmaa in pu nghal ngawt chu!
Vawiin hian kum 21 ka ni ve ta chu a ni a. Ka han ngaihtuah kir a, birthday hi kan ina ka lawm awm pawh ka la hre lo ka ti. Ka nu leh pate kha Birthday lawm ngaisang lo chi an nia, vawksa emaw, arsa emaw leia hmeh tih mai loh chu a hranpaa lawmna kan nei ngai lo. Ka phut ngai lem lo bawk a.

Amaherawhchu, tum 4 ngawt mai ka birthday kan ina hman loh tum ka nei a, hemi tum hian kan lawm ziah thung.

A tumkhatna chu pawl sawm ka zir laiin hostel-ah a ni a. Khatih lai kha lehkha zir lama rilru ka pek nasat lai ber a ni a. Ka birthday pawh kha ka lo hre lova. Mahse, ka thiante an lo bengvar hlauh a, tlai devotion kan neih zawhah chhang leh eng eng emaw an lo lei hmanga min lawm sak thut mai chu a nawm dan a dang ngei mai.

Khami tum khan a zaithiam lo ber kha min solo tir mauh mai a. 'I'll fly away' tih hla kha G-key ngatin ka sa ta a nih kha. Luangliam fe fe an tam ngawt ta ve ang. A chhan chu a hnu reiloteah ka ngaihzawng neih hmasak ber ka nei! Khaaa...ka zai chhuah! B-)

Khata ka thian bengvar tak takte kha khawiah tak awm ta che u in engtak ti tawh ang che u maw? Michael of Ramhlun te, Kima leh Lawma of Dulte te, Sangpuia of Kawlkulh.....Aww, Sangpuia....Bawihtea kan tih thin kha! He khawvelah a awm ve ta si lo. Engah nge maw Chatuan ram pan hi in hmanhmawh viau mai zel le awww....!

A tumhnihna chu ka birthday kan lawm vawikhatna ah tho khan a ni a, hemi tum erawh chuan a dang deuh. Pawl 12 ka pass hnuin kan sikulah khan zirtirtuah ka va tang ve a. Lunch break ah zirtirtute leh pawl kaw zirlai naupangten min ko phei a, ka rinloh deuh maiin ka birthday min lo lawmsak an tum chu niin! Ka mittui a tla hial a.
Khang naupang fel tak tak, Pantei of Kulikawn te, Nancy leh Lucy of Chhinga Veng te, Rinrini of Saron Vengte kha mi puitling tak ni turin duhsakna ka hlan e.

A tumthumna chu vairama ka awm tumkhatna a ni a. Hemi tum hi chuan chhungte ka hlat deuh nge ni ka lung a leng kher mai. Samosa tam tawk, India Rupee 100 man lai leh Cold Drinks litre 2 bur 4 in in vaiho nen kan lawm ve a. Vaiho chuan an han uar khawp a, min pet a, min vawr bawk a, kan hlim dar dar kher mai. Hemi tum hi birthday wish-tu ka neih tam ber tum niin kan hostel a mi 100 chuang leh ka facebook friend engemawzat te hnen atangin ka dawng a. Ka lawm takzet a ni.

A tumlina chu vawiin hi a ni a. Zanlai dar 12 khan ka senior te, Angaiha leh Tlana leh ka junior Petera te an rawn kal a, ka hriat miah lohvin birthday cake te an rawn lei a. Hei hi birthday cake ka neih hmasak ber a ni nghe nghe. Tichuan, chips nen, cold drinks nen kan lawm ve laih laih a ni. An chungah ka lawm kher mai. Hla te kan sa a, hlim taka hun kan hman ho hnu in zing dar 3 ah kan tin ta a ni.

Tin, facebook ah wish thahnem tak a lo lut chur chur bawk a, mi fate hi chu in lo va tha tak em! Chhunah Kanpur Mizo Fellowship inkhawm a awm dawn avangin tlai lamah ka rawn chhang let vek ang che u. :-)..

Awle, hetiang zat kum min hruai thlengtu Pathian hnenah lawmthu ka sawi a. Ka nu leh pate, he khawvel eng ka hmuh theihna chhan chungah lawmthu sawi sen loh ka bat hi ka rul seng dawn lo. Tunah hian ka nu chu natna khumah a mu mek a, a dam ngei theih nan duhsakna sang ber hlan pahin lawmthu ka hrilh mawlh mawlh e. Ka pa erawh a chatuan hmun atangin min lo thlir ve ngei ang a, ka ngaihzia te hi hre ve tak maw? Ka thian fel tak tak te, in zavai chungah lawmthu ka hrilh mawlh mawlh a che u.

A tawp nan, HAPPY BIRTHDAY TO MEEE!!