Pages

Saturday, December 22, 2012

Hringnun Hi

Hringnun hi kan ngaihtuah chiang ngai em? Enge a nih a, enge a tum? He khawvela kan lo pianchhuah hian enge kan beisei thin? He zawhna hi mi tamtakin lo zawt tawhin, mi tamtakin chhan tumin an ka an ang tawh thin. Mahse, hmeichhe hrin zingah hian chhanna famkim pe thei kan la awm lo a ni chek aniang chu tun thlenga zawhna langsar tak pakhat chu 'Nun hi enge ni a, hringnun hian enge a tum?' tih hi a la ni reng mai a ni.

He khawvela kan lo awm hian kan nun chu duh leh chak neiin a awm a. Nu pum chhung atanga kan chhuah phat atangin duh leh mamawh kan nei nghal a, kan duh leh mamawh chi hrang hrang te chu a phuhrukna zawngin damchhungin kan hmanhlel a, thlan khura zalh kan nih hma loh zawng chu kan zawng a nih hi! Chu hringnun - duh leh mamawh tinrenga khat chu thenkhat chuan zahawm leh hriatreng tlakin an hmang a, thenkhat erawh chuan khawi maw laia hauhuk leh kawlhawk thi ai pawha hriat hlawh lo nun naran an hmang liam ve mek thung a.

Engatinge thenkhatin hlim leh lawm taka hringnun an hman liam a; thenkhat erawh an lungngaih thin? Engatinge thenkhat an nuih a,; thenkhat an tah? Engatinge thenkhat an lungawi a; thenkhat an lunghnur? Hringnun chungchang thlirna chi hnih chauh I han en teh ang u.


Mihring rilru hi hlimna zawngin a tlan reng kan ti thei awm e. Hrehawm kalsana hlimna hmuh theih nan chuan engpawh tih kan huam thin. Mahse, hlimna kan zawn dan leh beisei dan inan loh vangin mi kan hlimin; kan hlim lo mai thin a lo ni. Mihring hi beisei leh duhthusam diak diak anga awm tura kan inngai a nih chuan kan tisual hle ang. Kan hringnun bultanna pawh nu nau vei tap thawm leh nausen piang hlim tap thawmin a intan a, lusun tap thawmin hnu kan khar leh thin. He hringnun - tahnaa intan a; tahnaa tawp leh inkarah hian eng hlimna tluantling nge maw beisei tur vak awm chuang ang le?

Mi tamtak chuan hlimna hi khawimaw lai kawmkar leh hmun biru deuh a lo awm a a lak mai theih turah kan ngai ni berin a lang. Mitin mai nun theuh hi inen ila, hlimna zawngin kan tlan tak meuh meuh a ni. Kan zawn dan pawh a inang lo hlawm narawh e. Thenkhatin zu leh sa-ah a awm an ring a, Khuanu-in duhsak taka a pek chhia leh tha hriatna zawng zawng an inbo zo a, hlim niin an inhria a; an hlim chuang si lo. Thenkhatin sum leh paiah a awm an ring a, anmahni mai bakah thlahte thleng pawha chhawm tur an chhekkhawl a; an hlim chuang si lo. Hlim a hnekin an sum himna an ngaihtuah a talangin mutmu pawh an tuah tha hleithei lo a nih zawk hi! Thenkhatin nulat tlangvalna ah an zawng a, thenkhatin sakhua an bel a, thenkhat mahni rilru bel ta chawt te leh mi neih ang neih ve phet hlimna a ngai lah bo lo.

Tumkhat chu bazar atanga ka haw lam rickshaw ah ka chuang a. A khaltu chu kum sawmthum emaw chu a ni ang, a hlim em em mai a, a thlan tla hluam karah chuan khi sang chungin a zai rat rat reng a. A tawpah chuan engvanga hlim em em nge a nih ka zawt ta chawt a. Ani chuan, "Eee...Sap, hlim lo chi ka ni hleinem. Nitin eitur ka thawkchhuak a, chenna tur lungkham a ngai lova, ka duh hunah ka mu a, ka duh hunah ka tho leh a. Ka tan beisei leh chuang tur a awm loh avangin chantawka lungawi ka zir a, nangni anga hlawhtlin loh hlau reng renga awm ang kha ka ni ve hleinem." a ti ta mai a. Ka ngei angreng viau naa, dik ka ti viau lawi si. Hlimna hi a pan a pan chi nilovin diktak a chhia leh tha hriatna hmanga nungte chu a lo pan mai thin a lo ni.
Hlimna zawnga hmanhlel em em reng lo a mahni hmunah theuh rinawm leh fel taka kan nun chuan hlimna chu khel lovin a lo thleng mai dawn a lo ni. I hna-ah rinawm la, I nu leh pa zah la. I u leh nau, nupui pasal, tu leh fa, pi leh pu leh chhungkhat laina te zah la, thenawm khawvengte nen inrem la, mi neih ang awt a neih ve kher tum lovin chantawkah lungawi la, mi hlim ber I lo ni thei ang.

Hringfa zingah zalenna duh lo kan awm em? Zalenna hi mitin mamawh a ni a, zalena zawnga tlan mi tamtakte thil tum leh beih dan zawng zawngte hi ropui tak a ni. Amaherawhchu, zalenna kan thlir dan erawh pawimawh tak a ni. Zalenna kan tih hi enge ni a, mi zalente chu engtinnge an awm? Mi thuhnuaia awm a, damchhung a mi khuahkhirhna hnuaia kunte hi mi zalen lo an ni a; duh duh ti thei leh duh duhna hmuna kal thei tura tu khuahkhirhna hnuai maha awm lo te hi mi zalen an ni....em? A dik em?

Khawvel hnam tinte hian hmasang atanga luah ram kan nei vek a, chu kan luah ram chu keini aia chak leh thiltithei zawk ten min chhuhsak chang a awm thin a, chung ho lak ata talchhuaha zalenna neih tum chuan mi tamtakin an lo bei thin a. Hlawhtling an awm a; hlawhchham lah an tam hlei hlei. Mizote ngei pawhin kum sawmhnih zet zalenna kan sual a nih kha. Heng zawng zawng hi a bul berah chuan zalen lo a kan inhriat vang a ni.

Zalenna awmze diktak chu pawn lama min khuahkhirhna ni lovin chhung lama min phuarbettu, kan rilru puthmangah hian a innghat zawk a ni.Rilru ah zalen nia kan inhriat chhung chuan engmahin min awpbet thei ngai lovang. 'The Shawshank Redemption' en tawhte chuan kan hria ang. Librarian Brooke, kum sawmnga chuang tanin tang tawh kha kum sawmnga hnu ah mi zalen niin tanin atangin chhuak mah se, a thinlungah khawvel changkanna kum sawmnga chuang a lo tan bosan tawh chu insiamrem harsa a ti a. Zalen ni mah se a rilru a zalen lova, a nunna hial a la ta a nih kha! Tanin chhungah chuan Librarian a ni a, mi pawimawh a ni. Khuahkhirhna hnuaiah, routine engkim hnuaiah khawsa mah se kha hmun kha nuam a ti a, pawn lama mi naran anga nun hmang leh tur chuan a tlin ngang tawh lo a ni. Tanin chhunga mi zalen kha pawnah chuan a zalen tlat lo.

Zalenna chu rilru ah a awm a, miin a ngaihtuahna a thunun tlat a, aman nuam a tiha, a lungawi chuan engang mi pawh nise, eng hna pawh thawk se, tumahin a zalenna an laksak thei lo. Mizo film siam uar lai khan a changtunu te an pa ten pasal an neih luih tir dawnin, "Ka taksa chu nei mah la, ka thinlung I nei dawn chuang lo." tih kha a lar em em mai a. Kha thu khan mihring rilru pawimawh zia a tarlang chiang hle in ka hria. Ka taksa chu mi thuhnuaiah awmin, chhiahhlawh emaw, lungin tang emaw pawh ni mah ila ka rilru a zalen chhung chuan mi zalen kan ni reng tho ang.

Kawng lehlamah chuan pawn lama khuahkhirhna nei lo mi zalen ni mah ila, kan rilru ah lungkham kan neih tlat a, kan rilru hahna leh kamtu kan inbuk tir tlat chuan mi zalen kan ni ngai lovang. Sikul kan kal laiin Health Eduation-ah hriselna chu pawn lam taksa hriselna chauh nilovin rilru hriselna pawh a pawimawh a ni tih kan zir thin a. Rilru hrisel lo chu mi hrisel a ni thei ngai lo. Chutiang chiah chuan rilru a zalen lo chu mi zalen a ni thei ngai lo.

He hringnun hi hriatthiam theih rual loh khawpa dangdaiin Siamtu hian a duang a, kan sawi tak hlimna leh zalenna mai bakah innghahna a la nei em um a, kan sawi vek seng lovang. Kan hriatreng tur chu a dintu Pathian tello chuan hringnun hi thil ho mai a ni a, eng sakhua pawh bia la, mangan tawpah chuan midang auh tur kan nei chuang lo. Piantirh ata dam chhung chhuk chho a min kaihruaitu, hringnun dintu Pathian hnen kan intukluh a, engkima Amah rin hi 'Hringnun Awmzia' chu a lo ni.

No comments:

Post a Comment