Boston Kan Vanglai

Khua chu nidang ang lo takin a dur deuh khuih a, a vawt angreng hle bawk a. Ka room hnawk nuai chu tihfel pahin hla ka ngaithla a, lehkhabu leh eng ilo a awmna hmun tur lo a awm te ka rem hnu chuan ka thawmhnaw bal ka su leh a. Tlai lama kan inkhelh leh dawn tho avangin ka inbual duh ta lem lova. Khumah mu in ka lehkhabu chhiar tur neih ang zawng zawng ka chhiar zawh vek tawh avangin ka tihtur hre lo chuan nunhlui ka chhuikir neuh neuh a. Lehkha zir tur chu inchhawp tun mah se ka taihmakna in a tlin hlawl loh avangin ka room tukverh chu hawngin ralkhata rel tlan vut vut leh sava chiar nak nakte chu ka thlir vel ta mai mai a.

Thlifim vawt raih maiin min rawn chhem a, vai ram a ang lo riauin ka hre nghe nghe a. Chutih lai chuan thianpa RC-an min rawn phone a, kan sikul kal lai leh hostel awm laite sawiin thianpa Reuben-a induh zia te kan sawi kai a, lung a leng kher mai.

Nia, khawvelah thian tam tak nei mah ila thian thenkhatte hi chu thil kan tawn pui tam bik an awm a, heng ho te hi an hlu nge nge thin. RC-a leh Reuben-a te pawh hi thil tam tak kan tih ho leh tawn ho tawh avangin nunhlui sawi tur kan ngah a, kan inngai em em a ni. Chung kan nunhlui tam tak zinga sawi hmaih hauh loh tur chu 'Boston Kan Vanglai' kha a ni awm e.

Ka thiante pahnih nen hian St. Paul's Hr. Sec. School atangin HSSLC kan pass rual a, Pawl 12 kan zir kum hian Mission Venga Boston Hostel-ah kan awm ho a, khang kan hun hlimawm takte kha pil bo mai atan chuan a pamhmai luaa ka hriat avangin ka ziak chhuak ta chawt mai a ni.

Ka thiante pahnih hi Aizawl pawn atanga rawn zir an ni a. Reuben-a hi Thenzawl khua niin RC-a hi Serchhip khua a ni ve thung a. Reuben-a hi awm hmasa berin RC-an a zui a, a hnuah kei ka awm ve leh a. Reuben-a nen hian Eastern Jordan hostel ah pawl 11 kan zir laiin kan awmdun tawh bawk a. Hetia Boston hostel a ka va luh ni hian kan thian thum tana kan thian nisa, Eastern Jordan Hostel a kan awmpui thin Lalrom-a, Serchhip khua hi a lo awm ve reng mai tih ka va hmu nghe nghe a. Ani hi mi lehkha thiam, rilru chak em em, mahse thawveng em em mai a ni a. Pawl 10 an zir lai pawhin an zirtirtu ten pawl 10 a pass huna a tihtur an zawt a, 'Sam ka zuah ang.' a ti. Chutiang mi nena kan awm ho leh tur chu a hlimawm lo thei lo.

Tichuan, keini thian thum chu kan han awm ho leh ta a, mize inang lo, duhzawng leh ngainat zawng inang em em lo awmkhawm chu chanchin pawh kan ngah nangiang mai. A zahve pawh kan sawi seng lo tur erawh a pawi ngawt mai. RC-a hi a pumrua a lian ber a, a puitling ber a, lehkha a zir taima ber a, a lerh ber bawk. Star te hi a ngah em em mai a, tumkhat phei chu kan sikulah assembly laiin Bro. Devassy-an hmeichhia 3 a hrem a, an vai chuan a star te vek zuk nia!!!

Reuben-a ve thung chu mi tawng tlem leh inchengvawng tak mai a ni a. A thil tih reng reng a ulukin muang ban charha ti mi a ni a, star a nei tam lo na a, a star chhun erawh a atchilh thei hle. Chutih laiin kei ve thung chu thawveng ve tak mai ka ni a, ka tawng duhin thil ka ti thlip hlep ve lem lo a, ka room pawh a hnawk ber ziah. :-) Keini thian thum khan ngaihzawng kan neih ngai ka hre lem lo a, star tih velah khan kan hlim tawk viau a ni.

Zinga kan sikul kal turte hi hmun khat atanga chhuak na na na kal ho ziah awm tak kha kan kal rual ngai mang lo a. ka hman hma ber ziah a, ka kal hmasa ber a, a hnu ah RC-a a rawn kal leh a, a tawp berah muangchangin Reuben-a a rawn kal leh thin. Haw lamah erawh kan haw rual tham tham thin a, haw paha kan thilzir sawihote kha nuam kan ti a, hah pawh hre mang lek lovin Kulikawn leh Thakthing pheiah te khan kan tawng phei bawrh bawrh mai thin a ni.

Kan hostel kha han luh chiah hian ding lamah room a lo awm a, chu chu ka room a ni. Chumi kal pelh chuan hall a lo awm a, a thlangah room pakhatah RC-a leh Reuben-a an awmdun thung a, an room kha a tet tehlul nen, an intithinrim a, mistiri an ko a, zu han pin dan tir a!!! Ka va nuih hnem tak khami tum khan. Ka room hi a hran deuh bik avangin zanrei leh lehkhazir laia zun chhuah changte hian bathroom pan hi ka ning thei hle a, tui ka in hnem a, zun a chhuak ngun si a. Bottle a zun mai ka chung roh a, ka room kil khatah ka tung tlar thut thin a, tumkhat RC-a lo lutin a tlak pawp ai a leh! A uak nasa kher asin.

Keini thian thum kha duhzawng inang lo viau e ti lo chuan thil pakhatah inlungrual deuhna kan nei a. Chu chu Mimi Renthlei kan atchilh vek kha a ni. Tlai lamah Mimi cheng 5 man kha kan lei haw ziah a, kan lehkha zir hi dar 8:30 velah kan chawl thin a. Tah chuan kan Mimi theuh chu kan ei a, chumi zawh ah Mimi kawrah chuan RC-a Amul bawnghnute pack lianpui mai chu hawngin vum thurin kan bun a, hmai var lei luaiin kan liak fai ta thin a. Kan puar peng pawng ta maw tihah ka phone a Mimi Renthlei hla chu play in khawvel lungkham theihnghilh thak khawpin kan han lam thin tehreng a nih kha. Kan va hlim thei tak em! Kan vai khan hming kan inphuah a, Mimi hla a mi theuh khan RC-a chu Ainawna (hei hi ka hming zawk a nia, ka phuah hmasa a, min ruk sak.) kei chu Hmeltha Nunrawng-a, Reuben-a kha enge kan phuah ka hre chiang chiah ta lo, Kar hla D-a ni ta in ka hria.

Tumkhat leh chu RC-a hian phone a nei thar a, min hrilh miah lo in a phone atang chuan kan sikula ka star pakhat thiannu anga inchhalin min rawn bawl ta. Kei lah chuan awih chiah lo mah ila ka star leh an thian ho chanchin a hriatchian em avangin ka awih ta roh a. Min duh ve nia sawiin a tukah inhmu turin min ti ta a. Kei lah pek chuan RC-a chu engkim ka hrilh a, ani lah a lo phur. Min sawi phur pui a, tlaiah chuan inhmu tura kan tihna hmunah chuan ka kal ta! Mak tak maiin chulai hmunah chuan ka star te chu a thiante nen an lo awm! Nui sang chungin ka pan; mahse min hmu awm pawha an lan loh avangin ka zak chu ka kal tlang ta daih a. A hnu ah RC-an min lo bawl a ni tih ka hriat leh hnu chuan kei ai mahin a zak zawkin ka hria.

Keini hi kan innel ve hrim hrim a. Mahni tawka ngaihdan nei hrang theuh leh mahni thu duh theuh kan nih avangin inhnial rap rap changte kha kan ngah thin. Kan awmdan mak deuh, tun thleng pawha ka hriatthiam theih reng reng loh chu kan hostel kha Mission Veng Biak In bul lawka awm ni si kha Kulikawn Biak In a kan inkhawm daih chhan kha a ni. Chawlhni apiang khan Kulikawn ah kan inkhawm ve ziah. Chutia kan inkhawm chu tumkhat kan haw lamin Thakthing Bus Stand bul lawkah RC-a star pakhat kan hmu alawm le. RC-a khan Reuben-a hnenah khan 'Min han biak teh.' a tia, Reuben-an a ngam tak tak leh tak tak loh a zawh pawh a AW a tih tlat avangin a han kal ta. Chu nu hnenah chuan, 'Khu RC-a khuan min lo biak rawh a ti.' tih pahin a rawn kawk thla a, keini kan lo biru tawh si. Tumah awm ta lo chu a hawi a hawi a, hmeichhiate pawh chuan nui chungin an kalsan ta a. Rei tak chu an inbe lo in ka hria.

Boston kan awm laia thleng ka nuih tiza tawp thei lo chu Kulikawna in pakhat a kan tum kha a ni. Zing dar 2 velah thawm ring takin min tiharh a, bathlara ka zuk chhuah chuan in kang vangin a lo eng phut mai a. Ka han hawi vel chuan ka piah lawkah chuan ka thiante pahnih chu bangah an lo bei thlawp a, muangchangin bang hrulah inchhung lam panin an tawlh hret hret a. Thil awmzia ka zawh chuan ,'Shhhh......bengchheng suh, kun rawh.' min tia. Kun chungin inchhung ah an rual chuan ka lut ve ta a. Thil awmzia ka zawh chuan, 'Indo an awm.' an ti! In kang vanga eng leh gas puak ri vel kha indo thawm emaw an lo ti a nih chu!

Kan hostel awm lai khan Thangnang a puang vak mai a, naupang dang khan an ei nasa khawp a. Keini pathum kha chu ten chhe ngang kan nih avangin kan ei ve ta lo. RC-a lehkha zir nasa lutuk kha kan tibuai thin a, min ngei viau thin tak na a a hmakhua kan ngaih vang a ni tlat. A inzir a takngial dawnin kan hria a, a chang phei chuan drip khai hial a ngai thin a, kan khap thin reng a ni.

Keini thian ho hostel awm kha chanchin ropui tak kan nei lem lo na a, a hlimawm thung a ni. Tunah chuan mual hranah, mahni zirlai theuh buaipuiin kan awmhrang ta. RC-an Lucknow a KG Medical College ah MBBS a zir a, kei Kanpur a GSVM Medical College ah MBBS tho zirin Reuben-a lah Hyderabad a JNTU ah Engineer nih tumin a zir luah mai a. Hun a kal zel ang a, Khuanun zah a ngai ang a, kan zirlai theuhte kan zir zawh hunah eizawnna nghet neia kan din hunah pawh heng kan nunhlui te hian min la tinui leh thin dawn a ni.

He ka thil ziah hi ka thiante hian an hmuh hun chuan min velh phah duh maithei a, hlau chung chungin ka rawn ziak a ni. Mahse ka thuziah avanga min rawn chhuahchhal a nih vaih chuan RC-a lam video ka tlangzarh ang a, kan Sialsuk kal chanchin te, kawmthlang naupang kan zinga pakhatin a atchilh chanchin te ka rawn tlangzarh leh a ni mai.