Lingering Promises

Tlai ni tla tur chu kawlkil ah a inkhai nul nul a, thlifim a thaw heuh heuh a, lungleng angreng tak chungin ka pindan tukverh ah dakin hla ka ngaithla a. Ka hla ngaihthlakin min hneh em avangin ka inngaihtuah lungpuam a, a khat tawkin ka mit ka hru leh zauh thin a. Chutih lai chuan ka nau inbual zo in min rawn ko a, inbual ve turin bualin ka pan hnu hnu a.

Inbual pah chuan vawiin ka hun hman dante ka ngaihtuah kir a, ka piancham ve meuh ah pawh hunthawl nei lo leh buai reng reng a ka awm chu ka inkhawngaih rilru hle mai a. Diktak chuan hna tha tak neiha nuamsa taka awm ka chak ve tawh a ni. Mahse, chung anga awm tur chuan tuna lehkha zir chunga hna ka thawh ka tauh tauh a ngai si a, vui thei ka ni love tiin mahni leh mahni ka inhnem chawp a, ka zai rat rat a.

Inbual zawh chuan ka hmangaih ka bawihtei nen piancham lawmna zanriah kan kil dun dawn avangin ka thawmhnaw hak tur te ka nawt mar a, phur takin ka insiam surh surh a. Ka bawihtei hmel mitthla chungin sam ka khuih a, rimtui ka inhnawih a, a nalh thei ang bera ka insiam thiam dan bera ka inchei hnu chuan ka bike chhe ve tak chu ka rap nung a, ka bawihtei nen kan inhmuhna tur lam panin ka inkhalh phei bauh bauh a.

Ka va thlen chuan a hma daiha thutna kan hauh lawk tawh avangin waiter chuan kan thutna tur lamah min hruai vat a, sana ka en a, inhmub hun tura kan intiam hma minute 15 ah ka thlen khalh avangin ka intithei hle nghe nghe a. A chhan chu kan pahniha engemaw ti a kan chhuah dun apiang hian inhruai lovin a hmun thleng hmasa nih kan inchuh thin vang a ni. A thleng hmasa zawk chu kan intithei viau thin reng bawk a.

Lo nghah pah chuan ka phone a a thlalak ka enkual a, kum hnih kaltaa kan inhmuh hmasak ber nia a thlalak, a inring lo lai ka laksak, a hnu a delete tura min tih, ka delete duh tak loh te chu ka en a, ka khi var var a. Hemi thlalak ka lak ni hi ka thiannu kawmngeih em em mai pakhat a nu in a boralsan ni a ni a. Min ngen angin a nu thlana dah tur rose bawr leitura ka kalna ah a ni. Ka bawihtei te hi kan khuaa pangpar dawr lian ber nei an ni a, kan inhlat em avangin ka kal ngai lem lova, a neitute pawh ka hre hek lo. Hemi ni hian ka thiannu te in atanga a hlat lutuk loh avangin ka va kal a, an dawrah chuan ka duh ang an kawl loh avangin an dawr thlang lawka pangpar huanah min hruai a, chutah chuan a ni ka tawn tak ni.

Hnathawh kawr nen, sarangin a lu a tuam a, kutkawr a bun bawk a, nuam tih hmel taka hna thawkin pangpar a cut a, a remkhawm a, a hnah tha lo laite a paih a, hlawhfa hote chu tihdan tur a hrilh zung zung a. Rei fe ka thlir hnuah min rawn pan a, kei hawklak ta pek chuan ka phone in a thla ka lo la ngawt pek a. Zak tih hriat taka sen tun tun chungin ka pangpar duh ang chu min zawnpui a, nalh taka min remkhawm sakin min pe a nih kha.

Khatih lai khan tun ang tak hian kan inhmangaih ang tih ka ring pha ngai lova, ina ka haw leh hnu a ka phone ka enkual leh hnuah a hming pawh ka hriat loh, zahtheih loh vanga a thla ka laksak ngawt chu a hmelthat zia ka hmu chiang a, ka vei ta tlut tlut mai a ni. Hringnun hi duan lawksa a ni an tih ve fo hi a lo dik ngei a ni tih ka rin takna pawh amah vang hi a ni nghe nghe. Ani hi ka tana duan lawk chu a ni a, ani lo hi a tan an awm lo. Pangpar huana kan intawn atanga vawiin thleng hian amah iaina thinlung ka la pu lova, a nitelin ka duhna a zual telh telh zawk a ni.

Sana ka en a, kan hun tiama kawk chiah chiah! Nidang ang chu nise a lo thlen hun a ni tawh. Ka ngaih a tha lo angreng viau dawn a, amaherawhchu, engemaw vanga tlai satliah a nih ringin ngaihthat lohna em em ka nei duh rih lo. Phone-a a thlalak chu ka en chhunzawm leh a, a birthday a kan lak te, a uite thar ka pek nena an lak te, kan ina chaw a ei nia kan lak te, kan bazar lai, a damloh lai, a graduate ni,......a va tam tak em! thalak nuam ti mi ka nih avangin kan inhmuh phawt hi chuan a thla ka la awl lo thin a, ka phone pawh a thlalakin a khat a ni thawthang mai!

Minute 15 a liam ta. A lo la thleng chuang lo. Tunah chuan ka ngaih a tha ta hauh lo mai. Hauh pawh huamin a phone ka call ta ringawt mai a. A 'ring' ral thak! Hetianga inhmuh dawna in call hi a duh lo em em a. "Traffic jam leh engemaw vangin a tlai palh thei a, ka tiam tawh chu ka tiam tawh a ni a. Ka lokal lo ngai lovang. 'Remind' ngai ka ni lo." a ti thin a ni. Tin, car a khalh thin avangin motor khalh chunga inbiak a duh ngai lova, a pick up lo thin reng a, tunah pawh car-ah a la awma niang e tiin ka call zui duh ta lova.

Minute 30. A lo la lang chuang lo. Vawi 5 lai ka call tawh a, a 'ring' ral thak thak zel. Ka ngaih tha lo chuan a nu ka call a, a lo chhuah daih tawh thu in min chhang a. A lo thlen ve leh mai ringin ka nghak ren rawn a, ka bawihtein a thutiam a bawhchhe ngai lo ti chungin beiseina nen sana ka thlir reng a. Chhuna kan inbiakna te ka ngaihtuah kir a, ka piancham min lawmpuina thu te, zanriah kan kil ho tur chungchang te, lokal ngei a tum thu te nen. A tiam tawh a, a lokal ngei ngei ang.

Minute 45. A ni em em tawh lo. Thil dik lo chu a awm a ni. Ka thutna bul chu darthlalang lang tlang thei bulah a ni a, chumi darthlalang lehlam chu pawn (kawngpui) a ni tawh a. Pawnah chuan lirthei kal vel pawh a awm mang lova, chumi piah lehah chuan park a awm a, chulai velah chuan street light a awm a, a chiangkuang vak lo nge ni a thim a; a eng leh thin a. Chumi de zeuh zeuh chu ka thlir reng lai chuan ka bwihtei chu chulaiah chuan a lo ding reng mai!

Engtik laiin nge a lo kal ka hre lova, a en that loh avangin a hmel ka hmu tha thei lova, a kun deuh bawk nen. Amaherawhchu, a kawr hak leh pian vel chu hai chi a ni lo. Ka hrechiang lutuk tlat. Min rawn hui a, mak ka ti viau mai! Ka ngaih tha lo chuan a phone ka call ngat a, a la chuang lo. Min rawn hui leh a, hreh angreng deuh chungin ka va chhuak a, khawpui a ri dur dur a, ruah a tla pharh pharh lehnghal a. Engtizia nge mawni hlauhna in min man a, ka tiril ah ka khur ru der der a.

Kawngpui chu kanin ka va pan hnai a, a bul ka thlen dawn chuan lehlam a hawi a, ral hla tak thlir ni awm takin a awm a. A awmdan chu mak ka tih em avangin lungawi lo aw deuhin a lo tlai chhan ka zawt a, min chhang lo. Ka thin a rim phat a, vin lek lekin pawna min koh chhuah kher nachhan ka zawt leh a, min zawt chuang lo. Hetih lai hian a bul ah ka ding a ni deuhthaw tawh a, a dara kawih her ka tum lai chuan ka phone a rawn ri a, ka en chuan ka bawihtei nu a ni tlat mai. Ka la thuai a, tap chungin, "A pawi e mai Vala, matei kha a kalkawngah a chesual a, an chhan thei tawh lo!....."

Ka phone chu ka thlauh a, enge a sawi ka hre chhunzawm lo. Tunge ka hmaa ding hi??? Ka khur hlawk hlawk a, ka kha a chih a, ka hma a ding chu zawi muangin a rawn inher a, a thim avangin a hmel erawh ka hmu chiang thei lo. Ruahin ka tarmit hmai a lo theh bawk nen. Chutah ka bawihtei chuan ti hian a rawn ti a nih chu.,

Ka thutiam chu ka bawhchhe lo tiraw? Ka lokal ngei ngei ang ka tih kha...."