Chenna ngai loh ram fan thu. Part 1

Tun tum chu chenna ngai loh ram Kanpur pana ka zinkawng chanchin ka han hlui teh ang che u.

Vanneihthlak takin kum 2010 Technical Entrance Exam kha ka inziak tling ve hlauh mai a, kan chhungkua pawh kan lawm ve dar dar hle. A bikin midang aiin kan lawm fal emaw tih mai pawh awl tak a ni. A chhan chu exam pawh tum lem lo, college kal chunga coaching pawh kar hnih emaw vel lek kal chunga ka tlin ve mial vang a ni.

Tin, eng eng emaw buaina avanga result vawi thum lai mai tar nawn hnuah leh hlauthawng thinphu dep depa awm hnua tling chho zinga ka tel vang a ni bawk. Tichuan le, councelling te kan han nei a, GSVM Medical College, Kanpur chu ka zirna tur atan intithei takin ka thlang ve ta luah mai a nih chu!

Rei tawk fang kan nghah hnuah Allotment letter a rawn thleng ta hlawl a, kal thei dinhmuna ding ka ni ta reng mai. Khatih laia rilru a nawm zìa kha aw! Thiante leh chhungte tlawh kual khan ka hmanhlel a. Inah pawh ka awm khat hle a ni. Tihfel ngai kan tihzawh thawkhat hnu tlai khat ka leng haw chu ka piin, ”Insiam rawh, naktukah i kal dawn.” a ti ta mai. Ka bangboin ka buai ta khawp mai a, zankhua pawh khan ka insiam zo thei dawn lo emaw tih hnuah ka zo ve ta hram a.

A tuk zingah chuan inthlahna te kan neih zawh chuan kan chhuak tan ta. Thil engkim mai chu rinloh leh beisei loh dan deuhvin a thleng ta zel mai. Kawngpui kan chhuak chho chu Santro car nalh deuh mai hian min lo nghak a, a hma pawha ka la hriat ngai reng reng loh ka cousin te kha a driver a lo nia. Ka la hriat ngai reng reng loh ka pi teho an lo thu fur mai a. Kan han inchibai leh hnuhnawh a, kan chhuak tan ta a.

Bus station lam min panpui ang chu tih nak alaiin Lengpui lamah kan liamthla ta vut vut mai a. Ka mangang hman dawn viau a, mahse ka hriat lohvin chhung leh khatten thlawhtheihnaa min chuan tir an lo tum chu niin! Ka thil tawn chu mak ka ti ta tulh tulh mai. ( Ka chhungte khan min surprise tum vang hrim hrimin ka hriat lohvin engkim an lo ruahman lawk vek a ni.)

Tluang takin Lengpui Airport kan thleng thla ta a, inla confi takin trolley-ah ka bungrua ka han dah a. Chenna ngai loh ram ka fang tan dawn ta! Airport Terminal ka han lut chu ka bo angreng hle a, mahse sign chhiar nachang ka hre hlauh va, ka mualpho lo hram hram a ni.

Engtin tin emaw ka invai kaw chhova, ka bungrua an check ta! Ka bag ah khan mamawh takin tiin chemte te, Lighter te ka lo pai si! Khang kha thlawhna ah an lo phal awzawng lo chu niin! A thawktu ten zaidam takin min hrilhfiah a, ka vawikhatna a nih vang leh chinchang ka hriat loh vang a nih thu ka hrilh ve luam a.

Darkar chanve vel kan thu ta tihin kan thlawhna tur Air India thlawhna chu alo tum ta ruau mai , ka helhhawlh tan ta! Khaw lum karah khan vawt tih vang ni miah lovin ka khur nia! Thlawhna chhung kan han lut chu ka rinai daihin alo te a, air hostess chhe lo leh zei tak takin min lo chhawn ang chu tih nak alaiin vai nu upat hmel deuh deuh, thau deuh deuh hlir an lo awm ta mai si. A nuihzatthlak duhin a hrilhhaithlak letling zawk hle a ni.

Tichuan le, seat belt hren dan etc chu ka bula mite tihdan ka entawn ve zel a, ka buai em em bik lo. A chuang tur ang ang kan chuan fel hnu chuan kan thlawk tan dawn ta a, chak tak maiin a tlan a, a thlawk tan chiah chu ka insep dawrh mai a, thinphu a rang a, ka au chhuak teuh kher mai. Mitkhapkar lovah chhum chungah kan awm ta. Lei lam ka zuk thlir a, Mizoram pelin vai ramah, hmelhriat pakhatmah awm loh na panin ka kal a ni tih ka inngaihtuah chhuak a. Ka lung a chhe kher mai.

Darkar 1 tling lo deuh kan thlawh hnu chuan Kolkata Airport kan thleng ta a. Engkim hi alo danglam khawp mai a, ka chuanpuite tihdan chu ka en ve zel a, ka bo em em bik lo. Lengpuiah khan Pu Lungmuana (MP hlui Pu Zawma nau) hi a fanu MBBS zir ve tur tho hi keini aia darkar khata tlaiah Kingfisher thlawhna in an rawn thlawk ve dawn a. Ka chhungte nen keimah min kaihruai turin a hma daihin an lo inbia a ni awm a. Airport-ah khan min hrilh chawp a, hmuh erawh kan inhmu hman ta lova. Ka bungruate ka lakfel zawh chuan anni chhungkua nghak chuan keimahin ka lo thu ta ngar ngar a.

Airport Terminal-ah chuan mihring hi an lo tam khawp mai a, an vei nuai nuai mai a, hmelhriat hmuh tumin ka mit ka len ruai a, mahse, an vang kher mai. Ka bulah hian Meitei nu ni awm tak hi a thu ve a, a phun leh niah niah thin a. Tawng lah chu kan inhre tawn der mai si lova. Kan innuih leh ringawt mai thin. Ka ning em em mai a, ka kalsawn ngam bawk si lo, thlawhna lo thleng an puan apiangin ka beng ka lo chhi tang hru zel a, chutia ka awm chu chatuan tluka rei ni hialin ka hria