Zorama

Nipui lai a ni a. Khua a thiangin van boruak zau takah chuan chhum hmuh tur reng reng a awm lo. Khua chu a reh tlawk tlawk a, a khat tawka thlifim rawn thaw heuh heuh thin chuan khaw nawmna a belhchhahin lung a tileng kher mai.

Ral khatah ar a khuang thliai thliai a, hmeichhe naupang tuichawi tur ri le lu pawh an kal liam tawh avangin hriat tur a awm tawh lo. Vanlaizawlah muvanlai a dir cher cher a, thli thawt zawngin ral lehlamah pangpar mawi taka vul chuk rim a rawn nam chem chem bawk a. Hawi velna lam apiang chuan rilru a tih hlim sarh vek avangin he hun hi hun tha a ni a tih loh theih loh.

Chu Nipui nuam em em maiah chuan tlai khat chu ka vahvelna ah hmun pakhat ka thleng a. Chu hmuna Theihai kung hnuaiah chuan Zorama chu mu in ka hmu a. A hmai chu a lukhum pawr tawh taka a khuh avangin a hmuh theih lova. En mai chuan a muhil niin a lang.


A thawmhnaw te chu rei tak suk tawh loh a ni tih hriat takin a bal em em a. A pheikhawk chuan nawhfai a mamawh a ni tih chu hai rual a ni lo. A taksa chuan chawtha a mamawh tih a hriat ngawih ngawih a, a tisa chuan thau tlem azawng chu a mamawh a ni. A bul velah te chuan a tu leh fate an zi nuai nuai a, mahse tumah a mamawh phuhruk tuma che eih hmuh tur an awm lo. Ani, pakhat te mah an awm lo.


Chutia a mut reng lai thli a rawn thaw chuan lukhum a rawn chhem thla a, a hmel pawh chiang takin a hmuh theih ta. A hmel ka hmu chiah chu…… “Karei!!! Engtizia nge ni ta ngai? Heti em em a tar tur a la ni lo asin!” ka ti rilru vawng vawng a.


A hmel ka hmu chu ka lainat kher mai. A kum phu lohvin a lang tar a, a cher zia chu sawiin a siak lo. A hmelah chuan lungngai hmel ka hmu a, hmana Zorama kha hmuh tur a awm tawh lo. Chutih lai chuan ka bulah Awze-a a rawn kal a, ka thil en lai chu rei tak min enpui hnu ah ka lam hawiin, “Zorama hi hetiang reng hi a ni ngai lo asin.” a ti a. Kei chuan, “Eng thil nge thleng ta? Engin nge khuti taka nghaisa ta mai?” ka ti thuai a. Ani chuan uluk takin min en vang vang a, Zorama chanchin chu tihian min hrilh ta a ni.


“Zorama hi pa tha tak leh hrisel tak a ni thin a. A chakin a huaisen a, a taihmak bawk em avangin ei leh barah pawh an intodelhin tu chhungkua mah an awt ngai lo. Amaherawhchu, a kum te a lo tam ve tial tial a, tunhma angin ram hna a khawih tha thei meuh ta lova, a tu leh faten a tih ai tih an tum si loh avangin an tlaran zo ta a ni.

“Duat taka a chawm seilen Mizo-a te unau chuan a pa leh an chhungkaw thatna tur aiin anmahni tisa chakna an ngai pawimawh zawk a, ruihtheih thil chi tinreng tlanin hlemhletna leh rinawm lohna an zir chhova. An pa Zoraman duat taka a zilhhauna te chu mausamin ‘I thing lutuk, I tunlai lo lutuk’ an tihsan a. An huan thlai leh ranvulhte chu chintawk awm lo lekin an tlan a, tunah chuan neih alawi pawh an nei tawh hleinem.

“An pa Zorama zirtirna, heng tlawmngaihna, rinawmna, thuawihna leh a dang tam takte chu an thinlungah an hre na a; zawm an tum chuang hauh lo. An hnathawhna hmanrua, Zoraman hlawhtlin nana alo hman tangkai em em thinte pawh an dah chhe zova, an rula raw neih vel mai mai tawh zawng a ni e.

“Chutiang anih avang chuan an chhungkua hi an tlachhe em em a, nitin ei chawp tur takngial pawh thenawm khawveng ten kan pek khawm a ngai ta hial a ni. An huan leh lo tha tak takte chu miin an rawn chuhpui a, an enkawl mumal loh avangin chuh ngam hek suh. Tunah chuan an ram neih ve te pawh ar hmai tiat lek tak tak a ni ta.

“Chutiang teh hrep chu an nih avangin Zorama hi a na a; a thinlung na avangin chaw a ei thei lova, a eng tih tha mah a tho lova, a nitelin a chak lo tial tial mai a ni. Khutiang reng a nih chuan reilote ah Zorama hi a boral ang a, a in leh lo, huan leh ram leh engkim hi keini ho hian kan la neihsak vek mai dawn a ni.” a ti a. Awze-a chu a kal liam ta a.

A kalliam hnu chuan a thusawi chu ka ngaihtuah let leh a. Mak ka tiin ka rilru a na em em a, Awze-a kuta a thil neih zawng zawng lut turte chu ka ngaingam ngang lo. Ka puanven ka sawi chhing a, ka theihtawpa ringa…. “Aw Zoram, lo lungphang suh. Nangmah chhanchhuak turin ka lokal e, I riltamna te tireh tur leh I chakna te siam tha leh turin ka inpeih e.” ti chungin ka pan phei ta hlawk hlawk a.

I inpeih ve em?

(Hei hi misual.com lamah July 15, 2011 khan chhuah a ni.)