Tawnmang Lasi

Mumang hi thenkhat tan chuan thil ho mai mai, chaw tak khuka khuk pui tlak loh a nih laiin thenkhat erawh chuan an ngai hlu angreng hle thung a. Kei ngei pawh hian mumang hi engvakah mah ka ngai ngai lem lova, sawichhuah pawh ka sawichhuak khat reng a ni. Mahse, mumang thenkhat rilrua cham veng veng thei khawp a awm tlat mai erawh hi chu mak ka ti hle thin.

Zankhat chu mumang mak deuh mai ka mang a. A tuk ah pawh chu mumang chuan ka rilru a luah ta tlat mai a. Mak ka tiin theihnghilh ka tum nasat poh hle a chiang tawlh tawlh mai si a. Chu ka mumang chu ka han hlui dawn che u a ni.

Hemi zan hian ka muhil thei mai lova, zing dar 3 a rik pawhin khumah ka la let ka la let a. Ka mangang chuan mut a tihchhuah beiseiin hla te ka ngaithla a; awmzia erawh a nei lem lo. Chutia mangang taka ka awm lai chuan khawvar lam hnaihah ka lo chhing sek a ni awm a, mumang mak tak mai ka mang ta a ni.

Chu ka mumangah chuan sikul naupang ka lo ni tha leh a, kan uniform chu ka han enchiang a, a rawng a pawl a, eng sikul nge a nih ka hre lo. Ruah sur bur bur karah field trip kan lo nei a ni. Chutia field trip kan neih lai chuan ruah a sur nasat tak em avangin zirtirtute chuan haw mai turin min ti a, kan haw ta a.

Kan haw kawngah chuan hmeichhe pakhat nen kan haw dun a, mumang mi ka hmuhte hi hriatchian ka neih ngai loh vei nen; kha nu kher kher kha chu ka hrechiang kher mai. Ka mumangah chuan ka thianpa Zohlima (hming thlak) nau a lo ni a, a takah erawh ka thianpa chuan nau hmeichhia a nei lo thung. Inngeih em emin kan lokal dun a. Kal pah chuan a awm pawng chuan rem leh rem lovin min rawn nek kher a. Kan kalna lai chu Lucknow Medical College bul ni maiin ka hria.

Chutia kan kal lai chuan flyover bridge pakhat kan thleng a, chu bridge chu Kanpur Central a ni tih ka hre nghal mai a. Amaherawhchu, step kan chhoh lai chuan a chung chu zawi zawiin alo hniam tial tial a, mihring tan kal theihna a nih tak loh avangin kan let leh a, in lianpui maiah hian kan lut ta hlawl a.

Chu in chu kan enchiang a, Police Station alo ni a, 'Date Night' tih film a detective pahnihte kha an lo awm a, min hmuh ve leh min man tumin min rawn um nghal a. Keini chu a rang a rangin kan tlanchhe nghal a. Chutia kan tlanchhiat lai chuan kawtthler pakhatah kan chhuak hlawl a, chu kawtthler chu Shillong khawpuia Synod House bul alo ni reng mai a.

Mak ti taka kan din lai chuan hnung lam atangin ui bauh thawm kan hre leh a, ruahpui vanawn a rawn sur bawk a. Kawng awmchhunah chuan kan tlan zel a, in pakhat kan thleng hlawl a. Chu in chu Saron venga ka pa (godfather) B.Lalthlengliana (Thangkura) te in a lo ni leh daih a. Mak ti tak chungin kan tlan lut a, mahse, chu inah chuan ka pa Thlenga te an lo awm awzawng lo mai a, ka nutei te an lo awm daih thung a.

Kan inhru hul sawk sawk a, thawmhnaw hul te kan hak hnu chuan ka kalpui nu chuan a haw a hun tawh thu sawiin a dana dan rual loh hian a tlanchhuak nghal a. A hnung chiaha ka tlan chhuah pawhin a mawngphe pawh ka hmu hman lo. Chutia a kal ta chu ka ui em em a, ring takin ka tap ta vak vak a, ka nutei chuan min sawi nawk nawk pahin, 'Wake up, OP, Wake up!' a ti tuar tuar a. Ka han harh chuan ka roommate (Naga) hian ka dar alo vuan a, 'I tap nasa lutuk a ka kaitho tawp che a nih kha (You cried too loud so I just wake you up) ' alo ti a.

Sana ka en a, dar 8:43 a.m alo ni a. Tukverhah ka dakchhuak a, ruah chu tam namen lohvin a sur lova. Ka lung a rawn leng ta em em mai a. Ka mumanga mi kha ka ngai a ni. A mak khawp mai. Kha nu kha, a tak takah ka la hmuh ngai awm ka hre lova, mahse, a hmel kha ka hrechiang hle thung a. Tunah hian hmu leh pawh ni ila ka hai lo hrim hrim ang.

Ka rilru te te chuan kha nu te reuh kha khawiah emaw chuan a awm ve ngei awm si a, a tak ngeia tawn ka va chak tak em! Hei hi em ni tawnmang lasi an tih chu? He khawvelah hian a awm ve ngai a nih chuan khuanu zarah engtikah emaw chuan ka la tawng ve em ang a, ka mumang hi ka hrilh ngei ngei ang. Ka ti a, nuih suk pahin thingpui in turin ka kal ta a.