Tluangtea

Zan khat chu ka mut theih loh avangin khumah ka let ka let a, pawn lamah chuan ruah a sur seng seng a, boruak pawh a tinuam phian mai. Sana ka en a, dar 4:59 chiah chiah a ni a. Reilote-ah khua avar mai dawn avangin leh chhun lamah tihtur pawimawh ka neih avangin mutthilh hram ka han tum a, a sawt lo kher mai.

Ka beidawng chuan phone ka han ban a, earphone ka vuah a. A vawh deuh hlek avangin puankawp ka la chhuak a, tumthang hnah tla ang zana ka mut at hnu chuan ka phone-a hla chu ka play a, earphone chu ka bengah ka chuktuah a, ka ngaithla ta vang vang a.

A tir berah chuan The Band Perry - If I Die Young ka han play phawt a, a zaitunu aw tham chil chel chuan beng a fah kher mai. An zai zova, a dang ka play leh a, chu pawh chu a zo leh a, a dang ka ti leh zel a. Chutiang hlir chuan 'Elton John - Nikita' te, 'The Beatles - Something' te, 'John Lennon - Imagine' te, 'Merle Haggard - I'm A Lonesome Fugitive' te leh a dang ka duh deuh deuh hote chu ka ngaithla ta zel a.
Ka lung a lengin rilru in nunhlui a chhuikir a, hmana ka thianpa kha mitthla ah alo lang a. Lung hlui a leng kher mai.

Ka thianpa nen khan Middle sikul naupang kan nih lai vel atanga inkawm tan kan ni a, chutih lai chuan kan thenawm-ah an khaw hlui atangin an rawn pem a, nu leh pa kara awm a nih loh avangin a pi leh a putea nen an khawsa a ni. An rawn awm tir phat atangin kan innel nghal em em a, inkawm tur hrim hrim kan ni emaw tih tur khawpin kan inngaina-in kan inkawp nasa a ni. Ani nen hian nunhlui sawi tur tam tak kan nei a, tunah tlang hranah tuanin inhmu thei tawh lo mah ila, rilru ah tal chuan kan inhriat tawn reng ka ring tlat a ni.

Ka thianpa kha kum thu ah chuan kei aiin kum 3 dawnin a naupang a. U angin min en a, keiin nau ang chiahin ka en bawk a. Football kan khelh leh kan khel hova, marble perh leh rubber kahthlak chenin kan ti ho thin. Marble perh kha a thiam em em a, a hmanthiam a hman phei chuan hla tak atang pawhin a fuh nalh nalh thin. Kan thei duhzawng a inang lehzel te kha mak ka ti thin. Kha vang khan kan kawlthei kung khan a tuar nasa thin reng bawk a. Tum khat chu kawlthei kan lo ho laiin a kakpuiah a malpui a titang alawm maw le, kan phelh thei tawh silo, a tap nasa tawh si, ka mangang lutuk chuan a putea ka zuk kova, engtin tin emaw a rawn lachhuak ta hram a ni.

Kan vengah khan thing hnawih nala kawngpuia tawlh kan hrat thei hle a, chartin bung kan la a, a hmawrah thing kan kilh bet a, mombati leh khawnvartui hmangin kan hnawih nal a, kan tawlh vak mai thin a, ka thianpa nen khan nuam kan ti thei teh asin aw. Theihmu lawh kha kan hrat thei em em bawk a, kan han lawn a, mahni seat theuhah kan han thu a, hmui leh kut duk vek khawpin kan han tlan ta thin a, engdang mah kha kan ngai ngai lo. Mahse theihmu kha chu kua khan a ngeih vak lo thin.

Ka thianpa khan zai kha a ngaina em em bawk a, a chunga ka sawi tak hlate kha kan han ngaithla a, chutah nau chaw rawtna kan han lek a, a thu dik leh dik loh pawh pawisa lovin, mahni hriat dan danin kan sa mai thin kha a nia. Tun hnua ka ngaihtuah chhuah leh chang hian lung zawng a tileng thin teh e. Vanlalsailova hi a ngaisang em em bawk a, a hla kha hriatchhuah loh a neih pawh ka hre lo. Chuti taka a ngaihsan vang chuan kan venga Vanlalsailova concert pawh khawchhe hnuaiah kan endun ve ngat a ni.

Chawlhni alo thlen changte khan kohhran a inan loh avangin kan han inkhawm hrang a, ban veleh chawthing bar turin kan in a rawn pan ngei ngei thin. A rei tak deuh hnu phei kha chuan kan biak in lamah a rawn inkhawm ve ta daih a, a chhungte lung nih loh ka hlauhpui viau na a, engmah an sawi tak loh avangin a rawn inkhawm chhunzawm ve ta zel a ni. Keini thiandun kha kan inkawmngeih em avangin thian dang kha kan ngai lo reng reng a, kan inkawp chawt reng mai a ni.

Chutia kan inkawm chhohva, kan inthlakhlelh em em lai chuan Kolasib lamah inhmun an lei a, inte an sa a, reilote-ah Kolasib Diakkawn Vengah min pem thlak san ta daih a. Chuta chin chu hei kum 8 dawn lai kan inhmu ta lova a ni. A la dam ve te a nih chuan engtikah emaw kan la inhmuh leh ngei ka beisei tlat a ni. Ka thianpa Tluangtea kha.

(Hei hi misual.com lamah July 28, 2011 khan chhuah a ni.)