To My Daddy - A Chhiar Ngai Loh Tur Lehkhathawn Chu...

Ka Pa,

Tun huna hetiang thu ziah a ngai ta mai hi a mak ka tiin hriatthiam har ka ti. Ka theihnghilh thei lo, kha ni, June 2, 2007 kha. Khami ni khan nilengin ka lung a leng a, ka school banah pawh ka ngaih em che avangin in office ah ka rawn tlawh hial che a nih kha.

Nang chuan chhuang tak maiin i thawhpuite bulah, '' Hei ka fapa St Paul's-a kal a nih hi.'' i ti a. Min chhuang tiraw, pa? Keipawh ka inchhuang asin! Heng ka lehkha zirnaa ka hlawhtlinna zawng zawng te hi i mi fuihna rah a ni asin. Zanah ka lehkha zir chhung zawng min menpui a, chhuna hah taka hna i thawk chunga thingpui min lum sak tura i men tang tang thinte kha ka theihnghilh lo asin.

Pa, nang anga pa tha, dikna duh hi an awm ve angem le? Ka pa, ka chhuang takzet che asin! Pawl sarih ka zir kuma scholarship dilnaa kum khata Rs 50,000 /- lalut lo tan tih a inziah tum kha ila hria em? '' Kan sum lak luh chu beitham hle mah se Rs 50,000 chu kan lalut tling ve e. Dawt sawi ai chuan I dillo mai ang.'' I tih kha! A hunlai kha chuan ka hrethiam lovin thianten scholarship an lak sap sap laia ka lak ve loh avangte khan ka haw lek lek thin che asin. Mahse, tunah hian I thil loh tih hlutzia kha ka hrechhuak tawh asin. Kha vang khan dik lo taka sum lak luh chakna reng ka nei ngai lo.

Pa, kha ni, June 2,2007 a in office ka rawn kal khan bus stand thleng min thlah a, hna in ngah avanga I rawn haw tlai maithei tih I sawi laite khan I damlai hmel ka hmuh tawpna tur a ni tih ka ngaihtuah pha hauh lo. Hria ila chuan ka hawsan tawp lovang che.
Pa, chhun maia kan inhmuh avang khan a zan lawka min kalsan ka ring pha ngai lo. Mahse, mahse,...kha zan, zan tihbaiawm kha. I lo haw har avanga ngaihtha lo taka ka nu nen kan awm laia I thih thu phone-a kan dawng ta mai kha awi har ka va ti tak em!

Pa, I ruang kha! Nangmah I nih ka ring thei lo. Khati taka na I tuar mai kha! Chhun maiah pawh ka hmu che a, na pakhatmah I nei silo. Engatinge zanah thihna khawp hiala na I tawrh tak mai le? A na ka va ti tak em!

I ruang kha ka thlir reng a, ka biangah mittui luang tur reng reng a awm lo; tah pawh ka tap hek lo. Mahse, ka rilru chu a na a ni, pa, a na ka va ti em!

I thih hnu ni tam tak a liam hnu pawh khan Ilo haw leh mai beiseiin ka lo thlir reng thin che a. Chaw ei dawna chaw ka khawrh te hian I thleng turte ka lo khawrh tel leh reng thin. Pa, I thih ni atang khan mut hmunah keimahin ka tap thin a, min hnemtu I awm silo.

Kum dang ang bawkin thlasik te pawh alo thleng leh thin a, pa, thlasik dang ang thovin ka ruhseh te kha a chhuak leh thin a. Pa, zanlaia tuiluma min dehsak thinte kha ka la theihnghilh reng reng lo.

Pa, I ngaihsan em em inkhel en na tur TV pawh kan nei ve tawh asin. Mi ina en a inthlahrunawm zia I sawi thin kha ka la hre reng a, mahni in lum ngeia World Cup en I chakzia I sawi thin pawh ka la theihnghilh hek lo. Pa, kan in ngei ah TV kan hung ve tawh asin. Rawn haw la, rawn en ta che. Pa, Pawl 12 ka pass thute kha ila hre ve lo tiraw? MBBS ka zir thute pawh ila hre lo ang tiraw? Pa, I fapa hi reilote-ah Doctor a ni tawh dawn asin.

Pa, kan zirtirtute chuan maw, fee kan pek tlai deuh chuan min hau a, in ngaihsak lo lutuk a nih hi an ti thin. Mahse, pa ka nei tawh lo che tih leh nau dang 3 enkawl ngai ka nu in a nei tih an hre silo. Nang chu la dam la chuan fee pawh a hun diktakah kan pe thei ang tiraw?

Pa, ka thianpa chuan vanram a awm loh thu a sawi a, dawt a sawi tiraw? Tunah nangman min nghak mek tiraw? Pa, min chhang teh. Mi te chuan khua reiah khawhar chu a kiang thin an tia, mahse, pa, kum 4 a liam ta, nikhat pawh nangmah ngaihtuah lovin hun ka hmang ngailo. Inrinni apianga bazara min hruai thinte, tuktin exer la tura min kaihthawh thinte kha ka la theihnghilh ngai lo.

Pa, ka ngai takzet che a ni. Nakinah ka hun a thlen ve hunah min lo hmuak ang che aw. Nakinah, thih awm tawh lohna, natna leh tahna awm tawh lohna ah kan intawng leh dawn nia. Pa, ka va ngai tak che em! Tihtheih dang ka nei silo. Pa, ka hmangaih che.

From,
I Fapa.