The Girl From Yesterday

Ka phone ri ral ral chuan min ti harh zawk a. Sana ka en vat a, dar 5:23 a.m a lo ni a. Tunge tun ang zing thang thanga mi rawn biak tum chu ni ang aw tiin peih leh peih lovin ka han ban a. Min rawn call tu chu number ka hriat ngai loh a nih avangin hawihhawm thei ang bera chhan tumin ka aw ka thian te te a, ''Hello'' ka'n ti puam vei talh a.

Min rawn betu aw chu ka hriat than a ni tlat mai le! Chu aw chuan ka mutchhuak a hnawt kiang nghal duak a, ka thu ngil nghal ngawt a. Reilote chhungin ka taksa pumpui hi a fanchhuak vek hman hialin ka hria. Ka kha a chih zova, ka kaihza te chu a sai hlawk hlawk a, ka awmdan chu ka hrethiam lova, tih danglamin ka awm zo a ni ber mai.

Thu tam a sawi lo, "Vawiin-ah hun I neih chuan inhmu ang hmiang?" tih mai te hi a ni. A sawi zawh chuan phone chu a dah nghal a, engmah sawina hun ka nei lo. Chutihlai chuan ka nupui zing tlan pawh a rawn thleng ve chiah a, thingpui sa vet vawt min rawn pek pahin an hnathawhna chanchin min hrilh malh malh a. A khat mawi tawka "E, a ni maw?" tia ka lo chhan ve bauh bauh lai chuan ka ngaihtuahna erawh hmundangah a awm daih thung a. Mahse, a hre lem lo niin a lang.


Chumi ni chu Inrinni a nih avangin hna kan chawl a, tukthuan ei zawh ah kan inhmuhna tur lam pan chuan ka chhuak ta a. Kan inhmuhna tur hi hrilh ka ngai lova, a hun tur pawh hrilh ka ngai hek lo. Kum tam tak liam ta ah khan he hmunah hian kan lo inhmu tawh thin a, a hun pawh dar 2:00 p.m chiah chiah ah a ni tih chu tuma hrilh ngai lovin ka chiang em em a ni.

Hmanah chuan ka hmangaih a ni thin a, ani pawhin min hmangaih thin. Kan inngaiin kan inthlahlel em em thin a, amaherawhchu khaw hran a awm kan nih avang leh zirlai ve ve kan nih avangin inrinni ah lo chuan inhmuhna hun kan nei ngai lova, phone erawh chuan kan inbe chamchi thin a ni.

Ka theihnghilh thei lo. A hmel duhawmna a khat leh a sakruang van angel ianga duhawm kha! Ni sensa hnuaia a nui hmel leh khawvawt kara a vawt ti hmel duhawm si zia te nen khan! Ani kha ka engkim a ni a, atan chuan engpawh ka huam ti ila ka la uar tawk lo mah mah maithei a ni. Ka hmangaih hmasak ber a ni a, ani ka hmangaih ang khan midang ka hmangaih leh theih ka ring ngai lo.

Chutiang taka ka hmangaih avang chuan Rose par mawi ber pawhin hling a neih tlatna khawvelah hian hlimna tluantling a awm lo tih ka lo theihnghilh avangin tih at in ka awm a. Ka Rose par chuan a hlingin min chhun ta a ni! Ka hriat tirh chuan ka ring phal lo. Ka ring phal lo ni lovin ka ring duh lo a ni mah zawk. Mahse, ka mit ngeia an inneihna tur lehkha tar ka va hmuh meuh chuan ka kehchhe zova, ka lak atangin beiseina zawng zawng lak bovin a awm a. Ka tan khawvel chu engmahlo mai a chang zo ta!

Chuta chin kum 8 lai kan inhmu leh ta lova. A chanchin hriat ka nei lova, hriat ka duh hek lo. Ka theih ang tawkin theihnghilh tumin ka bei a, mahse, a har ka ti ngang mai. Ni a liam a, thla a liam a. Kum hial a vei hnu chuan zawi zawiin ka thinlung chhungril ah hmun a chang tlem tial tial, nupui hial ka neih ve hnu phei chuan amah ngaihtuah lovin hun ka hmang liam ve thei ta hram a. Mahse, hmangaih hmasak ber na na na chu theihnghilh hmin thak a har a niang, vawiin ah amah hmu turin ka kal leh ta hnu hnu si a nih hi!

Ka va thlen chuan alo awm reng tawh a. Ka han en a, a hmel chu a that ngai rengin alo la tha a, a duhawmna pawh ala danglam lo. Min rawn en a, a mittui a parawl kuang a, a rilru in hun liam tawh hnu a chhuikir a ni ngei ang! A bulah ka thu ve nghal a, rei tak inbe lova kan thut hnu chuan a rilru hah zia leh a nun beidawn zia min hrilh ta a. An nupa nun hlim loh zia te, a thutlukna siama a inchhir ziate leh thildang tam tak min hrilh a. Ka rilru chuan ka khawngaihin duat taka kuah a, hmanlai anga hmangaihna chen ka nap ngei mai. Mahse, tunah chuan a rem tawh si lo.

A tawpah chuan ka ngaihdamna dil pahin "Vawikhat chiah chance min pe leh rawh." a ti a. Ka nupui neih thu a hre lo a ni ngei ang. Ni e, keipawhin theih chu nise chance vawikhat pek leh chu ka hnial reng reng lo. Mahse, tunah chuan a tlai tawh a ni. A tlai lutuk tawh!

Chu thu a hriat chuan hrethiam takin a bu nghat nghat a, a bianga mittui luang hruk pahin a kal liam ta a. A kalna hnu chu ka thlir reng a, vawikhat thutlukna siam sual avanga inchhirna a khat ka hmangaih kal liam ta chu zawi sap a, "Mangtha le" ti chung zelin ka thlah liam ta a ni.

"She doesn't know what's right,
She doesn't know what's wrong.
How someone who had been so close,
Could be so far away?
Now, she'll always be The Girl From Yesterday.