World Record Ka Siam Ve a!

Kan hre theuh awm e, Mizoramin Cheraw kan tam ber hmanga World Record a siam kha! Kha mi ṭum khan alawm, Aizawla High School pakhatah zirtirtu a ka tan lai a ni a. Mizo Hnam lam hrim hrim hi ka tuina zawng a nih avang leh kum 9 mi ka nih atanga Lammuala Chapchar Kut lawmna a lo lam tawh ka nih avangin ka zirlai naupangte chu Hnam lam zirtir ka chak ta hle mai a. Principal hnenah ka sawi a, ani pawhin tha a tih zawng tak a nih avangin naupang ho chu lam zirtir a, World Record siamtute zinga tel tir ve ngei chu kan tum ta a ni.

Chumi ni chuan Art & Culture pisa ah ka han leng a, World Record siamtute zinga tel ve kan chak thu te ka han sawi a. Anni chuan phur tak maiin min lo dawngsawng a, dawr an nuamin biak vel pawh an nuam khawp mai. Tichuan, thawmhnaw ngai turte min hrilh a, lam rem tur music track min pe bawk a, kan sikul hming chu kan han ziak lut ve ta a ni.

Tichuan le, lam zir chu kan han tan ta a, lam ngai miah lo an nih avangin a khirh talh talh hle. Mau pawh la hmang lovin lei ah chalk in line kan rin a, chumi line hmang chuan a lam dan chu kan inzirtir tan ta a ni. A tirah chuan an phur ve khawp a, ka han sawi phur pui ve luam bawk a. Amaherawhchu, kan zir rei tial tial a, an thiam har em em mai a. Anmahni pawh an beidawng lek lek tawh a, keipawh ka beidawng titih hman hial a.

Mahse, ka thinlungah, "Heng naupang te te te hi mahni hnam lam pawh thiam lova an awm chuan tu leh fate an neih hunah an la rawn dem hlauh dah ange" tih hi a rawn awm a. Art & Culture lamin track min pekte chu uluk lehzualin kan zirchiang a, a video pawh vawi sawmnga chuang kan en nawn hial a. Naupang ho hnenah pawh an tih hram hram chuan an tan a hlawk dan tur leh anmahni pawhin an kumkhaw sawi a tlin dawn zia te chu ka thiam ang tawkin ka hrilh ve a, kan bei tha leh ta a ni.

Chutia kan han zir tha leh ta chu rin ai daihin an thiam chak ta mai a. Ka hlim em em mai a, reilote ah mau pawh chu kan lei ta a, mau nen pawh an lam thiam ve ta! Chutia kar hnih dawn lai kan zir hnu chuan kan vanneih a siamin kan sikul bulah chuan Nunna Lal Hnam thalai ten lam an rawn zir ve hlauh mai a, an hotute ka biak hnu chuan ka naupangte chu zirtir ve an inhuam ta mai a! Kei ka lawm, naupang ho lah an lawm! Kan lawm tlang vek a ni ber e.

Tichuan, Hnam lam thiam em em mai U RS-i te, U Mami te, U Vana te leh midang ho chuan discipline khauh tak hnuaiah an zirtir ve ta a, an thiam chakin kar lovah a step zawng zawng chu an thiam ta mai a! Khami ni a ka lawm zia kha sawiin a siak lo. Nitin sikul banah kan zir ṭhin a, Inrinni ah pawh kan awl chuang lo. Inrinni a an rawn kal chuan ka neih zawng zawng sengin thingpui te ka lo lumsak ve a, nuam an ti ve hle thin a ni.

Tlai khat chu chutia lam kan zir mup mup lai chuan beisei loh deuh maiin Zikpuii of LPS hian min rawn tlawh thut mai a, kan zir dan leh inbuatsaih dante min rawn zawt a, naupang ho lam laite chu an video camera chuan an han la bawk a, chutah zet chuan kan phurin kan thil zir chu a tak ngei atan a ni tih a chiang ta takzet mai! Ka lawmna em em pakhat chu kan zirlai pahnih, Myanmar lam a tanga lo pem thla, Lusei tawng pawh thiam thathum lo ten Mizo Hnam lam an thiam kha a ni!

Tichuan le, World Record siam ni chu a lo thleng ta a. Zing hma takah sikul an rawn thleng hlawm a. Hmeichhe ho chuan Tualtah kawr, Ka Nu thui ngat leh Hmar am an rawn inbel a. An nalh kher mai! Mipa ho lah chuan Pawndum an rawn veng a, diar an rawn khim far bawk a. Zep lovah chuan ka en ning lo a ni ber! Mahse, chanchin lawmawm loh deuh mai kan hre ta tlat mai. A khawng tura kan ruat mipa pahnihin damlohna avanga an tel theih loh tur thu min rawn hrilh ta tlat mai le!

A tir atangin dam mawh hritlan thilthu ah tiin substitute atan pakhat chu kan nei sa hrim hrim a. Mahse, pahnih lai an theih dawn loh avangin loh theih lovin ka khawn ve mai a ngai dawn ta a ni. Naupang hlanga kan tir ka tum avangin a tirah pawh ka khawng ve duh lo kha a ni a, amaherawh chu, tulna in min nan miau avangin ka tel ve chu a ngai ta a. Naupang ho lah chu an la lawm phian lehnghal a!

Kan kim hnu chuan kan chhuak tan ta a. Hotu lam ten kan awmna tura an ruat Vanapa Hall chhak kawngpui ah chuan kan innghat ve ta rup a. Lammual atang chuan mau kan va la a, kan inrem fel ta a, thupek chiah kan nghak ta a ni. Chutia kan nghah lai chuan kan vanneih a siamin Pi Bawihchhingpuii a lokal hlauh mai a, thla te kan han lakpui ang nawk nawk a.

Tichuan le, vawi hnih rehearsal kan neih hnu chuan World Record siam na tur lam chu kan tan ta a, phur em em in, nui sangin kan lam tan ta a. Ka naupangte chuan vawikhatmah tisuai lovin nisa hnuai ah an kan chhuak zak a, ka va chhuangin ka va lawm tak em! Lam zawh hnu chuan Lammuaiah kan lut khawm a. Minister Pu Zoramsangliana chuan World Record kan siam thu a rawn puang ta a.

Mipui chu kan haw haw dur dur a. Hmel hriat a sawi theih tawh lova; bula mi hmuh remchan apiang chu kan kuah chawt a, kan inchibai a, tupawh mai kha kan hlim em em vek mai a ni. Chutah, zaithiam in min la awi zui bawk a, mipui chu kan lam dual dual a, kan intirameikai thul!

Chutia kan hlim em em lai chuan ka che chhe leh pek a, ka puan ven a tla ta. A hnuaiah kekawr bul hak nachang ka lo hre si lo! Kekawrte nen ka ding ta thawi mai a, chutih lai tak chuan Doordarshan thla la tuten an rawn la fuh hlauh lehnghal a! In lama lo en tu ka chhungten rei fe chu mi chhaih nan tak an la hmang lehnghal a, nuih a za duh lo khawp mai!

Tichuan ni chu kan hmang liam ta a. World Record siam tute zinga ka tel ve ta a ni!