Mizo Tlangval Kanpur-ah - I

Nikhat chu khua a lum em avangin inchhungah fan hnuaiah ka thu thlandai mai mai a. Hemi ni hi holiday a nih avangin thian thenkhatte chu an in lamah an haw hlawm a ni. Kan hostel pawh chu a reh ruih a, ka tihtur hre lo chuan thlalak hluite ka bih mai mai a. Lehkha zir tur chu dawhkanah a inchhawp hnur nachungin ka zir peih thlawt loh avangin melh pawh ka melh peih lo.

Chutia ka awm lai chuan tuna ka lehkha zirna khua Kanpur ka thlen hnua ka hun hman tawh dante ka ngaihtuah kir neuh neuhva. Ka la awm rei lo hle nachungin hun hlimawm tak tak ka tawng hnem ve ta hle mai. Chung ka thil tawn hlimawm tak takte chu thamral mai tura pamhmai ka tih em avangin ka Kawmpiutar ka tinung a, ka chhu ve ta kauh kauhva….

Zawngin min um

Hei hi ka thil tawn tawh zingah chuan ka theihnghilh tawh ngai loh tur a ni hial ang. Kanpur ka awm tan tirh lai a ni a, Pathianni a nih avangin kan tho tlai hlawm hle a. Khua a lum em avangin ka thianpa nen inchung zawlah thlifim dawn tumin kan chho a, hetih lai vel hian thian dangte chu an la tho hlawm lova, hostel pawh a reh thuap nghe nghe a.

Kailawna kan chhoh lai chuan ka phone ka theihnghilh tih ka hrechhuak a, hmanhmawh deuhvin ka tlan let leh thuai a. Chutah le…, room ka thleng tep tihin bawlhhlawh bawm phen atangin Zawng lian em em mai hi a rawn zuang chhuak thut mai a leh!

Ka ding chawt a, rang lutukin ka tlan let; min rawn um! A rawn tlan chak nasa mai a, min rawn ban pha deuh zuau zuau hman a. Chuveleh ka tlanchak zual sauhva, kan ri le lu ta mai a. Kan thawmah thiante an rawn chhuak a, an rawn hnawt bo ta hram a ni.
Motor-in min su leh lo

Inrinni a ni a. Inrinni apianga Mess an khar thin avangin ka thianpa nen Gumti (bazar hmun pakhat) lamah chaw ei turin kan kal a. Kan kalna tur hi cycle rickshaw in minute 15 vel kal a ni awm e.

Chutia kan kal lai chuan kawng kan ngei ngei a ngaihna hmun kan thleng a. Rickshaw pu chuan motor kal vel pawh ngaichang map lovin tlan tlang nghal mai a tum a.

Chutih lai chuan vei lampang atangin bus lian em em mai hi chak takin a rawn tlan a. Min rawn su ngei dawnin kan hria a. Ka thianpa nen chuan kan mangang nasa mai a.

Khawlai mi tamna lai takah chuan kan au ri teng tung ta mai a. Bus chu a rawn hnai zel a, min su lo tawk chiahin kan hnungah min tlanpel fua. Rickshaw pu kan hau nasa ngei mai.

Vaitawng ka thiam lo

Vaitawng kan tih mai ‘Hindi’ hi Mizoram ka awm lai atang tawh khan ka harsat em em mai a. Naupan lai atanga vai film en duh ngai lo leh an tawng phei chu zir tum eih ngai lo ka nih avangin hetia vai tawng hmanna hmuna ka zuk awm pawh hian harsatna ka tawk hnem ngei mai.

Tum khat chu Haematology lab ah kan awm a. Hemi lab-a kan tih ber chu kan kut kan vit thi a, mahni thisen kan exam thin a ni.

Chutia mahni buai buaia kan invih sawk sawk lai chuan zirtirtu pakhat hian min rawn kova, ka va phei a. A bul ka la thleng lo, ka kal phei lai chuan a ngai leh lo a ti a niang chu, ”Tum jao” a rawn ti a.

Kei pek chuan hmanhmawh rawh a tihna a niang chu tiin hmanhmawh tawkin a lam panin ka la tlan phei ta deuh deuh. Min nuih dur dur a, ka sen ve deuh ten ten..

Hei lo pawh hi sawi tur tam tak a awm a, mahse, a sei lutuk dawn e, duhtawk phawt ang.

Hei hi misual.com lamah May 28, 2011 khan chhuah a ni.