Thuhma pawh nei lem lovin a hmaa mi kha chhunzawm thuai mai ang aw! :)
Rel Tlai Uchuak
1st year kumtawp exam kan zo chiah chu(h!), rilru hi a han thawveng mai mai khawp a. Kum khat taltawp mahni in pawh hmu lova Kanpur-a ka tal hnuin haw na hun alo thleng ta kha lawm lo thei ka ni lo.
Intithei tak maiin rel ticket ka han la a, in thlen vat vat ka chak tawh em avangin North East Express 'Super Fast Train' ngat kha ka han la a, ka va han intithei tak em aw! Khatih laia ka hlimzia kha thu maia sawifiah chi ziazang a ni lo.
Haw ni chu alo thleng ta a leh! Ticket ah dar 1:00 p.m a chhuak tur a tih avangin dar 12:00 noon velah Angaiha nen a bike-in hostel atangin kan inphur chhuak ta a nih kha!
Kal lam atangin kan han tluang lo em em khawp a, Gumti ah traffic police in min lo tiding! Documents engkim fel thlap kan hmuhtir pawhin kal an phal ta tlat lo ma a. Kan mang a angin tlai a hlauhawm tawh ropui mai a si a. Kan rel ticket phawrh meuh chung pawha min kaltir duh miau loh avangin tihngaihna awm hek lo le, bike chu kawngsirah kan dah sawk sawk a, auto rickshaw kan phar ta a.
Chutih lai chuan an hotu pakhat a rawn thleng a, eng eng emaw a sawi hnu in bike nen chuan min kaltir ta hlauh mai a. Ka thaw huai nghe nghe a ni.
Rel station kan thlen meuh chuan dar 1:15 p.m vel a lo ni tawh a. Hmanhmawh baklengin kan tlanlut; chart kan en, North East Express 'Super Fast Train' zawnah chuan 'DELAYED' alo ti kuau mai!
Kan han zawt chiang a, darkar 6 ngawt maiin alo tlai a nih chu! Awi karei! Engtin nge ka tih tak ang? Hostel lama phei leh kan peih loh avangin station platform ah thuthmun kan rem a, kan nghak ta a.
Kan bulah vai an rawn thu a, an kal leh a. An rawn thu leh a; an kal leh a. Chutiang reng reng chuan hun kan hmangral ve bek bek a. Station aurinna hmanga "Kripiya, dhan dhijiye, gari number ...blah...blah...blah..." te pawh chu ka lo zawm zut zut thei tawh a. Chutihlai chuan kan hostel atangin ka senior pahnih Tlana leh Lakshing te chu ka roommate Temsu thlah turin an rawn thleng ve bawk a. Ani chu Rajdhani Express a haw tur a ni.
Min han hmu chu mak an ti khawp a. Kan han innuih ang the thaw a, kan chanchin ngaihnawm loh takte chu kan inhrilh hlawm a. Angaiha chu a nawmsam loh deuh avangin min pheisan mai turin kan ti a, hostel lamah min hawsan ta a, Temsu haw hnu pawh chuan Tlana leh Lakshing te chuan min la thutpui reng a.
Dar 10:00 p.m a ri ta a, kan rel pawh chu a lokal tawh dawn lo a niang a tia kan phun kan phun hnuah a lo lang ve ta hram hram a. Bungrua te kan hlang a, ka seniorte nena kan inmangtha hnua kan kal tan meuh chuan dar 10:30 p.m a ri der nia! Kha rel han tlai uchuak zia kha chu aw!
Present dawrah
Kanpur-a pa bera kan neih U Johny leh a fanu Moi Moii te birthday kan lawm dawn tumin present lei ve ila kan tia, kan kal ta alawm. An birthday hi a inang chiah a. Kei, Peter leh Nicky kan ni a.
Dawr kan va lut chu lei mai tur kan van angreng hle a, rei ngial kan en hnu in Teddy Bear leh Parker Pen kan lei ta ringawt a. Chutia Present lei ve ta chu tuam lohva ken kan hreh avangin lehkhamawi hmangin tuam tir ve ngei kha kan tum a, hemi tum hian kan nui hnem kher mai.
Present tuamtupa chuan pen chu a ngai ngaiin, bawm ah pawh thun mawi eih lovin a han tuam phawt a, chutah naute lem chu pen tuam ang bawk chuan tuam a han tum lehnghal mai a, keini chuan bawm chhunga khung mawi ve tal turin kan ti a, chuveleh chuan a kalbo ta daih a. Rei tawk fang a kalbo hnu, keini pawhin a titau ta mai em niang aw kan tih tawh hnu ah pen bawm pahnih kengin a rawn let leh a, chu chu a zawm a, leng leh leng lovin naute lem chu a thun a, a tuamhnan ta a nih chu mawle!
Kan nuih a za em em mai a, kan nui ri ngam bawk si lo. Chutah pen pawh chu bawm chhunga khung ve tura kan tih avangin a han lut bo leh vang vang a, bawm lian fahran mai, naute lem pawh thawl hal hal tur kha a rawn la a, chutah chuan pen chu a thun leh ta a nih chu! Mittui tla phungin kan nui nia mawle! Hetia han sawichhawn leh hian a hun laia a nuihzatthlak ang hu in a sawi leh theih thin lova, a hun lai chuan awm ve la chuan I nui ve tho vang.! :-D
Awle, a sei lutuk dawn e, I duhtawk leh hrih phawt mai ang!
No comments:
Post a Comment