Amah chu tlangval zuanzang tak a ni a. Fiamthu a duh in mi biangbiak a thiam a, vawikhat ka hmuhna mah ni se ka ngaina nghal hle. A Facebook profile a a thlalak te chu hmu fo mah ila, a takah han hmuh takah chuan tlemin a lo dang deuh bawk nen, kan han innuih ang the thaw a. Hlim takin kan inkawm a, zanah kham lo takin kan inthlah ta a ni. Chu chu a taka ka thianpa Pega Pachuau ka hmuh hmasakna ber a ni a, ka hmuh hnuhnun ber a ni bawk.
Facebook hi ka hmelhriatna a la rei lo hle a, kum 2010 kum tawp lam khan thianten an sawi nak nak hnu ah hawkdak vak hrim hrimin ka siam ve a. Ka han belhchian hnu chuan a lo hlimawmin zawngchhang a awl hle mai a. Group te an siam a, hnam bil group an siam phei chu a tha ka tiin in unauna tha tak niin ka hria a. Keipawh Pachuau ka nih angin ka hnampuite nen inhmelhriat lehzual chakna a lo awm a, amaherawhchu Pachuau group ka hmuh mai loh avangin siam mai tha in ka hre ta a.
Tichuan, July 2, 2011 zan dar 8:10 khan PACHUAU RUN chu ka siam ve ta rawi a. Pachuau ka hriat ang angte chu ka senglut zel a, annin an thiante an rawn senglut ve zel bawk a. Chutia hnam khat awmkhawm ta chu kan titi duhzawng a inrual a, kan duh a inang bawk a, kan hlim ve hle a ni.
Hun a kal zel a, kan Group pawh member an pung chak a, kei ka zirna lamah chawlh ka hmu thei hlauh bawk a. Ka haw lai denchhen chuan Group mi leh sate kan inpawh lehzual nan chaweikhawm kan rawt ta a. Tichuan, hma la in a bik takin Sangzuala te, Mai te leh midang tam tak hmalakna azar ah August 27, 2011 khan Ritz Hotel ah chaw eikhawm kan nei ta a ni.
Hetah hian member engemaw zat kan kalkhawm a, Pega pawh chu lo tel ve in titi vawrh tu ber a ni a. Tin, amah hi KTP Drama inchansiak, Zonet a an chhuah ah khan Mission Vengthlang KTP Drama ah Sailokhawma lem a chan avangin ka lo ralkhat hmelhriat sa a ni hrim hrim a. Ka blog te kan enho a, a blog te kan enho bawk a.
Chaw ei dawnah pawh tawngtai chuhin a tawngtai zawhah puar taka eiin thla te kan lak leh hnu ah kan tin ta a ni. Hemi hnu hian hmu leh tawh lo mah ila facebook kaltlangin kan inbe reng a, kan Group ah member active ber pawl niin a fiamthu leh Pathian thu tha tak tak a post te chu kan Group timawitu ber a ni reng thin.
Ka blog pawh hi a rawn chhiar ve thin a, fak ngai fakin sel ngai a sel a. Thurawn tha tak tak min pek thinte kha ka tan chuan theihnghilh chi a ni tawh lovang. A blog a post tur a ziah chang pawhin min rawn rawn a, kei tehlul hi proof reading te min neihtir ve thin a ni.
Khatia hlim taka kan inkawm lai khan amah hi ka lo hrechiang lo hle a lo ni a. Amah ah rilru lam natna thuk tak neiin a nun a tuihal zia te kha ka lo hmuh hmaih thin a lo ni a. Tuna a message ka chhiar nawn lehte hian a thusawite kha a thuthiam vanga khabe sep mai maiah ka lo ngai thin a. Mahse, a tak tak a lo ni si! Aw! Thianpa, i thian nih hi ka lo va tlin lo tak em!
Tunhnai thla hnih khat vel chu kan inbe mumal ta lova. Kei ka zirlai ah ka lo buai bawk nen thu mumal kan sawi ta lova. Mahse, hetih chhung zawng pawh hian a harsatna chu a rukin a lo tuar ngat ngat mai a lo ni a. Zanin April 19, 2012 zan 7:30 a a chatuan hmun a pan tak thleng khan a thianpa hi atan ka awm lo a nih chu. Inchhir a sawt lo nachungin ka inchhir a; a sawt tawh si lo. Thianpa, min ngaidam ang che!
Zanin tlaia Mai Pachuau in "Pega Pachuau a boral." a rawn tihte khan awi harsa ka ti a. Rang takin a phone ka call a, chhangtu an awm si lo. A facebook profile ka en a, uina thu an lo ziak tlar duah tawh a. Karei! Thianpa, a pawi ka va ti tak em! Rang takin kan Group ka lut a, a thlalak leh a post ah te ui na thu an lo ziak sap sap a. Chhiar a harsa ka tiin hrehawm ka va ti tehlul em!
A damlaiin a tan ka awm lo a, a thih hnu ah pawh a ruang kil tur tal pawha ka awm lo hi a na ka ti a ni. A tana ka tih ve theih tawk tiin kan Group chu member post theih lohin ka siam nghal a. Group photo ah kan chaweikhawm tuma a tawngtai lai ngei mai kha hmangin a pual liau liau in blog post pawh ka ziak ta hial a ni. Thianpa, i tana ka tihtheih hi a va tlem tak em! Lo pawm hram ang che aw. Pialral ah, nat leh rilru hah awm tawh lohna ah i awm tawh bik si a. Kan rawn hre reng ang che.
A puala post ah hian amah uina thu kan group member thenkhatte ziah hi dah loh theih loh niin ka hria...
Dorothy Pachuau : May ur soul Rest In Peace Dear Bro Pega Pachuau ♥
Angaihi Pachuau : Pega, a mak hi
ka tia..engtizia nge ni ngai..kan lo van hrechiang lo che em,i unaute hi min ngaidam ang che
I vul lai a tawi lua e, he lei ah
inkawm ve hman lo mah ila, van
hmun nuam ah kan inkawm ve
tawh ngei ang, a chhungte Lalpa
awmpui in veng zel ang
che...amen
Kan Run tan a thil tha duh tu leh fiamthu duh em em tu ni bawk
Pega Pachuau kan theihnghilh
tawh ngailo ang che.. I unau te
hian
Thianpa i hahchawlh na hmun ah
chuan muang ten chawl ang che aw... Hrilh kan hai tak zet zet
ani..magtha aw..
Pega. ..ka hrethiam thei thlawt lo, ..
Nga ti nge min kalsan .. A na thlawt a ni ..
King PT Pachuau : Chaw ei khawm zan ka dawn kir a lung a leng in rilru avan na ve
oooo Pega tiang zawng kher kher a
thlafam changa pialral min pan
san tur chuan ka la dah phal mawlh lo che asin le. Pega RIP we miss u....
Tin dar an vua vanlai runah, zai an vawr dwn e. Nang chu lam
ang lo let leh rawh unaupa Peg, i u leh nau ten kan la phal lo che a sin...
Pega, mangtha le.
ka mittui tla lom lee:'(
ReplyDelete:'(
Deletevan poi tak em... ka ui hle mai RIP
ReplyDeletenia, a pawi ngawt mai.
Delete