Kan sikul ve kha aw!

Khawnge, tùn tum chu ka nuna hmun pawimawh em em mai, engtik lai maha ka theihnghilh theih tawh loh tùr, ka nuna hun pawimawh lai tak, he khawvèl nundan ka zir chhohna hmun chungchang hi ka rawn puah pui ve phawng phawng mai teh ang. Tu pawi mah kan sawi ém lovang chu maw?

Kum 12 dawn a ni ta, kha hmun ka chhuahsan ni kha! Ka la hre reng thin. Zirtirtu, naupang leh nu leh pa kan inhmukhàwm a, Krismàs leh Kumthar vuakvet bàka sa ei ngai reng reng lo khan vawksa leh sawhchiar kan han hmawm mawm hmak hmak a nih kha! Intithei takin kan han vei kual a, kan naute rual ho hnenah engtik lai maha kan pek phal ngai loh marble kan han sem vel a. Khatia kan thilphal ta thut kha thil mak a ni lèm lo. Middle Sikul naupang kan ni tawh dawn miau a.

Kan sikul kha a hmunhma thu ah te, a building thu ah te chuan han chhuan vak nachhan tùr a awm lèm lo, Sawrkar sikul naran ve mai a ni. Mahse, kha sikul kha zirna ka dawn hmasak berna hmun a nih avàng leh tùna ka dinhmun thleng tura rahbi ka rah hmasak berna anih avàngin a hlu a ni. Sikul hi ka kal hma a, kum 4 ka tlin hma in ka lut a. Sikul ka han kal ve chu le, ka nu leh pate chauh an buai lo, kan zirtute pawh an buai a ni. Kan pàwlah ka tè fàl nalh a, ka tahbelh bawk nèn, nitin ka muhil puak ka ngai ziah bawk si. Kan zirtirtu te kha an buai ngawt hian ka ring thin.

Sikul ka han kal ve chu nuam hi ka ti khawp a, thawhtan alo ni a, dar alo ri chiah, ring mangkhengin ”Luhkhaawwm” kan han ti a, Pawl 2 room-ah kan lùt hum hum a. Kan zirtirtunu Madam Pi Chhuangin Bible thawnthu min hrilh thin a, ngaihnawm ti takin kan ngaithla thin. Khang a thu min hrilh thinte tùn thlenga ka nun kaihruaitu ala ni reng thin a. Tam tak chu ka la hria a ni. Entirnan, ”Goliatha chuan inchung chen hial mah se; Pathian a rin loh avàngin Davida lakah a tlàwm ta a ni” tih ang te.

Madam Pi Chhuangi hi kan ngaisàng thei em em a, miin, ” Tunge in zirtirtute zìngah fel ber?” an tih pawhin, ”E le, madam Pi Chhuangi le, Pathian a ring tlat a!” kan ti thin.

Thawhlehni alo thleng a, Fai enni a ni a, dar rik hma hi chuan kan ngaih a ngam viau thin. Mahse, Madam Pi Awmawiin uluk tak maia kan beng, kut tin, kawr leh kekawr a rawn endik meuh hi chuan kan thil tihsual kan hrechhuak ziah thin a. Mahse, a tlai tawh thin. Sikul naupang zawng zawng hmaa bualfai kan tawk leh nge nge thin!

Nilaini alo thlen hi chuan kan huphurh em em mai thin a, a chhan chu Head Teacher Pu Khuallùnan ‘Hmun’ min zawhni a nih vàng a ni! Ka thiam lo ziah bawk! Zirlai dang thiam zung zung in, ” Ti ti ik ik, ka baw-ar khuan màwi bera chuan…” ti zawt zawt thin mah ila, ‘Hmun’ kher hi chu zu han thiam thei tlat lova!

Zirtàwpni alo thlen chuan chawhnu-ah games kan nei ta thin a. Tin vaw ring thei ber nih hi ka tum tang tang thin. Sikul bàn mawlh mai kha! Kan va nghakhlel thei tak em! Bàn dàr a ri chiah hi kawr kan phelh sawk sawk a, iptepui ah kan hnawh lùt a, pheikhawk leh mawza kan hnawh leh chuan a puar tha tawh hle thin a.

Tichuan le, kawr pawh ha lovin, ke làwng ngat lehnghalin, iptepui kan han ak te taw a, scale, thinga suih kha kan han phawrh chhuak a, lu chunga vai pahin kan ”AKSHAAAAAY” haw liah liah mai thin a, a hunlai kha chuan nuam ve tak chu a ni.

Kan sikulah khàn in marble perh te, in rubber kahthlak te kha kan uar hle thin a, a thiam lo pawl ka ni ziah lehnghal!

Tumkhat chu, pawl li kan nih laiin DIET atangin zirtirtu training lai an lo kal a, nula pakhat lo kal ve chu, tùnlai tawng takin ka lo ‘star’ alawm maw le! A class làk laiin vawikhat chu dar vaw turin min tir a, dàr awmna kha a sàng si a, a thlang kha a awih deuh hlek a, kei ka lo tè bawk nèn. Vuak tuma dingdihlip meuha ka tan pawh khan ka vaw pha ta lova, a thlangah ka lum thla ta! Vanneihthlak takin ka hliam na lo hlauh.
( Pawl li ka nih lai hian ka height : 119 cm leh weight : 21 kg chauh ka ni. Kum 8 ka ni bawk.)

Tin, Middle sikul naupang, an zirtirtu ten an hrem lo han chhaih te kha kan ching a, a tukleha kan chan erawh kha chu chau ve tak a ni. Kan tap haw ngei ngei!

Ruahsùr chàngte mawlh kha a va nuam thei tak e aw! Kan sikul chhuat te kha cement chhuat ni ve hek lo, a chung alo tha vak bawk lo nen, a diak kawi pùr mai thin a. Chu chu mipaho lawmah a tla a, hmeichheho hmuha han tleng vel tum khàn kan hmanhlel ta thin a. Kawr vàra chirhdiak kai sùkfai kha hna hautak tak a ni si a, nute hauh kan tawk leh nge nge thin.!

Hetiang vel hi kan sikul kha ni mah se, kan zirtirtute inpékna kha tùn hnua ka ngaihtuah leh hian ka fak mawlh mawlh thin. Zirna ngawr ngawr bakah Madam Pi Chhuangi te, Madam Pi Rini tehoin awmdan màwi min hrilh thinte a lo hlut zia ka hre nawn awn awn thin. Kan zir thin heng, ”Hei hi Chawngzawng a ni, chaw a zawng thin a ni.” ”Kawlhawk thau a tha hle.” ”Bei la bei nawn rawh.” ” Dick-a leh a zawhte.” tih mai piah lamah khàn nungchang màwi te, mihring kan niha kan mawhphurhna te, aia upa zahte leh thildang tam tak min zirtir a. Heng hi damchhung pawhin ka rul let zo dawn lo.
An chungah làwmthu ka sawi mawlh mawlh e.

Hmannia ka han kal leh chuan building tha pui mai, RCC in an lo sa tawh a, zirtirtu te erawh a tam zawk chu a ngai an lo la ni a, Madam Pi Rini erawh a chatuan hmunah alo haw tawh a. Lung a lèng duh khawp mai.

He kan sikul, ka chhuan em em, Primary School Leaving Certificate Examinationa dinhmun sang taka min hlangkaitu hi Chaltlang Primary School III a ni e. A thawktu leh zirlaite ka duhsakna sang ber ka hlan e